Od zgora (po)gledano

admin 11 years ago Kronika

Piše: Pepina Matujska

Videj kako lepo pada, jutra će ga sigurno bit najmanje pol metra. Neće prestat tako zlepa! Do Vazma se neće otalit! Ki će to čistit? Već san dve lopati šundral! I tako daje…

Ovaj ludi sneg va našen kraje storil je toliko problemi i kot i vavek pokrenul vječno pitanje, dilemu, raspravu, debatu. Koliko ga je i kade ga je više?

Govore da ga j’ na Munah 76,5 cm, na Zvonecoj 59,8 cm, pul Permani 45,32 cm, Rukavce 27 cm, pul Mihotić 15 cm i tako daje, saki tvrdi da ga je baš pul njega magar za pol centimetra više od onega drugega i tako naprvo.

Ista priča vavek se vodi i za živu va termometre, nevažno je va minuse, al pak va pluse. Reču da kako je jako teplo bilo. Dva stupnja više nego pul vas okol Matuj. Jaaa, van i tramontana zapuše pak i ofriška malo jutro i večer, a ča ćemo mi dolnji reć?

Po zime se, pak minusi mere. Ča je veći minus, to je veći uspjeh. Pul Permani da je razlika za rukav, a na Velen Brgude, mikroklima dela svoje, pak uža bit i -7°C.

Se te štorije podsjećaju me malo na ono vječno pitanje veličini muškosti našeg bojeg polovic. Naravno da mi od tega ne povedamo javno i glasno, ma moran priznat, na to mislimo. Ne smiron, ma čuda puti. Mej prijatelicami kada se poveda od sexa, saka misli da je baš ona najzadovojneja po ten pitanjen, ma niki niš preveć ne govori, aš neke stvari boje je ne znat, kako ne biš imel krive sliki va glave. A da je veličina bitna – JE!

Glavni ženski govor ipak se svodi na to da se okol muža rabi jako trudit i ugajat mu! Da mu se mora bit po voje. Se čisto, oprano i speglano. Se parićano jušto va onen momente kada mu to rabi, a i mej ten, da se slučajno ne domisli na brzinu. Kade su kjuči, mobitel, takujin? Si videla ovo, kade mi je ono? I tako daje. Nikad kraja. Smiron neka panika, ka definitivno ne ovisi o toj veličine.

A ja se na se to pitan za ča pak? Ča se ne bi i on moral malo okol mane potrudit? I ja se neč volin i otejen, a on ni dan danas još ni skužil ča! Ni moj životni cilj bit sluškinja, ka će kot i va meksičkoj sapunice povremeno bit polovično zadovoljena!?

I tako, mislin naprvo, se van je to isto, je snega 10, al pak 40 centimetar, lopati van se j’ ćapat i celi dan čistit. Očistit pred vrati, očistit cestu se do glavne, zlomit lopatu, poludet na suseda ki se pokaže kada ste već na kraje, čekat ralicu, gledat va prognozu i nebo i kjet se po spiske onen općinaron ki se ni ovo leto nisu organizirali da bi na vreme se očistili!

Tako je i zimun. Ako je zima, je zima, niš ne spase dva, tri stupnji, ni gore ni dole. Obuć se j’ i držat va teplen. Opet gledat va prognozu i nebo, kuhat čaj, kjet na vladu ka j’ opet poskupela naftni derivati i mislet kako malo ča prišparat. Po lete vredi vrlo slična situacija. Gledanje va prognozu i nebo, će daž, će se povenut, neće, a joj pumidori neće bit pol agusta, opet kjet općinaron ča nimaju odluku da se po lete ne smeju izvodit građevinski radi pa vas sused ki s pikameron šternu dela već na 6 jutro zbudi… Vavek ista štorija, samo se menja godišnje doba.

A pul one zadnje stvari isto jako nimate ča. Ča je tu je! Reču da se čovek na se navadi kot i tovar palice, pak ako ste oženjeni (neoženjeni ni briga ni kakovo je vreme, ni ka je ura, ni ki je dan) kot i većina judi ki se bave semi ovemi pitanji i potpitanji ne morete niš.

Morete samo sanjat!
Ili varat! Naravno, ako je š čen?!

Ovo je arhivski članak. Stranice su u međuvremenu redizajnirane.

Kreni od početne stranice - Poduckun.net