Razgovor: Senka Laginja – Za sakega iman kušćić sebe

admin 14 years ago Naš kraj

Senka Laginja va jenoj škrinje čuva niti keh je tkala njija duša, a z lapišen su one tako pustile trag na harte. Judsko živjenje uspoređuje z promenun vremena i godišnjeh dob. Ona reče: ”Judi živeju, ma pjesnici živeju za vavek.” Za se reče da je našla svoje mesto pod Suncen, a veli naglasak stavja na duhovnost. Čudi se ča je toliko lepega okol nas i žali ča današnji način života kot da juden zapira oče pak ne arivaju gjedat okol sebe i uživat z punemi plući va nečeren ča smo dobili za niš. Se smo daje sami od sebe, zakjučuje z tugun va glase. Senka va sebe ima jubavi za cel svet, ne skriva masku va žepe i ne menja svoje lice.
Zato ćete sigurno uživat va saken kapiće besedi ku nan je povedela, ne samo od sebe i svojga rada, lego i o radosti živjenja, a morda ćete i ku suzu spustit ako se prepoznate va koj niti njije duše ku nan je položila na dlan i pružila pred seh…
Ka je Senka Laginja?
Čuda se puti i sama to pitan… Od mojega rojenja pasalo je čuda let a ja san još vavek otrok. Neč va mane ne oteje odrast, aš ovako mi je čuda lepče. Nekad zažmin pa zamišjan da san vetar, nekad kamečić va more, a nekad kap od rosi. Na lice su već i bore, a ja san ostala otročica. Zaigrana i puna mašti. Uživan va mićeh stvarah i od života išćen malo, a davan puno. Ča više sebe dan, to san srećneja. Osjećajna san i romantična i va sebe skrivan jedan drugačji svet nego ča je ova naša stvarnost. Taj svet želin prenest na kartu i podelit z judi. Iman jenu škrinju va koj čuvan teki i čuda ispisaneh karat va keh je utkana i moja sreća i moja tuga. Saka je beseda napisana z razlogon i del je mane. Rabi imet kuraja za položit dušu na dlan i ispružit ga pred seh. Ja san to storila. Va toj su škrinje niti keh je tkala moja duša. To je moje blago. To san ja – Senka Laginja.
Kada ste počeli pisat?
Čini mi se da san se z lapišon rodila, a š njin ću kapac i umret. Najsrećneja san dok pišen. Mislin da postojin na oven svete da bin delala baš to. Prvu san pjesmu napisala kada san bila mića minja. Dok pišen, se okol mane nestane. Postoje samo lapiš, karta i ja. Besedi z duši teču kot i reka ka nima kraj, a saka je kap jena pjesma. Više jih ne moren ni zbrojit. Ovako otpriliki, rekla bin da san jih napisala okol dve tisuće. Del je poezija, a del teksti za uglazbit. Neki dan san e-mailon jenoj dragoj osobe poslala svoju najnoveju pjesmu. Do malo vremena, zazvala me je na telefon i plače…”Ča ti se j’ dogodilo?”, pitala san ju va veloj brige. ”Ne mogu vjerovati da sam se ovako snažno rasplakala na tvoje stihove”,rekla mi je. Pal mi je kamik z srca i z gušton san se nasmela. Bilo mi je drago da je va pjesme prepoznala samu sebe. To mi je i cilj; podelit z judi svoja iskustva, onda kada njin rabi bit uz njih magar z pisanun besedun. Volin gjedat izraz lica judi dok čitaju ono ča san napisala. Saka bora na čele, smeh, uzdah, znači da san ostvarila ono ča san otela. Volin dok se smeju, a drago mi je videt i suzu va tujen oke dok čitaju moju tužnu spoved. Tako shvate da nisu sami. Niki va živjenje ni isključivo srećan al nesrećan. Ta se stanja menjaju kot i godišnja doba. Nekad cvatemo kot rožice, nekad nas vetar nosi kot suho pero z dreva. Stori nan se i led va srce, a nekad nan z oka sunce špija. To je čovek kroz živjenje. Savršenstvo svemira. O temu se more čuda pisat. Reču da judi živeju, a pjesnici pišu. A ja bin rekla: ”Judi živeju, ma pjesnici živeju za vavek.”
Kada su van se pjesmi počele uglazbjevat?
Pisala san teksti i spravjala jih va škabelin. Dve tisuće i četrtega leta odlučila san jih znet van i tako je počelo… Moje prve uglazbljene pjesmi otkantala je Ivana Marčelja. Čuda san let maštala o temu da se moje pjesmi kantaju i nikad neću pozabit emocije kada se je to i dogodilo. To van je slično kot kad se matere rodi otrok. Oni ki pišu z velun jubavi kot i ja, razumet će od česa povedan.
