Štrige su va akcije, ča ćemo sad?

halloween_sm…a ako van se ne gre okole po oštarijah morete storit feštu doma…
…za parićat prigodnu hranu ne rabi čuda, a va tekste morete videt ča se parićuje od hrani za ovu noć…

Opatija, Matulji, Lovran, Kastav – Halloweeen, Noć vještica ili štriga morda ni naš tradicionalni blagdan, ma se već nekoliko let i pul nas slavi. Ovo leto morete poć na Halloween party Pul Dodića – Matuji, Guitar cafe – Kastav, Kontiki – Volosko, Centar bar i Oaza – Lovran, Hemigway i Galija – Opatija ili pak Forest pub pul Jurdani… Bilo kako bilo, tu noć budite ča god ćete i hote tamo kade mislite da će van biti najboje.
Ako van se ne da poć na neki party za tu noć, morete doma imet svoj vlastiti party. Osim štriga, simbol ove noći su i bundeve. Va današnje vreme bundeve su postale pravi specijalitet. Od nje morete storit juhu, maneštricu, a morete je jist va neken umake ili pak ko prilog. Kako su sve hladneji dani, provajte skuhat juhu od bundeve, a kako ćete to storit evo sad ćemo van reć: 700 grami bundeve narežite na dugačke fete i stavite na pleh za peć skupa s šest neočišćenih češnja i 2 žlice maslinovega ula. Pecite va pećnice zagrijanoj na 200 stupnji oko 30 minuti, dok ne poškuri. Bundevu rabite dobro ohladit, a češanj očistit. Kad sve to storite, stavite va mikser i zmiksajte. Va posude steplite ule, dodajte naseckani šeglin i kapulu, i dinstajte na lahkoj vatre oko 5 minuti. Dodajte 50 grami riže, 3 povrtne kocke i zalijte z litrun i pol vrele vode se dok se riža ne skuha. Se to skupa treba dobro zmešat. Na kraje stavite papar, malo petrsina, soli i još kratko neka se kuha. Ako ne otejete jist juhu od bundevi evo još jednega specijaliteta, ali ovega puta – slatkega.
Karamelizirane jabuke jedno su od najpoznatejeh kolači za Noć vještica, a ni ih teško ni storit. Jabuke operite i skinite im peteljke. Kade su bile peteljke stavite drveni štapić. Storite smjesu od četrdeset karamel kocki i jedne žlice vode. Kada van je smjesa glatka, va nju stavite jabuku na štapiće. Saku jabuku stavite na masnu kartu da van se dobro osuši.
Halloween, Noć vještica ili štriga jako je blizu, pa obavezno provajte jedan od oveh recepti, a mi ćemo van samo reć – prijatno.
Serena Calderara / Liburnija.net

error: Content is protected !!