Grajanska kuća stareja od dvesto let @ Lovran

Spomenka Micolini

Samo vreme je hodilo naprvo, judi su se menjali, a kuće predelevale za lagjo živjenje. Pomalo su nestale voltice i škalice, stare poneštri i balkoni, portuni, konobi, šterni i kortili. Tu i tamo ostalo je još neš netaknjeno, pul česa saki dan pasujemo pa i ne abadamo da j’ to senjal od nekadajnega starinskega živjenja, a Spomenka Micolini očuvala je Turčićevu kuću kot mići muzej.

Gren va Lovran. Grad od starini kupa se va prosunačken sunce. Komać je prepasala deseta ura, a već skroz jene prušijani diši frigana riba. Namisal mi pade ona: “Polne zvoni, plovana doma ni…” Samo još fali dih od palenti. Stanemo pred kućun ka va Staren grade nosi broj 1. Po broje prva, a morda je i po dele aš spada mej one storene na nekadajneh zideh s kemi je grad bil svojni opasan.

Ti debeli zidi, storeni od kamika klesanca, čuvali su sa Božja leta grad od oneh ki su ga oteli posvojat i prezet kako svojga. Sada ti zidi čuvaju kuću po lete od prevele teplini, po zime od prevele mrzlini, a mej ten va drugi štajoni od umidanci. Kad smo se našli na prven pode, pul gospe Spomenki Micolini, nekadajneh Mikuličići, zgubili su se dihi od ribi, a zadišel je marun i čaj. Prava domaća užanca. Za pogovor i za videt koliko čudes ova kuća skriva, malo j’ bilo vremena, a za čudit se od srca ča se sega od starini va njoj očuvalo, još manje. Pravo za reć, čovek ovdeka more bit celu šetemanu, a još ne videt su bogatiju jene lovranske grajanske kuće. Takove su nekada bile se kuće va Staren grade, ma pred dvjesto let. Samo vreme je hodilo naprvo, judi su se menjali, a kuće predelevale za lagjo živjenje. Pomalo su nestale voltice i škalice, stare poneštri i balkoni, portuni, konobi, šterni i kortili. Tu i tamo ostalo je još neš netaknjeno, pul česa saki dan pasujemo pa i ne abadamo da j’ to senjal od nekadajnega starinskega živjenja.

Turčićeva kuća va Lovrane

STAN PUN SPOMENI
Do prvega poda su još vavek stari škalini od kamika, kega su kavadori kavali ki zna va koj kave. Danaska se to već ne dela. A stan, va ken biva gospa Spomenka, ostal je pun spomeni. Spomeni na njijega muža i generacije stanari prej njega. Sergio Micolini z roda Mikuličići, redital je ov stan od barbi Giovanija Turčića i njegove ženi Marije, ki j’ bil pomorski kapetan i ki j’ potle smrti ženi i sina ostal sam na svete. Kako je va Sergiote videl teplu dušu i va njin našal, kot da bi obnovjenu sinovjevu jubav, pustil mu je ov stan, a ono ča j’ bilo va stane potle su delili Sergio i njigova kujina Marija. Nas je semo ponesla štorija o temu kako su i kada Mikuličići prišli va Lovran? Štorija je duga, a nan ju je na kratko povedela gospa Spomenka…

– Tata Romano Francesco Mikuličić bil je pomorski kapetan iz Poljana. Oženil je Milenu Polić s Hreljina, ka j’ bila rojena va Argentine, a potle su skupa živeli va Trste. Rodil njin se 1924. va Lovrane sin Sergio, ki je rado prihajal barbe Turčiću va Lovran. I njih dva su se jako voleli. Videt je to i po onen ča je Sergio redital. Po staren parone kuću va Lovrane još i danaska zovu Turčićeva kuća. Na drugen kraje zemji, va Vrbovce, rodila se Spomenka. “Ja san po rođenju Prigorka, a po življenju u prošlih četrdeset i više godina ipak sam Primorka”, rekla nan je. “Pa kade ste se va to vreme našli?” pitali smo kurijožo.

