Pust 2014. – FOTO, VIDEO: Rukavački zvončari – pohod na Zvoneću
Maj na početke, a za njin dve armuniki, trumbeta, bariton, klarinet i bubnji tako skladno sopu i s tun muzikun koraj sen davaju.
Rukavac – Kako i sako leto, Rukavački zvončari otpiraju tradicionalni pohodi na područje općini Matulji i to su storili i ovo leto kada su šli va posjet svojen prijatelon Zvoneće.
Nedejno jutro, kap oblačno, mrzlo, zimsko vreme. Ki ne zna, rekal bi nedeja kot nedeja. Ma, Rukavce je se već bilo fanj napeto. Kot fjonda.
Butiga zaprta, ma auti kot da je Petrova. Se zgorun proti škole i Kaliću, zdolun skoro do Čonjinoveh. Ako ste hodeć i pofermate, na više kraji čut ćete zvonjavu. Zvone, zvončari. Oprtili su zvonci, i pomalo prihajaju Kinkeloven. Dva od Andrejić, tri od Sušanj, s Kalića cela trajba, kot i od Maričineh i Dundić… Se jih je više… Pul Kinkeloveh se stavjaju na kup i potle zadnjega dogovora, jušto na 9, parte.
Maj na početke, a za njin dve armuniki, trumbeta, bariton, klarinet i bubnji tako skladno sopu i s tun muzikun koraj sen davaju.
Va prven rede najboji i najjači. Saki zvončar zna da od prvega se ovisi. Cel dan mislet mu je kako kola delat, a ov put ni bilo lahko. Mladi, još mlaji, jaki, krepki, moćni i to 34 takovi. Od Kinkeloveh, okol Dundić v rebar va Sadinu, pak po Brezovce pomalo Biškupon kade j’ prvo kolo za storit. Okol Kućel, Zdemera i Krive pridu na Škrapnu kade j’ marenda i prilika za malo zakantat.
Do Zvoneće još je malo, srhi se su veći, a žeja još jača. Ovisto kolo posebno se gleda, s pofin njega se i gre. Na Zvonećoj su prijateli zvončari ki te drugu šetemanu Rukavac prit. Preko Zaluk, Brežac, Mučić, Jurdani i Julice zvončari se vrnjaju Rukavac. Kinkeloven, od kuda su jutro i partili. Nikega ni voja doma poć, još zvone, i zvone, Rukavac odzvanja se dokle zadnji zvončar do kući ne pride.
Oblaki su potirali, sunce je cel dan svetilo i si oni judi ki su jih prišli gledat z vani teplilo. Za stoljetnu užancu ni straha. Mladići od dvajset, a i manje let garancija su da se ovo neće tako lahko zatrt i da za sen ten ča smo va 21. stoljećen i da imamo sa čuda tehnologije, ono ča su nan praprapranonoti pustili va nas žive i tira nas naprvo…
Velu fotogaleriju morete videt na oven linke…
M. K. / PodUčkun.net
Foto, video: Tomislav Zemanek
Ovo je arhivski članak. Stranice su u međuvremenu redizajnirane.
Kreni od početne stranice - Poduckun.net