Neč kašneje ste počeli pisat teksti i za drugeh?
Najprvo san pisala za pjevači ki kantaju na našen čakavsken dijalekte. Korak po korak. A danas moren reć da san jako zadovojna kako se j’ situacija razvijala. Nisan imela nikega ki će stat zad manun i ”rivat me”. Šlo je po malo ma sigurno. Osin Ivani pišen i za grupu Kolaž ‘i grupu Maestral. Moje pjesmi kantali su Neno Pavinčić, Antonela Malis, Linda Gizdulić. Pišen teksti i za dečji festivali. Pre dve leta počela san surajevat z šibensken skladateljen, tekstopiscen, aranžeron i producenton Darkoton Kalogjerun. Inače Darko je vođa legendarne rock grupi Do posljednjeg daha. Imamo jako iskren odnos, jur mi se je z početka bilo teško prinavadit na njigovu bolnu iskrenost. Ako mu se neč ne pježa, ne špara ”oštre” i ”grube” besedi, a bilo jih je sakuliko. Va strahe san otpirala e-maili i čitala kritike va keh je analiziral teksti keh san mu slala Jedan jedini put mi je prišlo da više nikad ne zamen lapiš v ruki. To san mu i rekla, a onda san ga komać čula: ”Samo budale i kukavice odustaju, a ti u te kategorije ne spadaš. Na vrhu ima mjesta samo za jake, uporne i najbolje. Vjerujem u tebe, ti to možeš…” Kad mi je to rekal, ćapala san se dela i do danas Darko i ja imamo blizu četrdeset demo snimki ke čekaju svoji izvođači. Naše pjesme izvodile su se na Zagrebfeste, Melodijah hrvackega juga va Opuzene, Međunarodnen festivale va Bihaće, i ovo leto na CMC festivale va Vodicah. Posebno me veseli pisat teksti za klapi, i to na dalmatinsken dijalekte. Jako san ponosna na pjesmu Sada mi je ža, ku je va Vodicah interpretirala klapa Maslina. Let san sanjala o temu da baš oni otkantaju moj tekst, a kad se je to dogodilo potekle su mi i suzi. Do sada to smatran za svoj najveći uspjeh. Va Opuzene je izvođena pjesma U more zaljubljen, a Vinko Coce je za nju dobil treću nagradu publiki. Na Bihaćken festivale z mojun kanconun predstavila se je Lidija Asanović, ex pjevačica Srebrneh krili. Igor Cukrov je 2008. leta trebal kantar moju Kaplju ljubavi na Zagrebfeste, ma su ga prijeli va Operaciju ”Triumph” pa ga je zamenil zadarski pjevač Ivan Županović. Ta će se pjesma sejeno nać na Igoroven CD-e. Drago mi je da san uspostavila suradnju z zagrebačkun pjevačicun Dajanun Mar. Dajana je već svojen radon postigla značajan uspjeh. Ima specifičan vokal i ugodan karakter. Njiji suradnici su Arsen Dedić, Matija Dedić, Ante Pecotić, Sandra Sagena i drugi, pak mi je zato posebna čast ča će se na njijen nosače zvuka nać i moje ime potpisano pod pjesmun Zakrpana duša.

Za kega sad trenutno pišete?
Pred malo vremena kontaktiral me je muzičar i pjevač Diego Zulijani z Labina. Čuda let je sopal va USA i sada je odlučil izdat vlastiti CD. Angažiral me je da mu napišen seh dvanajst pjesam, tj., kompletan album. Prva pjesma Gdje smo mi snimana je va Šibenike pul Darkota i sada se parićujemo snimit spot. Stavjamo na kartu ideji, a spot će snimat ”Art film” z Matuj. Za drugu pjesmu muzika i aranžman dela se va studije ”Sound temple”, a tistu zadaću Diego je dodijelil Feridu Hukiću – Fecu. Dobila san zaspraven velo delo i nastojat ću to storit kot ča bin za samu sebe. Osin tega Darko i ja imamo plani delat kanconi za Bosnu i Srbiju, već smo neč i storili, ma o temu ćemo neki drugi put.
Pišete pjesmi na standardnemu hrvackemu zajiku i na čakavštine. Ča van je draže?
Srce najviše voli naše – ča! Prve besedi ke čovek progovori ne more zamenit ni jedan zajik na svete. Ja san domaća ženska – Kastavka, pak i najraja govorin i pišen po Kastafsku jur pišen i na standardnemu hrvackemu zajiku.
