IN MEMORIAM Anton Škalamera Jurčić

– Naš je Anton imel težak, ali i zanimljiv životni put. Neš više o temu pročitat ćete va tekste kega je napisala njegova kćer, slikarica Sonja Škalamera Novak. Nekako san osjetil potrebu da napišen kratki uvod o ovemu posebnemu čoveku. Antonio, u ime seh nas, hvala ti za se, poručio je Rikardo Staraj.

Mošćenička Draga – Napustil nas Anton Jurčić, pravega prezimena Škalamera. Poznal san tega osebujnega čoveka. Delal je ko noćni na recepcije va hotele Marina, a mi mulci smo tamo hodili pokle letneh fešti. Bil nan je semi jedan veli prijatelj, mentor, filozof, a prvo sega dobar čovek kega su si voleli. Kada bi danas oteli opisat ča je to lokalpatriot, onda je definicija Anton Škalamera. Čovek ki je istinski volel ovaj kraj, a to govore veli interesi ke je imel za se. Ribaril je, delal na recepcije, prodaval ribu, putureval kamari, slikal, dan i noć čital i sam sebe celi život educiral. Govoril je strani zajiki ma mu je najdraži ostal domaći. Mira je Antonova žena, a sin i kćer, oba umjetniči talentirani, isto tako stvaraju. Sonja je finila slikarstvo i nekako nastavlja Antonovu slikarsku strast, a Rudi žive va Italije i va slobodno vreme slika. Anton je imel svoj atelje, malu galeriju blizu restorana Johnson, va prizemlje svoje obiteljske kuće. Moren slobodno reć da su Antonove sliki prvi pravi draški suveniri. Na svoj realističan, gotovo fotografski način slikal je naši kraji, najviše Dragu; porat, plažu i stari grad. Od teh slik nastale u kartolini Dragi. Saki je gost kupil jednu njegovu sliku, kad smo neš poklanjali od Turističke zajednice i Općine, šli smo Antonu po sliku. Naš je Anton imel težak, ali i zanimljiv životni put. Neš više o temu pročitat ćete va tekste kega je napisala njegova kćer, slikarica Sonja Škalamera Novak. Nekako san osjetil potrebu da napišen kratki uvod o ovemu posebnemu čoveku. I to vavek storin, o nekemi judi treba pisat i reć kakovi su bili. Aš nisu samo slavni veli, nego i obični judi sa izraženemi telenti imaju svoju veličinu. Pogotovo ve kraje kad mi bivamo, kade nas je malo, kade je tek par drugačijeh, a jedan od teh bil je i naš Anton, toliko različit od seh, a tako sličan semi nami. Antonio, u ime seh nas, hvala ti za se. Rikardo Staraj, načelnik općine Mošćenička Draga.

Anton Škalamera Jurčić, rojen je setembra 1935. va Mošćeničkoj Drage va staroj kuće zgora autokampa mej cestun za Pulu i cestun za Mošćenice, a ka je nedavno zrušena i sada je tamo velo gradilište za turistički objekti. Stara kuća bila je i oštarija va koj su se znali fermat, odmorit i ča popit judi ki su z riječke bandi šli (hodeć ili z vozi) na istarsku bandu ili obrnuto. Znali su tu počinut i Bosanci ki su, trbuhon za kruhon, z Bosni hodili delat ko rudari va Rašu ka njin je obećavala boji život. Antonov otac, Andrija Škalamera zvani Jurčić, vodil je tu oštariju onako usput, a pravo zanimanje bilo mu je graditelj, građevinar, arhitekt, aš je onda to bilo objedinjeno zanimanje va jednoj osobe. Imel je svoju kompaniju delavci s kemi je storil čuda tega, mej ten nekoliko kući va Majčevo; onu ka je od Jadrana Deškovića (od Viktora i Marije) i poten prekoputa kuću Sv. Petar 28 va koj biva Lili Lazarić (a nasledila ju je od oca Maria Škalameri ki je bil Antonov polubrat). Andrija Škalamera je bil nadugo poznat i cijenjen ko graditelj pa je z svojmi delavci delal i velu kuću na centralnin trge va Labine ka je sada Velo kafe.

Mat Antonova, Domenica rojena Bucich prišla je s Plominskega Zagorja ko udovica z malun kćerun Marijun, brinula se za kuću, za decu, delalo se va kampanje. Živelo se teško ma je se nekako hodilo. I onda je prišal rat. Andrija je moral poć va rat, mat Domenica je ostala sama z decun, oštarija je propala, si su se napatili glada. Kad je otac Andrija prišal z rata nikad više ni bil isti, mat Domenica se razbolela i umrla 1945. va 41. lete kada je Anton imel nepuneh 10 let. Dve sestri Mariju i Antoniju je tadašnjo socijalno zelo va Dečji dom va Lovran, kade ih je Anton posjećival a bome se i najil aš je imel pravo na obrok. Užal se dobro najist i va dečjin restorane va Drage kade je delala Nina Rudan Horićeva, ka je mlada z Labina prišla delat i već je imela velo srce za pomoć drugemu jer je videla da je mali Anton lačan i mu je davala vele porcije. Anton je kako muški otrok, va kuće Sv.Petar 28 ku je bil storil Andrija, ostal sam bivat z ocun da se skrbi o njemu uz pomoć polubrata ki je s famejun živel va drugin dele kući. Zato je od 14 let šal ribarit da ča zasluži i prehrani oca i sebe. Vredno je delal, brzo je učil ča i kako se riba lovi, školu više ni mogal pohajat ma je, magari su mu se stari ribari smeli, često čital i pri mesečine na more i na barke svećarice, čekajuć ribu da pride na svetlo. Kako je bil vredan pozivali su ga razne ribarske kompanije da pride za njih ribarit, ma je bil odan onemi za keh je delal; najprvo za starega Daneta a pokle za Rudija Krnetića.

