DRAGOTU GERVAJSU (šezdeset let od kad je umrl)

admin 7 years ago Novosti

Urice su odzvonile šezdeset let od kad je umrl dragi poet

Drago Gervais (Opatija, 1904.- Sežana, 1957.) najveći je liburnijski i opatijski pjesnik. Rojen je 18. aprilja na Vrutkeh v Opatije, tu j’ kot otrok proživel srećni dani. Ma, brzo j’ zamračilo, kako j’ sam napisal va svojoj autobiografije, i se j’ to Prva svecka gvera zela. Veli svecki gospodari su se va toj gvere dogovorili i podelili mej sobun zemji a da niki ni niš pital ljudi ki onde bivaju. Tako j’ z Rapalsken ugovoron Opatija prišla pod Taliju. Za ten je more judi moralo poć ća, bežat preko meji na Sušak i pustit svoje kući, se ono ča njin je bilo na srce, njiho, teplo, najtepleje. Mej njimi, va noće kako tat, kako j’ kašneje napisal, bežal je i fantina Drago ki j’ onputa imel lih petnajst let. Familija Gervajs (kako tisto prezime zgovaraju stareji Opatijci ma i Gorani va Severine na Kupe – otkude su Gervaisi) živeje va siromašćine i veloj ubošćine. Prez sega svojga, a va Bakre su dobili i Svjedodžbu siromaštva. Nikada se već nisu vrnuli va svoju kuću na Vrutkeh.

Drago j’ finil gimnaziju na Sušake, a onda j’ študijal za albokata va Zagrebe. Onde je dofinil jedan del tega študija, a drugi je zištudijal va Ljubljane. Za ten, dela kot mlaji albokatski pripravnik va Crikvenice kade je 1929. leta, va svojen 25. lete živjenja objavil zbirku pjesam Čakavski stihovi. Onputa ti stihi nisu našli nekega velega puta do judi, ma do danaska su postali antologijski i štampani čuda puti, a va knjižarah i antikvrijateh se ne moru ni dobit, aš se zajedno rasprodaju. Gervajsovi čakavski stihi, kot ča su ovisti:

Pod Učkun kućice
bele,
miće, kot suzice
vele

danaska su del su našeh koreni i doti ku smo si skupa reditali.

Drago Gervais pokle živeje va Bjelovare, Zagrebe, a va Drugoj sveckoj gvere se j’ odselil va Beograd. Onde je bil va šegvite i se j’ družil z drugemi Primorci i Istrijani, kako ča je Ivan Matetić Ronjgov al’ Mate Balota. Kada j’ 1944. leta Beograd oslobojen, Gervais dela va Tanjuge, a po finjetku gveri je va šegvite va Ministarstve pomorstva. Na ten dele je premešten v Reku, i tako se j’, 1947. leta, pokle 19 let, vrnul finalmente va svoj zavičaj.

V Opatije biva va jednoj vile na Punta Kolovoj, ma ne va svojoj kuće. Va to vreme započel je pisat svoji dramski teksti, a 1949. leta je postal direhtor Drami teatra „Ivan Zajc“ v Reke. Napisal je 12 tragikomedij, a najpoznateja mu je Karolina Riječka. Bil je jako poznat i sagdere su ga jako štimali kot pjesnika i kot čoveka. Čuda je delal okol razvitka ovega našega kraja: bil je i predsednik Turističke zajednici, osnoval je Pododbor Matice hrvacke, pokrenul foj Riječka revija. Pisal je čakavske pjesmi, noveli, eseji, historijski teksti, prevodil je tuji libri, a smiron je pisal va Noven liste. Ma, najveć ga je štrukal reški teatar i se svoje forci je tamo pustil. O temu nan danaska svedoče njegovi Intendantski dnevniki ke je sam pisal, svojun zelenun tintun. Leta 1954. je postal intendant reškega teatra, i tako se je do kraja oprtil z brigun i nevojun. Va to vreme je pisal i scenariji za filmi ki su i snimljeni i bili jako popularni.

Drago j’ va tista, ne jako lahka vremena, otel da teatar, kultura budu moderni, da gredu va korak s modernen sveton na Zapade. I čuda se je boril za tako ča. Ma, to je veramente teško šlo. A Drago je zgubil svojo zdravje.

Na finjetke ivanjskega meseca 1957. leta, kada je Drago imel 53. leta, otputil se je va Sežanu na 50. letnjicu Akademskega društva „Balkan“ kemu je svojni pripadal kako študent va Ljubljane. Onde je bila vela proslava, i Drago j’ ostal prespat va hotele. Va noće, od 30. ivanjskega meseca na prvega jakovaljskega, nesrećno je pal z balkona va ten hotele. Čuda j’ štorij povedeno o temu, a i se neč neki špjega.

Ono ča j’ ostalo zapisano kako dokument je tisto da se j’ Drago grdo udril va glavu, pejali su ga va ljubljanski špital i onde j’ umrl. Oteli su ga ča prej vrnut v Opatiju, da umre va svojen rojenen meste ko j’ tako volel, ma, to ni bilo moguće va takoven njegoven stanje.

Sprogod je bil v Opatije 3. jakovaljskega meseca… Opatija je tri dani žalovala za svojen Dragoton… saka kuća j’ znesla črnu zastavu. Njihov Drago ki je vavek bil parićan za škerac, za sost na klavire, za žmuj vina, za domaćega čoveka.

Pokrenul je Opatijske ljetne priredbi, iniciral je da se stori ljetna pozornica. I čuda tega drugega.

Njegove pjesmi su večne, a i najmlaji ih jako štimaju. Na početke ovega teksta, va naslove smo porabili stihi još jednega velega opatijskega pjesnika, Zorana Kompanjeta ki j’ Dragotu napisal versi za 30. letnjicu njegove smrti. A, sada na kraje, dofinit ćemo ovisti spomen na 60. letnjicu otkako nas je napustil Poet Drago Gervajs, pjesmun ku je napisala mlada Petra Gržinić va 21. stoleće.

Moj kraj

Va mojen kraje,
Susedi se svajuju,
Ki j kade storil zidić,
I na čigoven terene,
Sme kantat ki tić.
   
Nonice pridu na mašu,
Mesto da Zdravo Marijo kantaju,
One o mićeh penzijah ćakulaju.
   
I da štoriju ča lepše finin;
Pod Učkun kućice bele…
Ma Gervais oprosti mi;
   
Pod Učkun apartmani beli,
Kot sama Učka veli,
Črne šahte, po keh auti kantaju,
I jedan veli buldožer,
Pul kega se cesti kopaju.

Napisala: doc.dr.sc. Vjekoslava Jurdana

Ovo je arhivski članak. Stranice su u međuvremenu redizajnirane.

Kreni od početne stranice - Poduckun.net