[SUSRETI] Luka Skorić - Pjesnik, planinar… i ambasador!

Luka Skorić

Luke ovo ni prvi libar, 2015. je objavil „Dihi i mrvice“, a njegova poezija i njegov čakavski haiku objavjeni su i va čuda zajedničkeh zbirki, ma anke va novinah i drugeh publikacijah.

Užanca je da saka divojka dobije dotu, a dotu ku su parićali mama i sin Jadranka i Luka Skorić dobili smo svi mi ki štimamo naše „ča“. Njihova zbirka poezije „Pustili smo van dotu“ va naklade Katedri čakavskega sabora Lovran predstavjena je publike va lovranskoj galerije „Laurus“ 15. aprila. Na žalost, gospa Jadranka nan tu dotu ni arivali sporučit, umrla je pred dve leta…

– Ovo je sada prva, jedina i jedinstvena knjiga va našoj liburnijskoj čakavštine va ku su posložene pjesmi materi i sina. Va prven dele knjigi, pod naslovon „Naručaj spomeni“, tiskane su pjesmi Jadranki Skorić, a va drugen dele, pod naslovon „Fortunal besed“, haiku-pjesmi posvećene moru, Luke Skorića. Ovo je njihova prva, jedina i zadnja zajednička zbirka pjesam – rekla je na prezentacije Cvjetana Miletić, urednica libra.

Luke ovo ni prvi libar, 2015. je objavil „Dihi i mrvice“, a njegova poezija i njegov čakavski haiku objavjeni su i va čuda zajedničkeh zbirki, ma anke va novinah i drugeh publikacijah. Za svoji versi dobil je više nagradi, a sve je zapravo počelo od nekakovega dečjega bunta:

– Još va osnovnoj škole san pisal rap pjesmi, a od tega se j' rodil i bend – Matafun. Z vremenun san počel pisat poeziju, najprej na hrvatsken standarde, a kad san – negde va srednjoj škole – z mamun počel hodit va Katedru čakavskega sabora Opatija, dežmetil san standard i počel pisat na čakavštine. Na priliku, ovaj haiku posvećen moru ki je objavjen va zadnjoj knjige, na stadarde ne bin mogal ni napisat. Duperal san stari noštromizmi i besede ke morda nanke stari judi tu okole ne poznaju, ako baš nisu delali „okol mora“. Uglavnon, mama mi je va ten vavek bila vela podrška, a tata Vanjo je na početke bil malo skeptičan, ma kad su mi počeli objavjevat pjesme, videl je da zrelejen kako pjesnik i da to se skupa nekamo gre – povedel nan je Luka.

I mama j' rano počela pisat, još kako divojka. Isto je na početke pisala na standarde, a na opatijskoj čakavice je počela pisat komać pred penziju. Luka škerca da je vavek moral bit mamin ambasador, aš da je bila sramežjiva, pa bi on recitiral njije pjesmi na Katedre i prijavjeval jih na natječaji, tako da je mama više put dobivala nagrade. Mami više ni, ma Luka je ostal njiji ambasador i poskrbel se da njije pjesme budu objavjene va libre skupa z njigovun novun serijun haiku pjesam. Ma zač baš haiku?

– Nisan prvi ki piše haiku – pisala ga je Cvjetana Miletić kako anke i naša doajenka Ivanka Glogović Klarić – ma san prvi ki se j' va ten baš profiliral. Neki reču da je haiku lahko napisat, da su to samo tri rige, da je to bedastoća. Ma, ja ti volin bedastoće! Haiku ima strogu formu od 5-7-5 slogi, ne sme bit va prven licu, mora bit precizan, jednostavan i sugestivan, zadnja rečenica mora bit udarna… Tako da ni to baš ni lahko i baš zato to volin – govori Luka.

Preciznost z haikua prenesal je i na kompoziciju „Fortunala besed“ – podejen je na osan ciklusi, ki predstavljaju osan strani sveta, a svaki ima po 12 haiku pjesam, ča simbolizira 12 ur va polovice dana. Sam je parićal naslovnicu knjigi, va knjige su litrati keh su fotografali on, njegov tata i Dorjano Baruca. Više njih su z vremena kad je, kako otrok, jedril va opatijsken jedriličarsken klube.

– Vremena su bila teška, parićeval se j' rat; barčice na keh smo jedrili su bile nikakove, ma je kumpanija bila odlična. Jedril san na jedinen optimiste ki je imel dve plave rigi na jedre, vidi se na slikah va knjige. Mama je s poneštri mogla videt jedino jedro z rigami, pa je znala da san na more. Uglavnon, nisan storil veleh rezultati va jedrenje…

Čuda prej leh je počel bordižat, s tatun je hodil planinarit, a to je jubav koj se j' vrnul pred malo više od deset let. Najprvo malo z ocun, za gušt, na manji usponi – do Leprinca, okol Učki… A kako ča je i njega njegov tata, tako je i on svojga sina Danilota počel zimat sobun va šumu.

– Trefil san Igora Eterovića i on me j' natental da finin planinarsku školu. Pokle tega san počel finjevat tečaji: alpinistički, za vodiča, za voditelja školi, sad san asistent instruktor vodičke komisije va Hrvatsken planinarsken saveze… Čuj, ili se školujen, ili drugeh vadin, pa ako ovako nastavin neću više bregi arivat videt od sega tega školovanja – škerca Luka i ameti da kad rabi „baterije napunit“ onda najraje gre planinarit z svojun kumpanijun, na neki zahtjevan uspon, kade ni signala od mobitela, ni judi…

Dela va pomorskoj agencije, piše pjesme, volontira va Planinarsken društve, aktivan je va Rodoslovnen centre Kastavštine i Liburnije i va alpinističken klube, a društveno je angažiran „na sto strani“. Pred dve leta dobil je i tri nagradi za najvolontera Opatije, Liburnije i volontera-koordinatora. A najveća sreća va sven je, govori, da žena Zdenka i sin Danilo imaju razumijevanja za sve te njegove „opsesije“! Aš Luka je takov: kad se nečesa ćapa – ne moluje!

Parićala Elena Vidović / List Opatija

Follow @PodUckun