[FOTO/VIDEO] Pusni četrtak Princip – Zvončarska prova jača od dažja
Autor: Nikola Cvjetović 12.02.2026
Pusni četrtak je dan ki čuva navadu, dan kada se sećaju oni ki su prvi put oprtili zvonci.
Matulji - Kada pusni dani gredu pomalo prema kraju, na red pride Pusni četrtak pul Princip – i tako je bilo i ovo leto. Unatoč dažju ki je celi dan padal, užanca je storena.
Ovo leto Pusni četrtak imel je i posebno značenje, aš se navršilo punih trijeset let od kada je nekoliko zvončari prvi put storilo provu za poć nosit zvonci z Mučićevi zvončari na Pusnu nedeju.
Ča je onda bila samo prova, kroz leta je preraslo va pravu užancu ka sako leto okupi više od trejset zvončari, muzikanti i maškare ke kampanaju za njimi.
Zvončari su i ovega Pusnega četrtka obukli stomanje na kvadri i huje brageše, stavili kožu i zvonci, obuli črne visoke postole, zeli baltu va ruku i, unatoč dažju, partili. Zvuk zvonci razlegal se je po seleh, a judi su ih dočekivali s toplinom, dobrin vojan i velin srcen, potvrđujući da užanca živi i da se neće zatrt.
Pusni četrtak je dan ki čuva navadu, dan kada se sećaju oni ki su prvi put oprtili zvonci.
Nakon partence pul Princip, zvončari su prošli kroz Brajani, Obadi, Mavrići, Božinići i Franići, a večer su se vrnul pul Princip, kade je bilo parićano za popit, zakantat i zatancat. Tako je još jedan Pusni četrtak zapisan va kroniku kot dokaz da se prava užanca drži i kad vreme ni po voje.
