[RAZGOVOR] Ines Kinkela ima „Zlatne ruke“
Autor: Elena Vidović 30.10.2023
Ta nagrada je va restoran Kinkela va Bregeh prišla kako kruna na 111 let dugu oštarsku tradiciju: miću oštariju na ten meste otprl je njiji nono Vice z ženun Milun još 1911. leta.
Početkun jula, na svečanoj Akademije Hrvatske obrtničke komori va Zagrebe Ines Kinkela dobila j' najvišo priznanje ko se od Hrvatske obrtničke komori more dobit – Statuu „Zlatne ruke“ s poveljom.
Ta nagrada je va restoran Kinkela va Bregeh prišla kako kruna na 111 let dugu oštarsku tradiciju: miću oštariju na ten meste otprl je njiji nono Vice z ženun Milun još 1911. leta. Delo je 1962. leta prezel njiji otac Miloš, ki je z ženun Ankicun oštariju proširil i vodil puneh dvajset let, se do 1982. leta, kada je delo prezela gospa Ines. Kako ča je to pul njih užanca, i dan-danaska va restorane dela skoro cela familija – tu je još i njiji muž Franjo, sestra Mirjana, kunjado, nepute, zeti, a čini se da i najmlaje članice familije, miće unučice od sedan i četire leta, već pokažuju interes za „zabadat se po kuhinje“.
Gospa Ines je va ten dele čuda let: već kako mića otročica imela je priliku „speć zanat“ učeć od nonići i roditelji, praveh, iskusneh oštari. S kakoveh desetak let „delala“ je va oštarije, a nono Vice i tata Miloš vavek su našli neko delo s ken je mića Ines mogla pomoć – postavit beštek na stol, namestit katridi, zanest kakovu salatu do stola i još tako ča. Ono ča je najvažneje je da su njoj prenesli jubav prema ugostiteljstvu i prema delu z judi, pa je Ines upisala i finila opatijsku ugostiteljsku školu i odlučila nastavit karijeru va dele kega su nono i tata tolike leta prej gradili.
Restoran „Kinkela“ je mesto kade je čuda opatijskeh familij proslavilo krstitki, bermi, piri, letnjice… I to po nekoliko generacij z iste familije! Ovdeka se organiziraju fešti, pusni tanci, sportski turniri, koncerti – va par besed: ovo se j' mesto „utkalo“ va užanci našega kraja. Mejten, „tradicija“ se ne vidi samo va ten, leh i va hrane ku ovdeka nude: domaća hrana parićana po domaćeh recepteh.
– Ono ča nan je jako važno je da se gosti ki prihajaju pul nas osjećaju kako doma. Takova je i atmosfera va restorane, domaća, a i parićujemo uglavnon domaću hranu. Neki od našeh „glavneh“ specijaliteti su prava starinska maneštra od bobići, teletina pod črepnjun, njoki, fuži ili pak teleća koljenica, ku se najviše i išće. Najboja potvrda naše kvaliteti su nan gosti ki se stalno vrnjaju i to nas jako veseli. Vikendi nan užaju bit i po mesec dan unapred bukirani, rekla nan je gospa Ines i dodala kako njin je ova turistička sezona bila jako dobra, a najviše gosti da j' bilo z Njemačke, Danske i Engleske.
Mejten, ni to bil jedini razlog zač je ova vela nagrada finila baš v rukah gospoj Ines. Magar veći del dana pasa va restorane, vremena najde i za angažman va cehe ugostitelji Udruženja obrtnika Opatija, Matulji, Lovran i Mošćenička Draga i va Obrtničkoj komore Primorsko-goranske županije. Već puneh dvajset let provodi majstorski ispiti za novi ugostitelji: va četrten je mandate Predsjednica ispitne komisije za provedbu majstorskeh ispiti za konobari i va trećen mandate Predsjednica za ispitnu komisiju za natkonobara. Poznata je po ten da rado prenaša znanje drugen, pogotovo mlajemi ki komać počinju delat va ovoj branše. Bila je del projekta „Obrt – put do uspjeha“ na ken su se školanon ki finjuju osnovnu školu prezentirali si obrti, da bi jih se zainteresiralo za zanati i artižansko delo. Rado se odazove na saku tradicionalnu feštu kade trebe storit kakov „cooking show“, pa je tako lane na Viliju Božju pul Matuj z personalon restorana parićala 500 porcij rižota. Bila je vavek angažirana i va lokalneh festivaleh ki promoviraju domaće užanci i kuhinju, kako ča je na priliku bila „Cesta domaće hrani“. Uglavnon, dan njoj je vavek prekratak za se ča bi volela arivat storit.
„Zlatne ruke“ nisu prva nagrada ku je Ines dobila: samo va zadnjeh par let Obrtnička komora PGŽ-a nagradila ju je z nagradun „Životno djelo“, a na Bale obrtnika va Kristalnoj dvorane hotela Kvarner ovo leto prijela je nagradu „Dijamantni obrt“ za obrt ki dura više od 100 let.
– Ono ča nan je najvažneje su naši gosti. Bacelamo okol sake sitnici da bi naši gosti bili zadovojni. Da ni njih, ne bi bilo ni restorana, ni 111 let tradicije, a ni oveh nagradi. Ovo je velo priznanje celoj našoj familije, veseli nas ča je sav naš trud prepoznat ne samo na lokalnoj ili županijskoj, nego i na državnoj razine. Mislin da je ovo i velo priznanje za celi naš kraj i na to san posebno ponosna. Čuda judi nan se j' javilo i prišlo čestitat. Kad vidiš da se judi istinski vesele našemu uspjehu onda znaš da ono ča delaš – delaš dobro!, zaključila je gospa Ines.
Elena Vidović / List Opatija