Često ih je z barkun na more grdo nevreme ćapalo pa se nisu mogli doma vrnut, nego su danima bili na Crese, jili ribi, smokvi, ča je bilo i ča su njin judi dali. Od tega doba počinje i slikarska štorija Antona pitura, aš je dok su na Crese čekali da pasa nevera i da se vrnu doma, zel v ruki komad ugljena i po zideh napuštene kući va koj su bili počel slikat barki, ribi, kući, pejzaži. I su judi videli da Anton Jurčić lepo zna crtat. Drugi put pak kad je ribarsku kompaniju ćapal neverin pa su se na Crese štufevali dok pasa, Anton je napamet, po sjećanju nacrtal špil karti pa su š njimi igrali briškulu i trešete. Tu je, već va onin teškin vremene kade se delalo celu noć po dažje i zime, počel prihajat vanka Antonov talent za umjetnost. Vavek je užal reć da va ono vreme bez tehniki i na slabeh barki ribar je moral bit jaki i bedast da bi to mogal delat. Ča puti su se z barkun vajali po debelen more, potapjali, zmočili po neverine i dažje, bugnuli va steni z barkun, a neke od teh štorija vezane su i za čuvenu barku Sv. Andrija na koj je Anton neko vreme ribaril, a pokle ju je kupil i imel Mate Barković.

Intanto Anton je prestal ribarit i zaposlil se va INA rafinerije va Urinje ko soboslikar-ličilac. Va to vreme Anton je osnoval fameju, 1958. leta oženil Miru, Mirandu rojenu Bošnjak ka je s Kalca prišla va Dragu služit pul Ani i Božeta Peršić, meštri ki su delali va Drage. Onda mu se rodil sin Rudi. Anton je šal delat z Urinja va Dragu ko tehničko osoblje va NK Draga, a buduć da je znal govorit talijanski i njemački i neš engleski, brzo za ten zaposlil se va hotel Marinu kade je ostal delat do penzije. Bil je noćni recepcioner po lete, kućni majstor po zime, a i dekorater aš se va hotele Marina nekada užalo fešti delat za doček novega leta i za maškare. Anke i po kućah va Drage i okolice je pitural, delal ko soboslikar-ličioc. Teh se let ćapal delat svoju kuću, za ku su mu neki prijatelji govorili da je „tvrđava s pogledom na more“ ko je jako volel. Čuda tega je s famejun na kuće i okole kući sam zidal, žbukal i pitural. Kamečići z mora su se nosili doma i takevali na zidići okol kući. Pa se i kamari počelo afitevat. Onda se rodila i hćer Sonja. Anton je počel slikat akvareli, ulja na platnu i na lesonitu, s tušen na papiru… za ukrasit kamari, za pokloni za turisti, za prijatelji i fameju. I tako je va ono vreme bil ono ča se danaska reče „ambasador kulture“ aš su njegove sliki našega lepega kraja finile po celin svete od Australije do Rusije, od Ameriki do Afriki, a Evropu da ni ne spominjemo. Bilo je tu izložbi, suradnje s KUD Lovor Lovran, donacija za razne humanitarne prigode, za vatrogasci Opatije, za tombolu za lovačke i ribarske večeri va Drage i sl. Va crekve i kapelicah va Drage i okolice (Obrš, Mošćenice) je sveti kipići, uz pomoć svoje deci, popravjal i renoviral. A judi ki su ča sami delali po kuće su puli Antona prihajali po savjet, pituru, roduli ili čagod ča njin je rabilo. Vavek je rado pomogal i dal.

Ono ča je uz slikanje Antona veselilo i ispunjavalo su bili izleti, putovanja, čitanje, učenje. Kad se je afitalo i ča zaradilo bi se šlo na izlet pokle sezoni ili za kakov vikend i vavek bi prvo ili pokle pročital va kin libre ča o tin meste, vavek gledal zgradi, arhitekturu, pejzaži, znatiželjno ćakulal z domaćemi judi da ča više sazna o tin meste. Povijest, geografija i umjetnost su ga jako zanimale. Proučaval je atlasi i znal je glavni grad sake zemlji na svete. Proputoval je prostor cele bivše Jugoslavije i celu obalu Jadrana, a i neke zemlji Evrope. A Istru je imel „va malin prste“. Po Istre je nekada i ribu prodaval, nakon ča ju je celu noć lovil, i znal je sako selo i kantunić.

Kroz celi taj svoj težak životni put sam je sebe učil, kultiviral, rastal i napredoval. Si ki ga poznaju imaju neku lepu osobnu štoriju o Antonu, neko lepo sjećanje, a va Drage gotovo da ni kući va koj ni neš delal, pitural ili ka nima neku njegovu sliku.

Sonja Škalamera Novak

 

error: Content is protected !!