J.O.Hrvatin: Vazam, pičenje jajc, žegnani vôganj (Brce), škrbutavka, žuca
Autor: Portal Poduckun 29.03.2024
U Lipu su par dan prvo Ulične nedilje kitice ulike donesle ženske z Bregi i Rukavca.
U sabotu, prvo Ulične nedilje, u Brce se je žegnalo uliku. Fagote zas šibami ulike su donesle za prodat Kastavke, kako su njin rekli, ma bile su morda Lovranke, ali Bodulke. Dobile su pešćicu fažola za šibu ulike i kakovo jajce. Ko je bila veća šiba je bila već draga, a unega ki je takovu jimil su držali za boljega gospodara.
Takov je rada jimil soje blago, pera ud ulike je pomišal zas senon i dodal malo soli pa je blago pojilo žegnanu (blagoslovljenu) uliku.
Z tu žegnanu šibu se je potlje zagnalo blago na pašu. Ni se je smilo zgubit, aš se je vervalo da bi se blago gubilo celo leto. Potlje paše se je šibu spravilo u štalu.
U Lipu su par dan prvo Ulične nedilje kitice ulike donesle ženske z Bregi i Rukavca. Milojki Božić je mama povidivala da je z Rukavca prihajala nika Francika z uliku i da je za to dobila šalicu fažola ali simena od kapuza. Uliku se je žegnalo u crikvu.
Žëgnani vôganj u Brce su uvako dobili: fanti Pepić Kovačov, Brce, ki je bil mežnar i žnjin Jože Kršanov, su užali nosit suhu gubu pobranu z drva, z Brc u Ješane rano ujutro, na Veliku sabotu, prvo Vazma. To je bilo okoli leta 1958. Šli su po putu zdola sela h štriki, pa u Brusan poli Rulje Lajkotove pod most, željeznički propust Šapljane i po putu čaz goru koj Dolenjci (Dolenje) reču Šušanj. Prišli su van poli njiv i ješevskega cimitra. Pred crikvu je bil uganj.
Gubu su dili h ognju, puhali sako malo da uganj ubastane i po isti puti prišli nazad u Brce. To je bil žëgnani vôganj (blagoslovljena vatra) kako su mu rekli. Nesli su ga i u saku hišu udlomili kuščić gube. Za to su dobili jajce. Zas tu gubu su seljani naložili uganj doma.
Dan prvo Vazma, na Vazmenu sabotu se je misilo sladak kruh (pogaču) i šišore. Jajca se je skuhalo u vodu zas čebulu pa su tako bila pofrbana. Okaca na jajce ud šišori se je storilo tako da se je sažgalo ječmik i tako sažganega se je dilo na jajce.
Šišor je pletenica, more bit veća, ali za dicu manja, zas friškin kokošjin jajcon na jedan kraj. Šišor je zgledal kako jedan pofašan utrok, glava mu je to jajce. Peklo se je do zapodne, a potlje se je u košaricu dilo pogače sladkega kruha, šišore, jajca,. kus prašćega pleća i mlad luk, pokrilo z tavijolon i u košarice neslo žegnat u u crikvu.
Bila je navada da se hitî doma z tu žëgnanu vazmenu hranu. Se zna da ženske ke držiju do tih starih navad dandanas ȁhtaju za prit prve doma.
Žegnani uganj su palili i Starojci pred crikvu Svetega Jožefa na Veliku sabotu. U crikvu je bila maša i žegnanje (blagoslov) pogač i jajc, a vani se je zelo u jenu laticu žrjavke (žeravice) i zaneslo doma. Kus žrjavke se je vrglo u uganj, a ugljen čuvalo za naprit proti uroki kada je grmilo i bliskalo, kada se je prpravljalo nevrime. Starojci šišoru reču kitica.
Za vrime ud Ulične nedilje do Vazma se je reklo Veliki ćedan.
Na dan Vazma na osan ur ujutro se je šlo na mašu. Vazmene maše su bile namenjene samo vazmenin navadan, ni se delalo mašu za mrtve, nikad.
Za kega pitat ko je bil u crikvu se je reklo: si bil poli maše? Prvo Vazma se ni ni ženilo, aš je bila korizma.
Kada se je porabilo jajca, škore ud jajc se je zmastilo i zaneslo u ograd i pomećalo natla okoli žira, češp, hrušav, jabuk, sliv, ali črišanj, ač da su žegnana pa da će bit dobar žir.
„U Pasjak poli Vrtoličinih na Vazmeni četrtak na devet ur ujutro je moja mama šla u kambru i zlila vodu zas sklede priko okna natla. Prvo nego poć gori mi je rekla da stojin pod oknon da me ta voda malo polije. Voda je bila žegnana, a zlilo se je je za blagoslov zdravlja ljudi, blaga i lìtine“.
Pičenje jajc: Na dan Vazma se je pred Dolinkinu hišu u Pasjak doneslo kuhana žegnana (blagoslovljena) jajca i čentežim (sitan metalni novčić) i pičilo jajca.
Prvo nego poć se je reklo ćemo, ali gremo (homo) píčit jajca. To je bilo tako: dica i fanti su dili saki donešeno jajce natla pred zid. Jedan za drugin su mećali ti čentežim u jajce. Čigov čentežim se je zapičil u jajce, je dobil. Navada je ubastala još za vrime Talije, potlje ne.