KLOBUK JE KRIV
“Čudni su putovi Gospodnji,” zdahnula je na lepi spomeni nekadajni i počela povedat kako njoj je mama Vjekoslava rojena blizu Varaždina, a tata Josip v Reke, kamo je prvo prišal nono delat va rečku luku još za vreme kad je v Reke bila mađarska vlast. Živjenje je otelo da se va Vrbovce najdu Sergio, ki je prišal videt svoju kujinu, a Spomenka je bivala va kuće te kujini va koj je večer prej bila veselica, a na koj je Sergio zgubil klobuk. Drugo jutro je prišal iskat klobuk, ale namesto klobuka je našal divojku Spomenku, svoju buduću ženu. Klobuk je kriv, da ča! Oba mladi, žejni videt sveta i živjenja, živeli su va Trste. Ma Sergio je vavek volel Lovran. Va Lovrane i Opatije je finil osnovnu školu, Salezijansku gimnaziju v Reke, a kako je tata Romano plovil i bili su dobro stojeća familija, Sergio je Filozofski fakultet finil va Padove na ken je potle i dohtoriral. Sa leta do penzije predaval je latinski i talijanski zajik, povijest i zemljopis, najviše va Trste. Kad su 1973. leta doselili va barbin Turčićev stan Sergio je još šest let do penzije sako jutro z auton šal va Trst, odelal svojo delo i vozil nazad va Lovran. Niš mu ni bilo teško aš je volel Lovran. A volel je i saki kantun va kuće kega je barba s čuda jubavi namestil, a Spomenka redila, čuvala i očuvala. Rekla je da ni kantridan ni promenila mesto, a to se njijemu Sergiotu jako pijažalo. Kako su stale za barbinega i njigovega života, tako su postavne i danas.

KRUŽNI TOK
Va kuhinje je ognjišće od belega mramora i se ča mu pripada. Na nape su posloženi lončići i vrčići, va veltrinah zdelice i pijati od majoliki, va ormareh i pikabiteh posložena roba, jedino se promenilo mesto od kupaoni ke nekada ni bilo. Tako je sadašnjo kupatilo reditalo celu štoriju. Najprej je kundot bil storen pul šterni vane, potle su ga storili nutreh na dne škalini, onda je prišal va kuću mej dva zida. Boje reć va jenen debelen zide zidublo se kamiki i storen je zahod. Danaska se zad teh vrati skriva napošno storena stalažica. Onda se videlo da takov zahod ni baš naredan aš je fanj tesan pa su novega storili va jenen dele kade je najmanje pačil. Ale, kako je vreme moderneje hodilo, za storit i kupaonu zelo se j’ jedan kus od hodnika i tu se storil banj. Pred kupatilon je stari opleteni bagul, va spavaćoj kamare još jedan od barbi, zidi su puni slik, a mi pohajamo z jene kamari va drugu i čudimo se kako hodimo va kolo. Va kuće je storen pravi kružni tok. Na jena vrata gremo nutra, na druga van, a niš nigdere nikemu ne pači i se je složeno, čisto i luštro, jušto kako da smo va muzeje. A more se pasat i popreko z jenega kraja va drugi. Va kuhinje smo zabjeno stali i gledali. Stol star dvesto let, kablera od svojni, lagamani i broke od majoliki, pegli na ugjen i one još stareje, zluštrane pezi, očišćeni nekadajni lonci da se luštre boje od noveh…

PETNAJST VRATI
Kega strpjenja i kega dela! A gospa Spomenka lih reče: “Pa cijeli sam dan doma, imam vremena, tu i tamo sam malo sa penzijonerima… A čistim od kraja i dok dođem do kraja, već trebam krenuti na početak. Ali to me veseli.” Ni leh to zrekla već se brižno sprignula i va kaljevu peć stavila drevo da nan bude teplo. Od trih kaljeveh peći zapali samo ovistu kade večer gleda pravu televiziju, aš onu drugu, zovimo ju prirodnu televiziju od grada, more gledat na se četire strani aš na se strani ima poneštri, a na sprednoj još i balkon, po lete pun rožic. Smejemo se kako se pred malo va kuće zmutil jedan pitur. Više dan je pitural vrata i na kraje ih šal zbrojit. Kako je vrat puno, a on na prolazi nenavajan, na kraje ju pita: “A koliko san van jas popitural teh vrati?” “Petnajst,” je rekla gospa Spomenka. Jušto toliko vrat je va stane, a saka su drugačija. Poneštar je samo osan, a ni jedan zid od kuće ni storen va škvadru pa j’ sa drvenarija kupjevana na meru. Va stane su očuvani i stari podi piturani po nekadajnu, a očuvan je i saki senjal grajanske kuće stareje od dvesto let. Pogledujemo lepi stolići zad keh se urejevala ženska i zrcala, pijati po zideh i važi za rožice po kantuneh kamar. Ono ča j’ najlepje va oven stanemuzeje je to ča j’ kuća va sebe očuvala dih domaće teplini, a gospa Spomenka – ka za sebe reče da je “najmlaji eksponat” va oven muzeje – parićana je razdavat more jubavi sen ki njoj pridu delat kunpaniju. Danaska smo to mi. Sedimo va poltronah, pijemo čaj, povedamo…

Spuznuli smo va misleh dunboko ponazad va pasano vreme. Ale zvon sv. Jurja ni imel milosti. Odzvonil je polne i rabilo nan je poć. Vane nas bušnulo sunce i kuntento nan se nasmelo.

Cvjetana Miletić / Liburnija.net
Foto: David K. / Foto Luigi
Izvor: Lovranski list

Ovo je arhivski članak. Stranice su u međuvremenu redizajnirane.

Kreni od početne stranice - Poduckun.net