Vaš rad je bil i nagrađivan?
Na domaćeh san festivaleh nagrađivana z nekoliko drugeh i trećeh nagradi publiki. Najdraža nagrada mi je ku san dobila 2007. leta na festivale Grobnička Skala, a dodijeljena mi je za najboji tekst. Treću nagradu publiki lane na Melodijah Opuzena već san spomenula.
Osin pjesam pišete i priče, ča ne?
Za malo promenit, pre dve leta počela san pisat i prozu. To mi se je jako zapježalo pa je nastala cela zbirka kratkeh prič, od keh jenu morete pročitat na online izdanje Večernjega lista a zove se ”Pismo”. Pišen i jenu životnu dramu, a paralelno s ten i dva romana. Ne arivan zapisat se ča bin otela. Jedan roman je horor tematiki a zove se ”Duh u sjeni majke”. Za drugega me smiron pitaju ako je gotov, a tisti je pak erotski. Trebal je bit ljubavni, ma me je pišuć ”malo zaneslo”. Razumete ča govorin, ča ne? Osin tega, va škabeline iman spravna i dva scenarija za predstavi. Jenu kumediju i štoriju za decu ”Sporić Žurko” ka poveda od sinpatičnega puža i njigovoj veloj jubavi. Pul mane se more sačesa nać, a k letu bin mogla izdat i svoju prvu samostalnu zbirku. Smiron na me zijaju da ča čekan. Jednostavno ne znan od kuda počet i ča najprvo izdat. Dečju zbirku, ljubavnu poeziju, miće mudrosti ke nosi živjenje, teksti na čakavsken, al pak na standardnen hrvacken zajike? I još k temu, ne volin eksponiranje va javnosti, intervjui i mediji. Skromna san, jednostavna i samozatajna, a kad zbirka pride van, neću se moć doma skrivat, ča ne?
Učesnica ste književnega projekta ”Vrisak kroz svilenu paučinu”?
Zbornik pjesam ”Vrisak kroz svilenu paučinu”, ujedinil je pjesnici z Balkana a to su: Dužević Neven, Zall Kop, Livija Reškovac, i moja malenkost z Hrvacke,a onda su tu još pjesmi od Branislava Lukić Luki i Jasmina Mujanović Maga z Bosni i Hercegovini, Sabine Koželj Horvat pjesnikinje z Slovenije i Branislave Kostić Gace ka je srpske nacionalnosti. Po mojemi saznanji od 1991. leta do danas bila su samo dva projekta va keh su bili uključeni poete z Balkana. Recenzije zbornika su jako pozitivne i zbirka je izazvala veli interes javnosti. Izuzetno je prihvaćena i predstavjena va tri države. Promocije će se nastavit na jesen, a delić jene recenzije glasi:” Imati moć da jedan stih nosi dubine oceana čini se podjednako teškim zadatkom kao što je nositi teret Atlasovih nebesa, a to je u Zborniku uglavnom postignuto…” Saki od nas objavil je petnajst pjesam, a moj ciklus zove se ”U moru ljubavi”. Jena od najvećeh prednosti umjetnosti je ta ča zbližava judi bez obzira na nacionalnost, vjersku pripadnost i drugo. Drago mi je da san del tega projekta, a izdavač Zbornika je Inda d.o.o. Lukavac z Bosni i Hercegovini. Tista knjiga poezije je jedan del istoimenega međunarodnega multimedijalnega projekta autora Branislava Lukić Luki, Jasmina Mujanović Maga i Denisa Dugonjića. Osin poezije va zbirke su objavljene i fotografije razneh autori.
Z čen se još bavite osin pisanja?
Distributer san internacionalne kompanije ”Tianshi”. Uživan va svojen dele aš me ispunjava do zadnjega kapića. Volin pomoć juden na bilo ki način i to delo ne smatran kot obavezu ni napor nego kot vrhunski užitak, a čuda znači kad je čovek zadovojan z onen ča dela. Ja san svoje mesto pod suncen našla i za to san jako zahvalna. Veli naglasak va živjenje stavjan na duhovnost. Meditacija i molitva del su sakega mojega dana. Živejen za miće stvari, volin fotografirat prirodu i se ča je okol mane. Toliko je lepega okol nas ma današnji način života kot da juden zapira oče i ne arivaju gjedat okol sebe i uživat z punemi plući va nečeren ča smo dobili za niš. Se smo daje sami od sebe i čuda se puti pitan: ”Zač?”. Puno čitan, najveć libri psihološke tematiki, a volin skupjat i ljekovite biljke. Najden lazno i delat postolja za boci i to od materijali keh najden va prirode. Dan za me premalo dura, aš ne arivan storit se ča bin otela.
