Tekst iz arhive. Stranice su u međuvremenu redizajnirane!

Blagdanska poezija Riccarda Staraja: Božić pod Učkun

...ilustracija...

Prigodnu blagdansku tematiku koja je protekla četiri dana vladala našim stranicama zatvara pjesma draškog poete koju možete pročitati u nastavku.

Mošćenička Draga – Posljednji dan produženog blagdanskog vikenda zaključujemo prigodnim stihovima draškog pjesnika Riccarda Staraja. Pjesmu „Božić pod Učkun“ pročitajte u nastavku teksta.

Božić pod Učkun

Božić, opet san ga zel

skroman i tih ostat otel,

nisan arival i sada mi je žal

ča san opet sačega regalal.

A mogal san samo reć:

ljubav i mir, i stat uz teplu peć,

popit žmuj dobrega crnega vina

i gledat kako zvezda sveti za Njega.

Ma Djeda Mraz je na portun tukal

prišal je nutra, jaketu je sukal,

bradu je znel, blatni vlasi otplel,

debel i pripit na fotelju sel.

Deca su va čude gledali

i nisu sami sebe verovali,

da zaspravje taj beli nono

ne trese svoje božićno zvono.

Onda je oprl takujin

taj vražji beli sin,

znel je vanka kreditnu karticu

takal se na net i storil naruđbu.

Pripejali su kup regali

hitali ih po škalinah, natla su pali,

onda je Babo jednega po jednega delil

pod brk se ceril i pomalo svoj wisky pil.

Govoril je po amerikanski

nanke ni znal skandinavski,

potpisal je regali teh delivery

podrignul i šal, više ga nismo videli.

Deca su plakala od vele tugi

aš su videli da je Djeda Mraz neki drugi,

neki ki ih kupuje preko telefona,

bez jeleni, saonic i božićnega zvona.

Onda san njin proval špjegat

da je ta američki Mraz jedan veli tat,

da ge je zmislela Coca Cola

kako bi se prodavala ta slatka soda.

I onda smo se dogovorili

ja i sa deca ove božićne idili,

da ćemo drugo leto čekat Mikulu

i pozabit ovu črjenu hollywoodsku ludu.

I da je ta Santa Claus jedan velo sralo

aš je zavadil sako dete velo i malo,

i da je važneje verovat srcu matere i oca

ki se to kupe makar posudili šolda dva.

I da mi je najveći regal taj dečji smeh

dok pomalo pada z Učki mehki sneh.

Riccardo Staraj / PodUčkun.net

tagovi: mošćenička draga, riccardo staraj, božić pod učkun, božić, liburnija, pod učkun, božić, poduckun.net, blagdani, pjesma, stihovi,