[RAZGOVOR] Marijo Pošćić: Delo poštara je nekad bilo lepše!
Autor: Elena Vidović 29.09.2023
Delo poštara je postalo fizički i psihički naporno, a čovek kad napuni neko leto, mora mislet na svoje zdravje! – govori nan Marijo i špjeguje kako je nekad delo poštara bilo lepše leh ča j' danas.
Ma ča ni premlad za poć va penziju?“ – komentar je kega se j' pred jedno tri meseca, kada je opatijski poštar Marijo Pošćić šal va penziju, moglo čut od sveh stran. Kako odgovor na to pitanje reklo bi se da i je i ni „zrel za penziju“: ima 62 leta, a staža mu se j' nabralo… Deset let je delal va 3. maje v Reke, a zajno za ten je skoro tri leta delal na kruzereh. Onput je bil šest meseci va Amerike, a ako dodamo i oneh par meseci ča je još raneje delal z barbun va Australije – Marijo se j' i sveta nagledal. Mejten, nakon Ameriki, on i žena Ljiljana odlučili su se vrnut doma v Opatiju. Tu je dobil delo va pošte, a od onda je pasalo 26 let.
– Nažalost, nisan se svemi arival javit i reć njin da gren va penziju, pa bin njin rad ovako sporučit da sven želin sve najboje: puno mira, sreći i zdravja! Čuda je drageh judi va „mojen rajone“, a z leti san se sprijateljil z jako puno njih. Vavek san gledal juden poć na ruku i pomoć kad san mogal. Mejten, bilo je vreme za poć va penziju! Delo poštara je postalo fizički i psihički naporno, a čovek kad napuni neko leto, mora mislet na svoje zdravje! – govori nan Marijo i špjeguje kako je nekad delo poštara bilo lepše leh ča j' danas:
– Nekad si znal kad će bit navala, pa kad si rešil penzije i računi, mogal si ostatak meseca normalno delat. Danaska je „navala“ stalno. Poštari je manje, rajoni su veći, dela je više, plaće su manje. Zadnjeh par let san počinjal delat na 5 ur jutro (aš smo dostavljali novine), dostavljaš paketi, pa onda postoje paketi ki moraš isti dan dostavit, bez obzira ki del rajona ti je na rasporede za dostavu taj dan, sami sortiramo poštu, sami unosimo va sustav... Još ako je ki na godišnjen ili na bolovanju, moraš del njihovega dela prezet. Bez obzira ča danas postoje i sortirnice i sve neč je automatizirano, poštar danas ima čuda više dela leh nekada!
Ma veramente, nikad ovo ni bilo lahko delo: sunce, teplina, daž, jugo, bura, sneg ili led – nema veze kakovo je vreme, poštini su okole i raznašaju poštu. Danas na motorineh, a nekad hodeć. Mejten, Marijo govori da se j' navadil i da mu to nikad jako ni pačilo, leh da vjerojatno pofin tega danaska ima odličan imunitet, aš da je na svakakovi uvjeti navajan. Na dele je „nabil“ i dobru kondiciju:
– Delal san na kruzereh kade se dela po 12 ur na dan i kade nikad ni dosta vremena. Sve se dela brzo, pa san navajan tako delat. Gledaš ča više storit va dane. Jedanput san kolege pokaževal rajon i dok smo bili na Kosoven, mi je rekal da neka malo usporin, aš me ni mogal pratit. Treba poć na peti kat dostavit preporuku, a ni va sandučići ni lahko slagat kad jih je 40 za jednu zgradu. Volin bit efikasan, a kako san dugo bil va oven rajone, poznal san ga kako svoj žep, pa mi je bilo lahko organizirat se – poveda Marijo. Kako da daž ili teplina nisu dosti, tu su još i pasi ki retko kada vole poštari. Marijo veruje da je to zato aš pasi oćute kad se neki boji, pa agresivno reagiraju. Magari voli blago, i sam ima doma maštrunjku Bellu, se skupa osan puti je kapitalo da ga pas uji:
– To je bilo prej, sad va ovo zadnje vreme se to više ni dogajalo – pasi su me već poznali! Kolega mi se j' čudil kad me j' videl da gladin pasa kroz ogradu. Uglavnon, nijedanput mi se ni dogodilo da me j' pas odspreda ujil, vavek čekaju da pasaš, pa te ćapaju odzada za nogu! Gledaj, pasi nisu niš prema drugemu ča ti kapita na ovakoven dele! Jedanput san bil na zamjene va Lovrane i dostavljan va neku kuću ka nima sandučić na ceste. Opren portun, pasan zad kući, a tamo leži – puma! Da znaš da mi ni bilo sejeno! Na su sreću, gazdarica je brzo prišla!
Za delo poštara govori da se j' jako promenilo kroz sva ta leta i misli da je delo prej bilo puno boje organizirano. Danaska je čuda više paketi, ali najveći problem je va samen sustave. Slabe plaće, malo sluha z vrha i loša organizacija va poduzeću samo su neki od problemi.
To je sve sada zad njega i sav pun energije i pozitivi poveda kako je uredil apartman v Opatije i počel ga od ove sezoni afitevat. Va Krasnen ima za uredit vikendicu, a kako sve zna i voli sam delat, sigurno mu neće štufno bit. Tu su i dva sina, Matteo i Marko ki će „dat ruku“ kad bude rabilo. Matteo je tišjar – pomogal je Marijotu z apartmanun, a i va noven „projekte“ će tata to sigurno dobro znat iskoristit. Na sve to trebe reć i da je 9. setembra Marijo postal nono mićemu Mateju, pa ča još rabi reć? Znate već: va penzije će imet više dela leh prej!
Piše i litrata Elena Vidović / List Opatija
