[RAZGOVOR] Sanja Albaneže - Rojena za bit meštrica
Autor: Elena Vidović 30.04.2024
Govoreć šnjun, čoveku je zajno ćaro da je rojena za bit meštrica! Za svoji školani govori z čuda jubavi, a ideji za novi projekti ki bi šnjimi mogla storit, prihajaju same od sebe…
Na početke ovega školskega leta prvašići z opatijskeh školi dobili su slikovnicu na čakavsken zajike „Đir po Kvarnere“, ku je napisala meštrica va leprinačkoj područnoj škole Sanja Albaneže. Sanjini versi su dečicu na prvi dan školi pejali z Lovrana v Iku i Ičići, preko Pojan i Leprinca zdolun, v Opatiju i Volosko, pa v Reku i nazada va Lovran. A Medveju, Kraj, Dragu Mošćeničku, Brseč i Mošćenice, kako govore versi, da će ben obać…
– Od same ideji do realizaciji je pasalo valda skoro dvajset let. Otela san na ten projekte okupit si moji prijatelji-kreativci: od ilustratori, preko grafičkeh urednici do glazbeneh suradnici; se su to moji dobri prijateli. Ruku na srce, to je za me najveća vrednost celega tega projekta, da smo delali si skupa, kako jena familja, rekla nan je Sanja. A splatilo se j' čekat, aš je ta slikovnica ispala pravo remek-djelo: ilustrirali su ju Saša Jantolek, Boris Kačić, Darija Žmak Kunić, Delfina Trajčeva, Melita Sorola Staničić i školani z leprinačke školi, pa – oprta na bilo koj stranice – more poslužit i kako najlepši kvadar na zide. Govori da j' pjesmi počela pisat „za potrebu“, kad su njoj rabile pjesmice za njiji školani, a onda je počela i „ozbiljno“ pisat. Dobila je i posebnu nagradu Veleposlanstva Japana za – čakavski haiku!
Govoreć šnjun, čoveku je zajno ćaro da je rojena za bit meštrica! Za svoji školani govori z čuda jubavi, a ideji za novi projekti ki bi šnjimi mogla storit, prihajaju same od sebe…
– Moja mama je od mićega otela bit meštrica, mejten ni mogla poć na studij, aš su to bila vremena kad je trebalo delat! Od vavek je volela delat z judi i z decun i bila je aktivna na se strani, pa tako i va izviđačeh i tako san va izviđači prišla i ja. Va to vreme je va izviđačeh bilo i jedno pet-šest učiteljic, ke su nan postale prijatelice i one su jako utjecale na me. Va izviđačeh je se počelo: morda san imela 10 ili 11 let, kad san manju decu vadila crtat, kantat i se neč drugo. Znači, kako otrok san volela podučavat!, spamećuje se Sanja. Prvo delo njoj je bilo va škole va Vrhe, zgora Buzeta, pokle va škole va Brseče, pa va Dobreće, onda va opatijskoj škole, a vaje za ten je z matične školi v Opatije pasala delat va Leprinac, kade dela sada već skoro 20 let. Magari neken učiteljun mića škola i mićo mesto ne bi bili prvi izbor, naša uči Sanja je oduševljena. Poveda nan ča su parićali za Markovu, kako nedeju gredu na izlet na Korita, ča parićuju za LaFestivu… Njijen školanun ne more bit štufno!
Puna života i idej, va isto vreme je i veli zagovornik domaće besedi, pa se čuda Sanjineh projekti vrti okol našega dragega „ča“. Jedan od većeh projekti je „Mularija“, online emisija za decu na čakavsken.
Sanja Albaneže: da moran sve spočetka, opet bin zibrala bit meštrica va škole! – Moja draga kolegica Marina Mavrinac Matulja je za vreme pandemiji snimala videi z otrokun i stavljala jih na Facebook i YouTube. Va sakoj „epizode“ je špjegala neku domaću besedu, a jušto negde kad je pandemija finila, Nikola Cvjetović je za Novinet.TV iskal ideju za emisiju za decu na čakavsken. Nakon ča san se čula šnjin, pozvala san kolegice i plan je bil da Marina nastavi špjegevat domaće besede, ja da storin „Škatulicu“, ča je bil intervju z gostun, a pridružila nan se j' i kolegica Tatjana Bonazza Čekada ka je bila zadužena za smešice i igrokazi. Snimili smo 36 epizodi i nisu nas gledala samo deca, imeli smo publiku, ča bi se reklo, od 7 do 77 let. Od tega su se pokle rodile „ČAraoke“: dugo vremena san imela ideju da storimo neč kade će deca više bit va prven plane, kade će nastupat… I tako, kad mi je Čarli (Darko Čargonja) na „Proljeću u Ronjgima“ spomenul da bi trebalo storit neč kako ča j' bil MIKić i kad se j' semu temu pridružila naša fenomenalna Natalija Banov, rodile su se ČAraoke, povedela nan je Sanja. A kako da ni dosta ča piše poeziju i dela va škole, Sanja je veli pobornik ekološkeh idej: va „Žmerge“ je od samega početka, koordinator je Mreže škola Parka prirode Učka, a va politike je isto aktivna, vavek za „zeleni“. Magari je bivala „na par metar“ od mora va Lovrane, govori da je čuda više vezana za Učku, pa je zato z Lovrana preselila va Lupoglav, kade si j' kupila i uredila miću vahtaricu, staru željezničku kućicu. I to su ta Sanjina „tri L“ okol Učki, keh obožava: Lovran, Leprinac i Lupoglav. Jako voli kuhat, bila je na „Večeri za 5“, držala je predavanja od zdrave hrani, finila je i za sommeliera. A kakovi su njoj plani za daje?
– Prišlo je vreme da malo „zabrenzan“. Si projekti, kako ča su Mularija ili ČAraoke su va dobreh rukah, prezele su jih moje kolegice, a ja ću vavek bit tu ako rabi ča pomoć. Već se čuda vreme parićujen izdat zbirku poezije i na to bin se sad rada skoncentrirat i dofinit. H temu, sin mi se ženi, a biva va Londone; još mi je i h neveste poć, na Mauricijus!
Uglazbljeni „Đir po Kvarnere“ va izvedbe Lovranskeh črešnjic poslušajte ovdeka:
VIDEO
Litratal: Nikola Turina
