FOTO: Dobro jutro Hrvatska opet iz našega kraja @ Brgud
Današnje jutro na Brgude bilo je jeno od oneh za zapisat va brgujsku povijest. Prišla je ekipa z HRT-a snimit Brgujski zvončari i mačkare i javit se uživo va emisiju “Dobro jutro Hrvatska”. Kako je pasalo jutro na Brgude morete videt na oven linke…
Brgud – Sigurno vas seh zanima zač nan je danas sunce prišlo van? Odgovor je vrlo jednostavan. Brgujski zvončari su zazvonili i to je to, oblaki su se prestrašili.
Šalu na stran. Današnje jutro na Brgude bilo je jeno od oneh za zapisat va brgujsku povijest. Prišla je ekipa z HRT-a snimit Brgujski zvončari i mačkare i javit se uživo va emisiju “Dobro jutro Hrvatska”.
Već od ranega jutra oćutil se j’ štrmor, dih ulenjaki i kroštul. Pun stol kumbasic, a va bukaletah domaćo vino…trebe gosti pričekat i pokazat njin kakova je brgujska užanca.
Okupilo se j’ okol 30 zvončari i mačkar, uživo va emisije povedeli su bar besed i na najboji mogući način, zvonjavun zbudili seh oneh ki su još spali. Ni falela ni armunika, pak se j’ na kraje i zakantalo.
Se to je bil pravi uvod za ovu nedeju kada Brgujski zvončari gredu na svoj tradicionalni krug. Parte z Velega Brguda pul Šori okol devete, preko Zaluk, Brežac, Mučić, Permani i Ružići na Staru poštu kade preskaču skalini i otkuda se veseli pomalo okol Permani i Malega Brguda vrnjaju nazad doma.
Zato se ne pojidajte, lumbrel van sigurno neće rabit, nedeju, a morda i daje je lepo vreme zagarantirano!
Kako je pasalo jutro na Brgude morete videt na oven linke…
M. K. / PodUčkun.net
Ovo je arhivski članak. Stranice su u međuvremenu redizajnirane.
Kreni od početne stranice - Poduckun.net