Va spomen na Velimira Tuhtana

Piše Rajka Jurdana-Šepić

Portal PodUčkun.net 3 years ago Novosti

Kad sunce zažge, malo bavice i čuda hlada se vavek najde na najlepčen opatijsken tarace, na Belvedere. Dve su smjene kupači na njegoven banje, jeni su jutarnji, a mi drugi po zapolne i predvečer, kad borići i ancipresi rastegu svoje duge seni po teplen petone, se do mora. Onput naša mića domaća kunpanija kupači ne zna od pravega dobra, od superbije i bogatije, ča bimo raje, plavali po sunce, al po hlade… kraljevska dilema.

Kasno zapolne, ki put i predvečer, kad je jur na tarace od hotela već užala muzika sost i gosti se spušćali na večeru i na tanac, plavali smo čuda puti i z muzikun – to bi nan bilo kako jeno sinhroplavanje. Ob toj dobe od debelega hlada, spustil bi se čuda puti do mora i jedan Kastavac, suh čovek va zlatneh leteh, z malo dajemi vlasi, onako umjetničkemi, i z bradicun ka temu imageu pripada, tih i miran, ni sleda halavanjast i vavek onako malo na smešić bi se držal… A morda nan se j to samo tako činilo, aš tako „na smešić“, opušteno si mi po lete na banje od Belvedera zgledamo, kad je to mesto ultimativnega relaksa, počitka za dušu i telo. Pustil bi robu i šuvaman na prven leven petoniće, nikad ni šuvamana rastegnul ni polegal se, nego bi se samo šal ofriškat i vaje za ten pobral nazada proti kastafskemu bregu. Poznali smo se nekako, odvavek, preko prijateli z Kolaža i ki put bimo poćakulali, na banje ni krijanca previše, aš tamo saki pride počinut i malo na mire bit. Lepo i lahko je bilo š njin par besed razmenit, aš je bil školovan i učen čovek, usmen i pismen, ale jednostavna i mehka domaća duša. Ča j novega, ši ča interesantno čita i ši ča piše – aš stran ča je bil albokat umel je jako lepo slagat stihi, na našen domaćen zajike.

On se j zval Velimir Tuhtan i nažalost, nećemo se već trefit na Belvedere, aš se j pred malo, nekako naglo i prej dobi, preselil va hlad od ancipresi kastafskega cimitera.

Velimir se j rodil v Reke 1955. leta va učiteljskoj familije, i mat i otac su mu bili učitelji, otac i ravnatelj školi Brešca. Diplomiral je na rečken Pravnen fakultete i čuda let, do 1992. leta je bil sudac na opatijsken općinsken sude. Oženil se j, imel familiju, dve kćeri. Potle je sa leta delal kot albokat, imel svoju kancelariju, odvjetnički ured. Stihi je pisal samo za grupu Kolaž va koj je sopal, skladal i bil frontman njigov kujin Igor Lesica. Se skupa je Velimir za Kolaž napisal 18 pjesam, mej njimi: Moj otac je bačvar, Cara putana, Mićel i Paškvalina, Kurijera, Margareta.. Pjesme su mu najviše škercoze i vesele, i sam je bil čovek od kumpanije, skoro se su takove, stran jene, ku si poznamo i volimo. To je pjesma Pod orehon, ku je napisal skupa z Igoron Lesicun, ki ju je i uglazbil. I nju je svojni otkantal Kolaž, potle muška klapa Kastav va aranžmane Saši Matovini, a najzada su ju skupa z kastafci odsopli perfin i marijači Estrella vaje z meksičkega grada Puebli. To jena od oneh ljubavneh balad na ku moremo plakat skupa z trumbetami i violinami, ke zajdu nekamo duboko nutra do one sredice od čoveka i postaju „naše“, „narodne“ i vaje ne znamo više ki ih je napisal aš, kako da smo ih mi sami napisali, al bimo bili radi, da smo umeli. A napisali su ju Velimir i Igor 1995. leta jušto pod jenen orehon, va dolce, lih prek cesti pul kući pul Trinajstić.

Štorija je to od jene jubavi ka ni šla po dobre, po skalah zgorun ona j šla pred oltar stat z drugen, samo oreh pod ken su se frajali je sam ostal domišjat se pasane jubavi. A mi ćemo se i po njoj domišjat Velimira, ki se j nekako naglo i prej dobi otpravil, ale ostale su nan njegove besedi pak će živet naprvo kroz njih, kad ih budemo čitali, kantali…

A na Belvedere će nan ovo leto falit jedan tih čovek ki bi se spustil predvečer na on petonić zajeno levo, malo ki je znal da je poet… dokle od mora bavica puše, dve se suzi na kamike suše.

ON JE ŽIVEL, KAKO J OTEL

Vejotu, 13. aprila 2021.

Si živet oteli bi, kako oteju,

Ma malo jih je, ki to umeju

Od kad znan za se, i zate znan,

bil si kot moj, stareji brat.

Od kad znan za se, i ti si tu,

za takovi, judi reču da je živel, kako j otel.

Ja onako mići, a ti velik,

lahko ti j bilo, škerac storit,

al me ćapat, okole vrata

ti bil si ki put, moj drugi tata ki je živel, kako j otel.

Va Preluk na trki, me zapejal

z pašaretun me pokla, si natakal

pa hitil va more, plavat navadit,

na karti varat, z nonun se svadit,

…aš je živel, kako j otel

TU NA RAVNE POD OREHON, VA PRVI HLAD

TVOJI VERSI OSTAT ĆE, MOJOJ DUŠE SPAS

POZABIT NEĆU TE,

…I SI NEKA ZNAJU – DA ON JE ŽIVEL, KAKO J OTEL

SADA I JA, LOVIN SE HLADA,

NOVA MULARIJA, SADA PRIHAJA

POZABIT NEĆU TE

.. I ONI NEKA ZNAJU – DA ON JE ŽIVEL, KAKO J OTEL

Onda postal si, mladi drug sudac,

a malo kašneje potla jedanput, gospodin avokat,

ma dobro znal si, znal si to ti

da pravice na oven, svete već ni

pa si živel, kako si otel.

Kade j bila fešta, bil si i ti

z bukaleti, žmuja, nazdravit, popit,

jedan od asi, to bil si ti

jedan od asi, keh skoro da ni

aš si živel, kako si otel

Versi z tebe – su sami hodili,

„Na ravne pod orehon“ mi smo storili

Kurijera, Mićel, al Margareta

bila j to naša prva kazeta

.. a ti živel, kako si otel

TU NA RAVNE POD OREHON, VA PRVI HLAD…..

Igor Lesica

Ovo je arhivski članak. Stranice su u međuvremenu redizajnirane.

Kreni od početne stranice - Poduckun.net