A ši imate morda i ku manu?
Prevelu veru va judi. Preveć san iskrena i poštena a te osobini danaska baš i nisu na cijene. Judi me nekad umeju dobro iskoristit, pobrat zaslugi za mojo delo i pripisat jih sebe. Ma neka njin bu. Onisti gore zapišuje se. Ne volin i ne umen lagat. A niman ni zač. Takova san, kakova san. Ne skrivan masku va žepe i ne menjan svoje lice. Ovo ča vidite i čujete, to je Senka. Okol sebe iman čuda judi ki me vole, ma i onisteh ki ne. To j’ normalno, a ja bin ki put rada znat ča san ovisten drugen storila. Nimaju razlog da me grdo gjedaju, al su ga morda sami zmisleli. Ja volin seh. Va saken išćen ono najboje. Nastojin pametit lepe stvari i grdo pozabit, a judi delaju baš suprotno. Koliko bi svet bil lepči da ni mićeh vragi ki bivaju va seh nas. Zač znimat rožići kada nan ne rabe? Z lepun se besedun more se. Na taj način ja razmišjan. Kada me pitaju kako san, ako san loše, tako i rečen. Ki će se mojoj nevoje veselit – njigov problem. Takoveh na žalost je, ma ja i daje živejen svoju iskrenost i pred Bogon se ničesa ne bojin. Va sebe iman jubavi za celi svet. Ako van rabi – tu san. Za sakega iman kušćić sebe.
Vaš životni san?
Volet i bit voljena. Imet pul sebe čoveka ki će se s manun smet i ki će mi kad san žalosna reć: ”Ne plači.” Imet nekega ki će me držat za ruku, gjedat me v oče i mučeć povedet se. Živejen za jubav. Ča je više podelin svojmi bližnjemi, to san srećneja. Sanjen i o temu da će jedan dan moja deca držat va krile svoju dečinu i čitat njin ča je njiha nona napisala. Va sakoj pjesme je delić moje duši i va mojeh ću pjesmah za vavek živet. Nećete me se tako vaje rešit. Bit na Nebe, a ostat mej svojmi – još jedan san. Iman svoje nebo i na njin zvezdi ke mi svete kada zaškuri. To su moja deca, moja familija, moji roditelji i čuda divneh judi ki mi davaju zraki sunca bez keh ne bin mogla. Hvala sen ki su uz mane, aš i kada mi je žep prazan – š njimi san bogata! Oni će se va oveh besedah prepoznat. Malo je reć njin – ”Hvala!”
Par besed za kraj?
Uživajte va živjenje i semu onemu ča život sobun nosi. Saki dan je dar, saki je dan poseban.
Smejte se, ne šparajte besedi: ”Volin te”, ”Fališ mi” i ”Oprosti”. Ne znamo koliko nan je koraki još ostalo za pasat, i kad će naš put fermat. Zato živejte sada, ovisti momenat. Prošlost je pasala, a budućnost ki zna ako će prit? Čovek je čudo. Budite tega svjesni. Gjedajte okol sebe aš raj je na zemje i vrata h njemu su nan širon oprta. Ne išćite da vas drugi usreći, budite srećni spofin sebe. Saki od nas je jedan, jedini, poseban. Ča to ni lepo? Budimo zahvalni za to. Volite se. Jubav je najlepča beseda na svete. Izvor ki nikad neće presušet. Ne šparajte lepe besedi aš one sakemu od nas rabe kako ča nan rabi i zrak. Budite mi dobro, volin vas seh!
Kada te bace na pod –
Digni se.
Ako ti govore ružno –
Nasmiješi se.
Kada ti suze teku –
Sakrij se,
I lijepom riječi –
Osveti se…

Pjesma iz zbornika ”Vrisak kroz svilenu paučinu”:
U MORU LJUBAVI
Okružena valovima,
Prepuštam se milovanju mora
I zamišljam da si ti,
Da u raj me vode tvoji dodiri.
U svakoj kapi tvoje tijelo zamišljam,
I tobom se obavijam.
Grli me,
Nije me sram,
Što čitavim bićem samo tebi pripadam.
Plamen u moru koji se ne gasi…
To sam ja.
To smo mi.
Ja i Ti.
U moru ljubavi.
Tekst i foto: Tatjana Udović / Kvarnerina list

Ovo je arhivski članak. Stranice su u međuvremenu redizajnirane.

Kreni od početne stranice - Poduckun.net