Intervju: ''Beseda'' po besedu i tako 800 puti

a_nlRijeka – Danas van gre, jubilarni, osanstoti broj ”Besedi”, priloga Novega lista na domaćen zajike, kega već petnajst (od šesnajst let koliko postoji) let kot urednica dela Aleksandra Kućel Ilić, za seh ki je poznaju (ma more i za vas drugeh) – Anda. Kako Anda ima čuda dela, i to v Reke, a mi drugi smo va Opatije, iskoristili smo feštu od Novega lista i novega sportskega dnevnika, ka je bila čera večer, da joj postavimo, ne pet, leh osan pitanj… A da se bude drugačje od standardneh intervjui, pomogli su kolege Marino i Marijana ki su taj intervju naslišali, i ki put ča i dodali…
Liburnija.net: Ča je va novoj ”Besede”?
Anda: Se uobičajene rubrike ke su, jene je nova o aforizmima, a ekskluizvno se vrnjuje Ivanka Glogović Klarić. Samo sad više ne piše ”Besedun na besedu” jer tu rubriku delaju Kukurin i Gračakovićka, nego će delat štorije na temu domaćeh uzrečica.
Liburnija.net: Ti je štufno delat ”Besedu” nakon petnajst let koliko si urednica?
Anda: A čuj.. Od nečega se mora živet. Ni mi štufno. Beseda mi je sujena.
Liburnija.net: Ča ti se posebno pjaža va sen ten dele?
Anda: Volin taj domaći zajik, aš se bil počel jako gubit, a vidin da sad više ni tako. Kad san gledala domaći rječnik od Mohorovičiæća, rječnik rukvačkega zajika, da najden ku ”tajnu” besedu za radio, našla san puno besed ke su pasale u svakidajni zajik, a mislin da je va ten bila i uloga ”Besedi”. Mislin da će vreme pokazat koliko ta rubrika vredi, i da će s vremenon imet veći valor nego danas.
Liburnija.net: Ča se more poć va ”Besedu”? Kakova je koncepcija?
Anda: Moja, originalna. Ona je i svojevrsni pokret i projekt, ona živi dulje od jednega dana, ni klasična dnevna rubrika.
Liburnija.net: Ča ti govore ”obični judi”?
Anda: A niš, kritikaju… Kako i rabi. I onda storin boje.
Liburnija.net: Imaš kakovu anegodotu, il, ča bi rekli po domaću, smešnicu, od seh teh let?
Anda: Jako puno ih je, ma sad se ne moren ni jedne zmislet. Recimo, neke besede su se krivo razumele. Kad nekega pitaš ča je to ”devica”, a kad pročitaš na karte piše kot da je djevica. Znaš ti ča je devica?
Liburnija.net: Verovatno ni mića deva…
Anda: Ne, to je sluškinja.
Marino: Mi devica rečemo za žensku od popa, ka mu čisti…
Liburnija.net: To je lepo, al ovo ni tvoj intervju…
Marino: Ma samo govorin…
Anda: To ne stavi, aš će nam se smet da smo si mi zajedno jena vela anegdota (smeh)… Da se vrnemo na stvar. Najboja stvar je ča za ”Besedu” pišu judi seh uzrasti – od miće dece do već starejih judi. Bil je tako jedan Zamećan, Rude Surina se zval, ki je imel puneh 92 leta i još je delal za ”Besedu”. I sad mi ti najdi neku drugu rubriku, va celoj Hrvatskoj, da ima suradnika i od sedan i od sedandeset i sedan…
Davor Žic

error: Content is protected !!