Od zgora (po)gledano
admin 11 years ago Dnevna Kolumna , KolumnaOvo je bil najlepši Pust! Kratak ma sladak! Kako smo se dobro zabavili! Još lih 300 dan i evo ga opet!
Ovo su samo neki od komentari na sa dogajanja ovega pusta, a moj je sličan. Bilo je super, od početka do kraja. Počelo je onako pomalo, jedan kap sramežjivo, a proti kraju se j’ se steplilo i zakuhalo, zavrelo.
Ni sneg kega je bilo do kolena i još malo zgora ni arival pokvarit ono najbojo va puste – Pusni pondejak i Pust. To su dani kada si al nisi, kada daš od sebe zadnji atom snagi da biš se lepo zabavil i celu korizmu povedal od sega onega ča ti se j’ dogodilo.
A sneg je semu dal jednu posebnu čar…
Nekako mi se čini da su ovi zadnji dani bili više kot reklama za mastercard – neprocjenjivi.
Primjer 1.:
Perika i ostali rekviziti za hitit na se – 50 kn
Boca domaće višnji, popularno zvana Šxxxć – 70 kn
Hodeć po snege nekoliko kilometar za prit do kumpanije – amortizacija postol
Prit do mesta sastanka i utvrdit da tamo već ni nikega – neprocjenjivo!
Primjer 2:
Celi dan bit va maškarah i pobirat jaja – 0 kn
Celi dan pit i jist po kućah – 0 kn
Bit mrtav pijan, mokar do mudanat i va takoven stanje naletet na mater – neprocjenjivo!
Primjer 3:
Pijača za celu kumpaniju va popularnoj oštarije – 80 kn
Kanat i malo striptiza uz popularnu muziku z Iphone-a – 0 kn
Vožnja va mićen aute skupa z drugeh sedan judi, po pol metra snega, uz konstantno rivanje do sledeće štacije – neprocjenjivo
Primjer 4.:
Putna pijača va konobe pul prijatelja – 0 kn
Putna kumbasica va konobe pul prijatelja – 0 kn
Šetnja po sele po sred od snega neočišćene cesti, bez lumbreli, dokle daž zleva kot z kabla – neprocjenjivo
Primjer 5.:
Ne znan jušto kako bi morala poć točna kronologija, ma nekako mi se vidi da bi pod neprocjenjivo mogla jedino još bit – rastava vezi / braka.
I sada kada san pomislela da je pustu kraj i da će se moć malo počinut, već se planiraju pusne i ine večeri i opet se s početka.
Ma ča ćete – jednostavno neprocjenjivo.
Pepina Matujska / Liburnija.net
Ovo je arhivski članak. Stranice su u međuvremenu redizajnirane.
Kreni od početne stranice - Poduckun.net