VIDEO, FOTO: V Rukavce zvonilo 50 zvončari

rukavacki_zvoncari_pusni_pondejak_2014_1

A ako ste danas v Rukavce morda budete imeli i sreći i videli kega ki po staroj užance do naga gol merlin seje i zija dug, debel, dug, debel, dug, debel… Video isječak objavljujemo uskoro, dok veliku fotogaleriju možete pogledati na ovom linku

Rukavac – Pusni pondejak i Pust dva su najveća blagdana (uz Petrovu) v Rukavce. To su dani kada mlado i staro ponemeje, kada mladi i neoženjeni divojki i mladići gredu va partenjaki, muški gredu zvonci nosit, a si drugi već najdu neku zanimaciju kako pasat ti dani.

rukavacki_zvoncari_pust_2014_2

Kuhajuć, pečuć i parićevajuć za se te curmi ke te ovi dva dni va kuću al konobu prit.

Na pusni pondejak zvončari parte od Kućel, pak okol Črnčić, Sadini i Sušanj gredu na Štranjgu i vaje Trtnon. Okol Jurinić gredu Biškupon i nazad Kućelon kade fine svoj đir. Pred sakun kućun kade jih se pričeka oni zapale kres, popele muški i ženske i ”blagoslove“ judi, kuće i konobi. Š njimi je i vražić ki seh očrni, a ako mu se ne pustite onda baš nadrajsate.

Partenjaki pak parte od butigi i obajdu se ča i zvončari, samo ča oni više dela imaju, aš njin je va kuće hodit i tancat za ”sami kućani“, za ”pusnu nevestu“ al ”pusnega zeta“, za ”ki more i ne more“, za ”repu“ … lih da je veselo. Se to pondejak do noći fini, pak se fešta nastavja do ranega jutra.

Fešta je tako moćna da jutro na Pust ni jako ki ni partit, a dug je put i fanj je kuć za obać.

rukavacki_zvoncari_pusni_pondejak_2014

Zvončari više od 20 mićeh i toliko veleh, muzika i se ča jedna zvončarska grupa mora imet parti okol deset i pol od Kinkeloveh i obajde celi rukavački komun. Vaje do Perčić se gre, a ni to ni lahko. Ma ča j’ to za pravega zvončara, on bi lahko za na mesto armi i kakovu šesnu žensku na ramene cel dan nosil. Ki to ni bil videt ne zna kakovo je to raspoloženje. So selo se diverti, sen su vrata otprta i seh se rada prime va kuću, ponuti z presnacon, kroštulami, pijaton dobre repi…

A ako ste danas v Rukavce morda budete imeli i sreći i videli kega ki po staroj užance do naga gol merlin seje i zija dug, debel, dug, debel, dug, debel…

Video isječak objavljujemo uskoro, dok veliku fotogaleriju možete pogledati na ovom linku

Kompletna pusna galerija iz liburnijskog kraja može se vidjeti na ovom linku

M. K. / PodUčkun.net
Foto: David K. / Foto Luigi, PodUčkun.net

Ovo je arhivski članak. Stranice su u međuvremenu redizajnirane.

Kreni od početne stranice - Poduckun.net