Razgovor: Jelena Zamlić – Paška čipka na Kastve

admin 14 years ago Naš kraj

Potrebno je više od 500.000 uboda iglom…
Preko 500 sati zahtjevnog rada…
Godine iskustva i strpljenja…
Beskrajna maštovitost…
Da bi se stvorila…
Ljepota
Ministarstvo kulture RH proglasilo je kolekciju paške čipki Benediktinskega samostana Sv. Margarite va Page kulturnen dobron Hrvatske. Kako se navodi va obrazloženje ministarstva paška čipka je va Pag prišla upravo zahvaljujuć časnen sestran benediktinkan ke su još 1579. leta delale taj vredni vez, a va 19. stoljeće su osnovale prvu školu va koj su podučavale šivanje paške čipki. Do današnjega dana se j’ paška čipka prenosila z generacije na generaciju. A da danas postoji jena Kastafka med retkemi Hrvaticami ka ni Paškinja, a šije pašku čipku, posvedočit će sledeći intervju…
Jelena Zamlić ima šezdeset i dve leta, rodom je Kordunašica, a va Kastav je prišla pred preko četrdeset let tako da se j’ navadila i po domaći povedat i za se reče da je niš drugo leh Kastafka…
Liburnija.net: Kako ste počeli šit pašku čipku?
Jelena Zamlić: Pred čuda let san već počela delat ručni radi aš san va Zagrebe finila tečaj krojenja i šivanja, a kad san v Reku prišla san se navadila va Bagate mašinsko štikanje. To mi se skupa ni bilo dosta, pogotovo kad san šla va penziju, pak san se tanto odlučila 2006. poć na Pag vadit se šit pašku čipku. Kada san prvi put na televizije videla tetu Uricu kako poveda od paške čipki, ja noćima nisan spala, nego san mislela kako prit do nje i kako se to navadit. Valda mi je Bog pokazal put.

Liburnija.net: Kako su judi reagirali kada ste prvi put prišli na Pag?
Jelena Zamlić: Stručna učiteljica je verovala va me, pogotovo kad je par dan gjedala kako moj interes se više i više raste. Čak mi je rekla da iman Božji dar i da samo gren naprvo, aš ja san sa bila va ten. Ma ne moren ni opisat koliko! Druge Paškinje čipkarice su rekle da ja to moren provat, ali da se neću nikad navadit pašku čipku šit aš da je to strašno teško i da to more delat jedino rojena Paškinja. Ali ja san uspjela, uz velu upornost tete Urice ka me vadi, uz velo odricanje i velu jubav. Aš teta Urica, stareja ženska od preko osandeset let ka j’ vas život posvetila čipke, me j’ pitala ako bin mogla bit leto dan na Page. Rekla san da ne moren bit leto dan, nego moren bit mesec, pa onda prit još kad neč storin ča mi ona zada za doma. Ona je pristala da delamo na taj način, tako da san prvo na Page bila dvajsetipet dan kada san storila miću čipkicu od pet centimetar promjera – prolela san valda litru pota za tu miću storit! Takoveh sada iman pet, morat ću jih uokvirit za uspomenu. Onda san za zadatak za doma dobila još jenu takovu za storit. Potla san opet šla na Pag i se se j’ tako nastavjalo.
Liburnija.net: Za storit jenu čipku rabi čuda truda i čuda voji?
Jelena Zamlić: Ši; čuda voji, jubavi i strpjenja. Rabilo je i čuda strpjenja od stručne učiteljice ka je to prenosila na me. Mislin da bin ja jako teško kemu mogla prenest svoje znanje ma da taj ima i još veću voju, aš je jako teško samu tehniku nekemu rastumačit. Tumači se nekemu i po pet puti i onda se pitate kako ne razume. Al to je komplicirano. Ne sme se nikamo drugamo mislet aš se mora brojit. To j’ kako matematika i geometrija. Ako se počne mislet na ča drugo, gotovo je, pogrešite! A ako pogrešite, popravjanja ni. Jedino se onda to more raskinut, odrezat i onda se nanovo delat.
Liburnija.net: Ku dobu dana najveć delate i koliko vremena Van rabi?
Jelena Zamlić: Va dane, malo j’ rečeno osan ur. Moran još i kuhat, prat, peglat, va vrte delat aš tu mi je familija. Večer je čovek nekako najveć smiren i more se koncentrirat. Tako mi j’ najboje delat večer aš se moren udubit va proučavanje šemi i va to ča delan. Prvo leto dan kada san počela, sa san bila va toj čipke. Delala bin do dve jutro, a onda bin se opeta stala rano na šest i opeta čipka! Zato san zahvalna familije ča su me trpeli!
Liburnija.net: Danas delate i više?
Jelena Zamlić: Neko vreme san bila i bolna pak nisan delala niš, ali morda mi baš šivanje čipki dava nekakovo zdravje, neku energiju, da ne mislin na bol.
Liburnija.net: Ča Van paška čipka predstavja?
Jelena Zamlić: Mane j’ to neč najlepše ča mi se j’ moglo dogodit va živote! Saka čast sen ručnen radon i sakoj vrste umjetnosti, ali paška čipka je za me vrhunac sega! Ako mi Bog da zdravje, nadan se da neću ostat na ten, nego ću poć još daje.
Liburnija.net: Kako se osjećate kada storite jenu čipku?
Jelena Zamlić: Ne verujen samoj sebe kada je pogjedan. Sama sebe rečen: ”Bože, san ja to storila?!“ Aš ne morete verovat koliko z temi mićemi ubodi tako neč more prit van.

