FOTO: Zvonejski zvončari storili užancu

pohod_zvonejski_zvoncari_2014

Slabo vreme, daž ki j’ lužil ni njin dal priliku za prit. Ni ni danas jutro bilo baš neko obećavajuće vreme, znali su da će prvo, al potle past daž, ma užanca j’ za storit i partili su.

Zvoneća – Kot ozebal sunce čekali su Zvonećani lepo vreme i nedeju da parte i vrnu posjet svojen prijatelon Rukavčanon. Malo puti dogodi se da j’ trebe toliko čekat. Slabo vreme, daž ki j’ lužil ni njin dal priliku za prit. Ni ni danas jutro bilo baš neko obećavajuće vreme, znali su da će prvo, al potle past daž, ma užanca j’ za storit i partili su.

pohod_zvonejski_zvoncari_2014_1

Krepki, veseli, nasrhnjeni fanti i muži, njih više od dvajset z Zvoneće su partili okol Sušanj, preko Zdemera i Kućel do Biškup kade njin je po užance marenda. Malo kumbasic, vina, kakov ulenjak al kušćić presnaca dobro pride pred Rukavcon. Tamo se j’ za pokazat. I to više puti, aš kol je pet.

Okol Brezovca, Krujac, Filetoveh i Jurdanoveh kampanaju proti Mirine. Zdolun do Kalića judi je pred i zad njimi cela curma. Si se ča bliže davaju da čin boje kolo vide, muziku čuju, a i da odsude ki kako nosi.

Dokle su oni još na Kaliće pred butigun već je odbor parićan. Brentica z vinon, golice, bukaleti, a i dva partenjaka z koficun ulenjaki. Judi naloženo, za sen ča daž se jače i jače pada. Nekako niki lumbrel ne otpira. Si misle da ni lepo zvončari z otprtun pričekat, a i da ne bi bilo da još jače daž zovemo.

Zvončari kolo delaju, a mi od zgora gledamo i govorimo da jih je lepo videt. Si smo nasrhnjeni, aš prišli su, užanca j’ storena. Neken se jur i suza va oke sveti… Z brentice piju si od reda, i to j’ užanca, ni lahko, ma saki zvončar to ume i more. Dve tri besedi z prijateli, malo kanta i sopnjadi i parte naprvo. Dugo j’ još Zvoneća.

pohod_zvonejski_zvoncari_2014_2

Okol Štranjgi i Julice pridu v Istranku kade obedvaju. Malo počinu, poprave zvonci i gredu daje. Pul Jurdani, Mučić i na Brešceh čeka jih čuda judi. Saki rada zvončari pričeka, ponuti z pijaču, kakovun slašćicun, malo poćakula š njim. Čast je poznat zvončara.

Preko Breškega Dola pridu do Zaluk. Prvi su sada Zalukari, oni kolo predvode. Si stresaju kot da su sada partili, kot da ni zad njimi dug i naporan put. Kolo j’ storeno. Sopu i kantaju, zvončari i si ki su prišli jih videt. To su blagdani va našeh mesteh. Cel dan smo za njimi, gledamo, uživamo i mislimo da ne postoji niš lepče od tega.

Do Zvoneće još je jako malo, a voji i forci za najmanje još jedan đir storit. Potle zadnjega kola na Zvonećoj nikega ni voja doma poć. Ovo će se komać za leto dan ponovit.

A ki će toliko čekat?

Fotogaleriju morete videt na oven linke

M. K. / PodUčkun.net
Foto: David K. / Foto Luigi

Ovo je arhivski članak. Stranice su u međuvremenu redizajnirane.

Kreni od početne stranice - Poduckun.net