[U OKU KAMERE] Ča beseda dvajset i četrti put pul Matuj
Autor: Portal Poduckun 04.07.2024
Kako je pasalo morete videt va nastavke...
Matulji - Va Hangare pul Matuj penzići su slavili domaće besede i Svjetski dan glazbe.
- Za saku čakavsku večer zakantamo na taj dan je bil i Svjetski dan glazbe. Najprvo je Bruna Šeškar je povedala od nonotove oštarije ku je držal pul Mučić, profesor Milovan Matetić je kot pravi profesor nan „školanon“ objasnil ča znači nest, nosit, znašat, prenašat, ponašat, ponosit, znosit. Nenad Smajila povedal je od nogometa „kada smo kot dica počeli teć za balu“. Nenad je igral balu od Kopra, Lovrana i Podmurvic do Krimeje. Sudac je Hrvatskega i slovenskega nogometnega saveza i puno let je sudil utakmice. Sudil je i na tri europska univerzitetska prvenstva utakmice za mali dvoranski nogomet, futsal. Želja mu je napisat knjigu z naslovon Od Kazarmete do Maksimira. Recitiral je pjesmu Kazarmeta, a ni zdola sela samo kazarmeta nego i igralište, istaknula je Sonja Vlah ispred organizatora .
Cvjetana Miletić i Silvana Milotić su nan predstavile svoje sastave, Cvjetana „Da moren vrnut“ i Silvana „Otac naš“ s kemi su va Vižinade dobile prvu nagradu.
- Vlasta Šepić se je više dan pripravljala za svoju „točku“, šila je, ušila, klobučić na glavu i obukla se kot prava malica z obdaništa. Recitirala nan je pjesmice keh se spameti još od opatijskega obdaništa. Dečina smo dok živemo. Orlando Hrvatin z sastavon „Pust je pasal, mačkare ustale“ „opral“ je se ki namesto domaćeh besed govore i pišu po stranjsku. Bojana Kancijanić je dofinila ovu lepu čakavsku večer z dve recitacije Bilo j`jako lepo i Fićo va konobe, a za njun opet Vlasta Šepić „prišla z obdaništa“ (leptiriću šareniću). Ni čudo da je pjevačon i sviračon i sakemu ki je ča povedal, pljeskalo seh osandeset ljudi va publike i načelnik Kinkela, se zna, kot i saki put. Drugi ki su čitali: Nadija Škerjanc – Stara vrata; Poneštrice spod skalini, Vlasta Šepić – Ča je život; Nevera, Klara Lazar – Leto; Nebo. Saka ova čakavska večer, Međunarodni dan materinskega jezika i Europski dan jezika ne pasa bez domaćega govora pa, da se zna, bilo je ovo od aprila 2018. leta dvajset i četrti put. Hvala našen Vesni Jandrijević i Brankotu Žiguliću ki su nan prnesli i pomogli okrunit pozornicu, kako se i pristoji - vidi se na slike, dodala je Vlah.
