Od zgora (po)gledano – Ča pravi ljubavnik mora imet?

Piše: Pepina Matujska

Pasana brkata tema otprla je još jednu sličnu, a opet novu. Neč na ča muški ne moru utjecat, a to je koliko su kosmati ili dlakavi. Za jako kosmatega muškega, ki je dlakav sakuda, a ponajme po živote, reče se da je kosmač. Je mu to kompliment, al ne, ne znan. Saki neka sam odsudi?!

Promatrajuć jih malo po lete na more reć bi da postoje dve kategorije muškeh: oni ki vole da su onakovi kakoveh jih je storila majka priroda i oni ki vole da to z raznemi preparati i akcijami reše, ča bi reć da gredu na depilaciju i slično. Depiliraju se onda po celen tele i koristin ovu priliku da sen njin ki to delaju, javno čestitan. Za to trebe imet fanj hrabrosti, dobro stisnut zubi i krepko potrpet, aš na keh se mesteh oni dlaki znimju…, ne morete ni zamislet. Jedno je kada je muški sportaš, pak onda mu to pači za rezultat, to je za razumet, a oni drugi, za ča to pak oni delaju?

Ja, kot prava ženska volin pravega muškega! Po sisteme ča je – tu je. Ako je kosmat dobro, a ako ni, isto dobro. Reču da se dlaki po nogah ni ne računaju, nego da su glavne oniste na prseh – popularno nazvane ljubavni tepih. Navodno, da ča je muški kosmateji jušto na ten područje da je veći i boji ljubavnik?! Aaaa?

Govore još da je važna i Adamova jabučica, veličina nosa, dajina prsti, i ča ti ja znan ča se se ne gleda i ne računa kot neka veza i poveznica?! Ča vi mislite? Ima to veze jedno z drugen? Je to pul njih baš se tako povezano?

Ako se mane pita, ću reć da to se skupa nima apsolutno nikakove vezi! Kosmati muški definitivno nisu boji ljubavnici od oneh manje kosmateh i obrnuto! To se po ten ne more nikako merit. Bit pravi ljubavnik ipak ovisi od nečesa drugega, a ne od dlak na prseh, ni od dlak nigdere, ni od Adamove jabučice, ni od prsti i od ničesa gore navedenega.

Pravi ljubavnik, po mane, je onaj, od kega van se, čin na njega pomislite aktiviraju srhi po vrate ki gredu proti zdolun se do mićeh prstići na nogah, pomalo se fermevajuć sakeh jedno petnajst centimetar; isto tako kada van popularne vešćice va trbuhe lete semo i tamo kot pomućene, kada van je vela teplina va obrazeh, kada van se muti va očah i kada počnete mucat pred njin čin rabi neč reć, magar to bila i najjednostavneja rečenica; kada vas se njegove izvedbi pušćaju bez daha, kada ste fascinirani sakun sitnicun na njin i okol njega, kada van se se njegove performansi jako pijažaju, a pogotovo kvaliteta i kvantiteta…

Taj isti ljubavnik i na dugo djeluje na vas, pak ste kompletno zmešani i zbunjeni po celi dani, po noće uopće ne spite, mislite lih na bedastoće i na to kako ćete videt kade mu se dlaki rastu i kolike su…

Ovo je arhivski članak. Stranice su u međuvremenu redizajnirane.

Kreni od početne stranice - Poduckun.net