Butigerica na Zvonećoj zaprla butigu

Zvonećani su je za zahvalu su okrunili; dobila je kolajnicu, klobuk i knjigu, lepezu, kuglof, rožice, se neč, aš ni to bila obična butiga lih za ča kupit, tu se j’ moglo doznat se neč; ča j’ novega, ki se ženi, ki se j’ rodil, se ča se dogaja i se ča j’ važno.

Zvoneća – Va butige na Zvonećoj pred nekoliko je vremena bilo velo i veselo društvo, ko se j’ prišlo oprostiti od svoje butigerice Bojani Kancijanić i njije butigi va ku su radi zadnjeh dvajsetak let po se neč prihajali. Kot i saka mića privatna butiga, tako i ovista ni imela radno vreme, nego je Bojana ako j’ bila doma rada sakemu kemu j’ ča rabilo, otprla vrata. Sada je odlučila poć va penziju i butigu morda “prenamjenit“ va neki drugi “biznis“.

Zvonećani su je za zahvalu su okrunili; dobila je kolajnicu, klobuk i knjigu, lepezu, kuglof, rožice, se neč, aš ni to bila obična butiga lih za ča kupit, tu se j’ moglo doznat se neč; ča j’ novega, ki se ženi, ki se j’ rodil, se ča se dogaja i se ča j’ važno.

“Ni mi lahko, ma san tako odlučila. Ni više računa. Žalosno, ma j’ tako“:, govori nan Bojana Kancijanić i pomalo se domišja da je va najboje vreme va butige bilo okol šesdeset kupci. I mi smo bili jedni od teh, ne čuda puti ma radi Tramontani smo se ki put videli i malo poćakulali. Nadamo se da će ofrtna Bojana već zmislet neki novi posal i da ćemo se još ki put
nasmet pul nje.

ČESTITKA OD ZVONEJSKEGA KOMUNA
Draga naša butigerica Bojana, od srca ti želimo puno zdravlja i ostvarenja seh želji. Neka ti je sretno i lepo va penzije i da najzada najdeš vremena za ono ča voliš, pobirat lukići, veje grabit, kompir sadit. Žele ti to tvoj Zvonejski komun i to Velini, Lahovi, Trdotovi, Šantini, Andrinovi, Mladenkini, Kalinovi, Lugarovi, Markačini, Matićevi, Maričevi, Kavalinovi…. pisalo je na čestitke ku je dobila najpoznatja zvonejska butigerica, a blizu se našla i pohvalica za najboju penzionerku.

Marijana Kalčić Grlaš / Tramontana / Liburnija.net

Ovo je arhivski članak. Stranice su u međuvremenu redizajnirane.

Kreni od početne stranice - Poduckun.net