Ne propustite Pusni četrtak pul Princip @ Matulji

admin 6 years ago Novosti

Za kraj je dosta reć da si ki oteju prit videt i doživet kako zgleda Pusni četrtak pul Princip, budu na dve i pol pul Princip kada te zvončari partit.

Matulji – Do kraja pusta i početka Korizmi ostalo je još sega nekoliko dan pa se saki dan va drugen meste neč dogaja. Trebalo bi se to i zapisat da se ča ne pozabi. Zato sada ovde morete doznat kamo j’ poć danas. Danas ni četrtak kod i saki drugi. Danas je zadnji četrtak pusta pa se zato reče da je Pusni četrtak, a poć je Principon.

Se je počelo pred dvajset i više let kada je par zvončari odlučilo poć storit provu za Pusnu nedeju kada gredu Mučićevi zvončari. Leto po leto put njin je postajal daji, a zvončari je bilo se više. Danas to više ni lih prova nego prava užanca. Sako leto zvončari parte z jenega od sel Mjesnega odbora Principi i va isto se selo večer vrnu. Ovo leto su to Principi.

Zvončari na taj dan malo manje bacelaju okol spravjanja. Obuču huje brageše, stomanju na kvadri, stave kožu, zvonci, a va ruku zamu baltu. Spreda zvončari gredu muzika i maj, a zada baren par maškar. Dobro je reć da je danas prava prilika da zvončar bude i neki ki to još ni nikada bil. Provat more ki god će.

Za kraj je dosta reć da si ki oteju prit videt i doživet kako zgleda Pusni četrtak pul Princip, budu na dve i pol pul Princip kada te zvončari partit. Dočekat ih moru va isten sele večer okol sedan, a mej ten nać va neken od seli Mjesnega odbora Principi: pul Brajan, Obadi, Božinić, Franić al Mavrić. Večer će za si zvončari, muziku, maškare, ma i za si judi ki se tamo najdu, pul Princip bit parićano dobro za jist i popit, a sako leto se to stori uz financijsku pomoć od Općini Matuji.

E. Š. / PodUčkun.net

Ovo je arhivski članak. Stranice su u međuvremenu redizajnirane.

Kreni od početne stranice - Poduckun.net