Razgovor: Nataša Tomić, ravnateljica Učeničkog doma – Probleme vidim kao izazove @ Lovran

admin 9 years ago Novosti

Se ča storin dobro, jako me veseli i dava mi voju da delan još boje. Lepo je delat s mlademi aš su jubav i dobrotu ča njin date oni van vrnu, još i već.

Lovran – Ma san trudna, trudna san kako blago! Potužila mi se j’suseda ka dela va Učeničkin dome Lovran. Zajno za tin oče su njoj veselo zaiskrale i počela se j’ hvalit: Vaje, vaje će počet škola pa nan jutre prihajaju deca. Da samo vidite kako se puli nas dela!

Nova ravnateljica je se stavila va red, dela se z guštun, a ni ona se bome ne špara, dela skupa s nami. Ma da vidite kako je dom urejen, po zideh sega ča deca sami store, na se strani veseli kolori. Ki lepi lila traped je kupila za va kamaru kade je televizija. Kuhinja posložena kako farmacija, se delaju z rukavicami. Zaspraven ima se pod kontrolun. Tu je kada god rabi, vavek opletena i urejena, ne znan kako to se ariva, a ariva. Va dome budu Dani oprteh vrat, vi ka ste dom videla prvo morate prit i sada, da vidite razliku, trni preko sveta poć do nekadašnjeh kasarni.

Se tako mi napovedala a da ni sama ni znala kako mi j’ dala delo al po moderno rečeno hitila bubu v uho. Va današnje vreme je zaspraven čudo da se neki hvali z delun, a još veće da neki na sa usta hvali onega ki mu to delo dava al na dele zapoveda. Zač bin ja morala čekat Dani oprteh vrat, mislin va sebe, kad moren poć zajeno? Tr jako dobro znan onistu: ki išće taj i najde! Znan i onu: ki kuca, opira mu se! Telefonala san i pokucala na vrata ravnateljice. Vrata su se oprle, a ja san veselo pozdravila i rekla po ča san prišla.

‘‘Drago mi je da želite videt naš dom i veselo ću van ga pokazat’‘, rekla je nova ravnateljica Nataša Tomić, za nekeh ‘‘strah i trepet”, za nekeh ‘‘dobra vila”, a ja san lih oćutila – kako bi rekli mladi – dobru vibru.

Va ke školi hode školani ki su pul vas va dome?

– Ovde imamo decu s cele Hrvaske. Neki hode va Obrtničku al Ugostiteljsku školu, neki va Hotelijersko turističku v Opatije. Imamo i studenti s Fakulteta za menedžment i ugostiteljstvo va Ike. Va dom moremo prijet 120 učeniki i 70 studenti za keh se skrbe 22 naša zaposlenika. To su odgajatelji, stručni suradniki i pomoćni delavci.

Ča želite storit da bi školanon bilo boje?

– Želin i za školani i za studenti parićat čin lepši i lagji život va dome. Oni h nan pridu da bi mogli poć va školu ku su zibrali i moraju imet regulu i mir za vadit se kako bi bili kuntenti svojemi rezultati va škole. Mi želimo da oni sami vide ča j’ njiha odgovornost, aš to njin onputa dava voju i za delat i za napredovat. Gre nan od ruki, a to nan je i delo, da va njih zbudimo kreativnost, a to je radost živjenja i stvaranja. Verujen da neće čuda vremena pasat i da ću se štimat kada buden povedala da je taj i taj poznati kuhar, šef, direhtor ale menedžer bil va našin dome.

Pogovaramo se va hode. Se onako sprotu gospa Nataša mi pokažuje:

– Ove stare odrabjene kantredi i stol smo dobili pa smo ih piturali i tapicirali, aranžman na stole je storila naša učenica. Pogledajte sliki i ukrasi po zideh, se je to naše delo. Za ovu lampu, ku je storila naša učenica Monika Skert, dobili smo prvu nagradu na Državnoj domijade. Zidi smo opiturali va svetli i živi kolori. Ćutite kako š njih zvire veselost i puni naš dom?!

Hodeć tako ugjedan kako va nanovo urejenoj kuhinjice jedan mladićac peče palačinki. Da peče! obrće ih hitajuć vajer. Bit će novi Karapanđa. Pul njega stoji jedna divojka i maže ih z marmeladun. Dva stoje i gjedaju. Valda čekaju da delo pride h kraju pa da z guštun pojedu namazane palačinki. Hodnikun se širi lepi dih ki me škakje va nose i pošija neki senjali va trbuh. Ale, ni ča mislet. Prtimo se na kat. Školani preše zgoru i zdolu, saki za svojin poslun. Ni jedan ni pasal bez pozdrava. Neki fermuju voditeljicu da neč pitaju ale njoj povedu. Ona strpjivo nasliša, pita, rešava… To je njijo delo. Ono pedagoško, učitelsko, voditelsko, ko je skroz svoje školovanje navadila, a skroz delo va Osnovnoj škole v Opatije zbrusila do zlatnega sjaja. Sada ovako bogata sa znanjem i iskustvon pedagoga od struki more školanon i studenton podarit ono najboje od sebe. A va sen ten na dobitke su i delavci ki vole delat. Njurgaven ni pomoći.

