FOTO, VIDEO: Brgujski zvončari z nogami se kračaju, mačkare za njimi vragaju

brgujski_zvoncari_pohod_2014

Staru užancu su storili, zle sile, grdo vrime i se ono slabo ča se je va pasanin leti dogodilo su potirali, aš sunce je celi dan svitilo, a tuliko su jako zvonili da će i dalje. A kako je bilo čera vidite va foto galeriji i video snimki…

Brgud – Predpusna nedilja je po užanci dan kada Brgujski zvončari i mačkare greju na svoj tradicionalni krug. Uz zvončare ziz Rukavca, ziz Zvoneće, ziz Mun i Žejan, oni su jeni od najstarijih va našin kraji.

brgujski_zvoncari_pohod_2014_2

Danas jutro, njih 28 “starih” i 17 “mladih” po užanci se je našlo pol Šori. Najprvo su prišli oni ziz Dolinjskeg kraja, pak ziz Štambulije, a celo selo čekalo je onih ziz Gorinjskega kraja pred kimi je i maj kako bi si skupa storili prvo kolo. Muzika moćna, tri armonike, truba, bariton, bubanj i klarinet veselo sopu i zabavljaju ne samo zvončare i mačkare nego se ljude ki su jih prišli vidit. A ljudi od sakudar, ziz cele naše općine i šire, aš jutro je najliplje prit zvončare vidit i provat oćutit su njihu ljubav za mesto va kin žive.

Va Brgudi su već rano ujutro tri kola storili, pol Šori, na Ravnici i pol Crikve. Poza slikanja za kolendar i se uspomene, priko Studenca gredu do Zaluk. Si ki zvončare i naše užance vole baren jedanput su va Zaluke zvončare čekali. Tamo kolo četvori zvončari delaju a Zalukari jih sih lipo ugoste. Već se čuje zvončarski govor, ki su najstariji, ki najmlaji, ki je kuliko puti bil, ki su najjači, ki su najkriplji…

Priko Brižac i Mučić kadi njin se oduže zvončari ziz Mučići, po glavnoj cesti priko Permani i Ružići pridu va Poljane.

brgujski_zvoncari_pohod_2014_1

Va sakin mesti lipo jih dočekaju, a oni njin se zvonjavun oduže. Obed je tradicionalno na Staroj pošti kadi preskaču skaline. To je siguno jedan od dokazi s kin dokažu svoju muževnost, a će ki past al ne, pride vidit jako, jako čuda ljudi….

Ma čuda njih pride jih vidit i zato ča su drugačji od sih drugih grup. Klobuk njin se dela z jelvicu, a korak njin je živ, vesel. Skaču, poskakuju i kračaju se.

Od Stare pošte nazad priko Permani gredu na Mali Brgud i okol 7 večer pridu nazad pol Šori, od kuda su i partili, kadi se za ovo leto oproste od zvonci.

Staru užancu su storili, zle sile, grdo vrime i se ono slabo ča se je va pasanin leti dogodilo su potirali, aš sunce je celi dan svitilo, a tuliko su jako zvonili da će i dalje. A kako je bilo vidite va foto galeriji i video snimki…

Piše: M. K. i F. P. / PodUčkun.net

Ovo je arhivski članak. Stranice su u međuvremenu redizajnirane.

Kreni od početne stranice - Poduckun.net