Za nedilju po za Vazmon se je reče Mali Vazam.
Povidali: Josip Sanković, Jože Kršanov, roj. 1950. Milojka Božić z Lipe roj.1947; Elza Cerin, už.Smajila, roj. 1936; Milan Surina, Kundin, roj. 1933. Pasjak. Slika: Hartulina poslana zas Pasjaka 7-4-1966, a šišor je lani spekla Nevia Rigutto u Stockholm, Švedska.
Škrbutavka
Na četrtak prvo Vazma kemu se reče Veliki četrtak zgon crikve zazgoni zadnji put prvo Vazma. Do Vazma crkveni zgoni zamučiju. Namesto zgonit, za poć u crikvu, nikadà se je seljane zvalo zas škrbutavku. Mežnar je namesto zgonit škrbutal po selu i s tin ljudon naznanil podne, ali da rabi poć u crikvu. „Mi smo kot dica zaz škrbutavkami na mesto zgona ubznanjali se uno ča su tribala zgona. U četrtak pod noć su zgona utihnila i nisu zvonila do nedilje u jutro za prvu mašu. Mi smo svi jimili mičkine ali kad smo prišli u Ješane pred crikvu su bile jene velike, ma kako karijola, pa kad je mežnar zavrtil se je čulo ja mislin i do Ciburice“, povidala je Adrijana Kundina. Navada je skupna za se kraje. Nan dici je dobro prišla za škrbutat po selu kada nan se je tilo, a i na pust.
Na pusnu smotru u Matulje, 2009. su Istrijani z mačkarane skupine Ćićki zgončari (Lanišće, Podgaće, Praproće) povidali da se u Podgaće reče škrštalica, a zametski zvončar mi je rekal da je to škrebetalnica. On je škrbutal žnju na smotru zvončari u Matulje (bila je sabota). U Vižinadu i Rakalj je frkečajka. U Labin u muzej su izloženi u staklo muzički instrumenti, ramonika batonka, roženice, vidalice i škrgetalnica. Prtisne se na baton pa se čuje zvuk instrumenta kega se zbere.
Župski gospari (Župa dubrovačka), ubučeni po gospocku, su bili pusna kumpanija u Viškovo, 2009. na smotru mačkar. Oni škrbutavki u Župu dubrovačku reču zvrčoka (rekal mi je njihov kapo, gospar Josip). Petar Skok, jezikoslovac, piše da se reče zvrčoka, aš da to oponaša zvrčka (čvrčka). U Gorski Kotar u Mrkopalj to je škrebetajka.
U Portorož je raglja, a po slovensku je i ropotulja. U Rupu se reče škrtalica, u Starod škrtalo, a u Pasjak škrbutavka, ali škrbutalka. Na izlet, u Prag, san pital jenega Čeha ki je prodaval žehtačku, je rekal. Piše se řehtačka. To je po hrvatsku čegrtaljka, a i klepetaljka.
Dario Brajan z Jušići jih je bil delal, pa san si je bil kupil ud njega kot spomin na cajte kada smo škrbutali po selu.
Žuca vazmena jidača
U sabotu prvo Vazma se je delalo žucu. Kuhalo se je u velik lonac ud pet, ali već litar, po temu koliko će bit pijati, ali ljudi ki ćeju jist. U lonac ud pet litar se je dilo četire prašće noge, ušesa i trubac, par rižnji česna, soli po ukusu i par zrn papra, a vode do vrha lonca. Rep se ni divalo, su ga pojili prvo, za pust, kuhan z ripu.
Meso ni smilo jimit prašćih dlak, pa se jih je zapalilo, ali ća postrgalo. Za tin se je so meso upralo pa pustilo da se moči dan i pol najmanje, pa po dva, ali tri dni. Ko je veći lonac mora bit vode 5-6 litar. Rabi dodat par perc javorike ku se je prekuralo z Upatije aš ovde je ni bilo. Danas je je. Kuhalo se je, tako, ud osme ure. ujutro do četire zapodne, najmanje osan ur. Za une ki su raje jili manje masno se je znelo mast po vrhu lonca i se je pobralo ća. Žuca je skuhana kada meso pride mehko, kada je svo raskuhano, da se lahko odvaja ud kosti. S tega lonca je prišlo žuce za sedan pijati, unih starinskih, dimbokih.
U saki pijat se je dilo mesa da je posud jednako. Jeni su u pijat u žucu dili kuščiće zrezanih kuhanih jajc. Zaneslo se je hladit u mrzlu kambru, ali na okna, da se strdi. Kambre se nisu grile pa je u saku bilo mrzlo.
Šerviralo se je na Vazam za južinu. Ni se jilo samo to, nego i pečenega jarića, kuhano pleće, luk i obavezno sladak kruh kemu se je još reklo pogača. Za povidat je i to da su luk nosile Marija Krašovka i potlje nje Kastavke i da se je ud njih kupivalo. Danas se luk posadi u soj vrt. Žuca se ni delala samo za Vazam, ma za ti dan je bila obavezna vazmena jidača.
Žucu se je storilo i ekstra ki je je til jist pa se je dilo po dvi suhe prašće noge, kus prašćega trupca i jeno ušeso pa je bilo za Vazam i za potlje. Povidale Irma i Elza Vrtoličine.
Zapisi su z knjige “Naši ljudi i navade”.
Autor: J. O. Hrvatin