Gremo zgorun do vrha pak opeta zdolun do zbornice. Gospa Nataša mi poveda:

– Zbornica je sada prazna. Va učionicah se deca vade, a pomoru njin naši odgojitelji. Dobar del veleh kamar smo smanjili pa su sada va njih dve ale tri posteji. Manje dece va kamare za veći komoditet onen ki se vade. Nanovo smo uredili i veći del kupaonic i vešeraj. Sa ova mobilija – od ideji, palet, pituri i dela – rezultat je slobodnega vremena. Niš čudno. Mi smo del mejnarodnega programa Eko školi i volimo se neš storit svojemi rukami. Urejujemo se okol kući, sadimo rožice, a imamo i vrt za verduru. Sa naša deca besplatno koriste internet, knjižnicu, fitnes salu, košarkaško igralište i gredu na izleti. Organizirali smo novinarsku, muzičku, dramsku, recitatorsku i slikarsku grupu, a imamo i salu s televizijun. Se to dobar del našeh mladeh drži više vremena va dome i, rekla bin, pozitivno djeluje na njihovu socijalizaciju i kreativnost. Malo po malo, aš se niš ne more storit preko noći, to njin dava onaj pravi osjećaj da je i ovo njihov dom, kako i onaj rojeni. Videla ste va prizemju kuhinjicu kade moru sami po svojoj voje ča skuhat. Ovde urejujemo i frizeraj, tako će frizeri i kozmeti čari imet mesto kade te moć delat praksu i urejevat svoji domski prijatelji. I nas ako oteju… ha…ha…ha…

Čuda tega je storeno, kako to rešavate financijski?

– Surađujemo s FMTU, ki su nan dali donaciju od 40.000 kn, a pomoru nan i ACI d.d., BWA Yachting, Marea, Liburnija parking, Pert d.o.o., Metis, HBOR, 3-tcable, Andar, Monitor energije i suseda gospa Karlović ka nan je vavek na ruku. Osin tega pozivan poduzetniki i si judi dobre voji da nan pomoru koliko ki more. Na zid san dala montirat displej potrošnje vodi i nafti. Sada saki korisnik more videt potrošnju. Svi oni znaju da ča se više smanje stroški više će ostat za njihe potrebi i žeji, ke pišu va teku za to stavnu na stol pred zbornicun. Lepo je videt njihe žeji, a još lepše ako njin ih moremo ispunit.

Kurijoža san kako arivate bit toliko predana delu, fameje i tako dobro zgjedat?

Gospa Nataša se lih nasmela i rekla:

– Čovek se celi život vadi. Trudin se da vavek delan na sebe, pa san pul mojga pedagoškega fakulteta finila i studij za menadžment kako bin dobila širu vištu kako va dele napred. Problemi ne ćutin kako problemi, nego kako izazov kega treba rešit. Posložilo se j’ i to da su mi deca narasli pa su mi se smanjile familijarne brigi. Se ča storin dobro, jako me veseli i dava mi voju da delan još boje. Lepo je delat s mlademi aš su jubav i dobrotu ča njin date oni van vrnu, još i već. Rekla ste da dobro zgjedan… Zadovojna san, a zadovojna ženska vavek dobro zgjeda.

Vrnule smo se na početak, va prizemje. Hitila san oćadu va kuhinjicu. Ni kuhari ni palačinki, a kuhinja j’ čista i morala san pitat da ča vavek puste tako čisto za sobun? Gospa Nataša je rekla da j’ to sada njihovo doma i da se saki dobro ćuti kada je doma se va rede. Zato ih tu i vade da dobro delaju kako bi se dobro i ćutili.

Zahvalila san se Nataše Tomić, novoj ravnateljice, ka je va Lovrane malo više od leto dan, a storila je nemerljivo delo. Morda je to samo zato ča j’ prava ženska prišla na pravo mesto. Šla san kuntenta doma, a sunce mi je namigevalo zmej dveh oblaki. Dole na turne odzvanja. A mane još vavek mačak leži na šparhete, mislela san! Ni ča mislet… Treba se poprešit zdolun. Polne zvoni…

Razgovor je objavljen u suradnji s tiskovinom Lovranski list.

Silvana Milotić / Lovranski list

Ovo je arhivski članak. Stranice su u međuvremenu redizajnirane.

Kreni od početne stranice - Poduckun.net