Liburnija.net: Ča je važno znat dok se šije čipka?
Jelena Zamlić: Važno je imet ruki jako čiste, ne smeju se potit i čipku rabi pokrivat, aš ona je bela pak ako bi ju se tikalo bi se oblatila, a nju se ne sme prat. Kad je finjena mora bit trda kot da je kolana. I rabi imet dobar vid, aš to je jako mićihno!
Liburnija.net: Koliko čipki ste storili do danas?
Jelena Zamlić: Ne znan. Ne brojin. Slažen jih; veće uokvirin, manje slažen va fascikl.
Liburnija.net: Ki još ručni radi delate?
Jelena Zamlić: Lancuni, kušinelnice, šliferi, šugamani, stolnjaki, dečju posteljinu, heklanu posteljinu, koperti, facolići…
Liburnija.net: Sudjelovali ste na Izložbe čipki na Page?
Jelena Zamlić: Izložbu je organizirala Branka Primorac, novinarka i glavna urednica kulturi Večernjega lista ku je interesiralo se videt i posnimit. Tako san tamo prišla i ja. Paškinje su bile protiv da učestvuje neki ki ni z Paga. A novinarka njin je rekla: ”Ona j’ Kastafka, ni Paškinja ali dela boje leh vi“. Mislin da su se na to malo ofendile, ali ča njin ja moren…
Liburnija.net: Komentari?
Jelena Zamlić: Bosiljka Pogorelić, paška nevesta ka biva va Kastve mi je rekla da su judi komentirali da mi j’ škoda mučit se, aš da to neću moć navadit. Sada me još zanima ča će govorit kad čuju da iman i diplomu.
Liburnija.net: Ku diplomu?
Jelena Zamlić: Dobila san ju od Benediktinskega samostana. Teta Urica, ka me vadi, dela za njih pak san i ja bila š njun tamo. Kada su benediktinki videle moji radi su rekle: „Ovoj ženi treba dati diplomu jer ona je izradila nemoguće stvari i ima ih stvarno puno“. Videle su si moji radi keh san storila.
Liburnija.net: A paška čipka je i potekla baš od benediktinki?
Jelena Zamlić: Paška čipka je potekla va 15. st od benediktinki va Staremu gradu Pagu. Benediktinki su vadile Paškinje šit čipku, tako da je žensken to bil izvor zaradi. Čipka se j’ pošijala i va Austriju. Čak je za vreme Marije Terezije jena Paškinja delala za nju čipku na dvore. Do današnjega dana se j’ paška čipka tako prenosila z generacije na generaciju. A 1906. leta je osnovana Čipkarska škola ku je utemeljil ondašnji gradonačelnik Paga, Frane Budak. Postoji i mića škola čipki. Va osnovnoj škole ju se vade šit i divojčice od četrtega do osmega razreda. Ne znan ako se potle školovanja ka nastavi s ten bavit. Čipku obično počnu šit ženske va ”zrelejeh” letah. Moren reć da je malo starejeh čipkaric va fuštanah (to j’ naziv za paške narodne nošnji) ke svoje znanje prenose na mlaje. Nadamo se da to neće izumret aš je paška čipka jena posebna vrednost. Rabi reć da je Ministarstvo kulture RH proglasilo kolekciju paške čipke Benediktinskega samostana Sv. Margarite va Page kulturnen dobron Hrvatske.
Liburnija.net: Ča još povedet od paške čipki?
Jelena Zamlić: Pašku čipku zovu ”bijelo zlato“ i najtraženeji i najskupji je suvenir va svete. Kad san prvi put prišla va jenu zlatarnu na Page, zad zlata, va zide j’ bila jena udubina i va njoj čipka. Zlataru san rekla: ”Bože, ova čipka Van je ukras sega ovega zlata!“ A on mi j’ na to rekal: ”Gospođo, ovo nam je bijelo zlato.“ Povedel mi je da dok je delal zlatarnu, unapred je predvidel mesto na ken će bit čipka. I stvarno, čipka j’ tamo i prekrasna je!
I ono važno ča teta Urica vevek reče: ”Paška čipka je jedinstvena va svete. To je čipka Grada Paga.“
Liburnija.net: Vaš dalnji plan ča se tiče paške čipki?
Jelena Zamlić: Va plane iman storit svoju izložbu va koj bin izložila preko pedeset eksponati; ča paške čipki, ča drugeh ručneh radi: heklaneh, štikaneh, a ako se do onda navadin i zlatovez, onda bin izložila i to. Volela bin se još navadit delat đakovački zlatovez i lepoglavsku čipku na batići, a se ako Bog da zdravja. A verujen da će aš mi je On i otprl vrata za delat pašku čipku.
Tatjana Udović / Kvarnerina list

Ovo je arhivski članak. Stranice su u međuvremenu redizajnirane.

Kreni od početne stranice - Poduckun.net