U oku kamere: Kumpanija z Pumpa banda važgala maškare va Studene
Ovaj vikend fešta se seli va dom pul Jušić kade će nan opet za glazbeni del bit zadužena poznata ekipa na domaćoj scene, Pumpa bend, ki je nebrojeno puti pokazal i dokazal da zna kako napumpat, važgat i dignut na nogi ljudi kade god da se pojave.
Brojni ljubitelji pusta i pusneh tanci odabrali su ovu subotu dom va Studene idealnen za skrit se pod masku i delat nemotarije ke pripadaju “petemu godišnjemu dobu”. Sakako rabi pohvalit organizatora Udrugu “Maškare Studena” ka je organizirala već tradicionalno maškarano druženje, ko će se definitivno pamtit još fanj.
Kada bi se atmosfera ka je tamo bila, morala opisat va jenu riječ, definitivno bi “pakleno” bila prava riječ za to ča se je tamo dogajalo tu večer. Bilo je tu i mladeh i stareh i trezneh i pijaneh, definitivno jena od onakoveh fešti za ku se želi da nikad ne fini. Da niki ne ostane žejan pobrinulo se je osoblje cafe bara “Žejanka”, a za održavanje visoko postavljene letvice zabave bil je zadužen Pumpa bend kemu je to definitivno i “šlo za rukun”, sudeći prema reakciji ljudi ki nisu frmevali tancat i kantat od početka večeri pa do samega kraja fešte. Koliko god to niki od prisutneh ni tel, prišal je i kraj večeri, ali samo za tu subotu aš se ista takova fešta sada seli va dom pul Jušić kade će nan opet za glazbeni del bit zadužena već poznata ekipa na domaćoj scene, Pumpa bend, ki je nebrojeno puti pokazal i dokazal da zna kako napumpat, važgat i dignut na nogi ljudi kade god da se pojave. Za podmazivanje grla i parićevanje seh antidehidracijskeh napitki, ki su neizbježni za preživljavanje oveh pusneh dani, zaduženo će bit osoblje caffe bara “Omega”, ka je i organizator pusneh tanci pul Jušić, te ovon prigodon seh poziva va dom na pusni tanci se subote pusta i pusni pondejak. Cjena benzine je pala pa su i oni odlučili bit va trende i stavit besplatan ulaz za seh.
I. M. / PodUčkun.net
Ovo je arhivski članak. Stranice su u međuvremenu redizajnirane.
Kreni od početne stranice - Poduckun.net