[RAZGOVOR] Vladimir Gudac – poveznica zmej žirafi i javoriki

Vladimir Gudac, foto: David Kurti

Doc. art. Vladimir Gudac rojen je v Opatije 1951. leta. Tu je finil osnovnu školu, a reče da j' od mićega znal da će mu umjetnost jenega dana postat delo.

Ste čuli kad za štoriju „Erste Giraffe in Wien“ (Prva žirafa va Beče)? Kada je va bečki Schönbrunn 1828. leta prišla prva žirafa – celi Beč je pal va delirij! Od žirafi su pisale se novini, slikari su ju crtali, poeti su o njoj pisali pjesmi, serviralo se j' kafe à la giraffe, va modu je prišla roba z uzorkun žirafi. A ono ča pul nas nigde ni dokumentirano je to da j' to brižno blago z Egipta do Beča prišlo preko – Reki. Zaspravje j' za čudit se da nigde niki ni zapisal da j' va rečken porte skrcano nekakovo posebno blago, visoko četiri metra. Ča je najboje – do Karlovca je prišla hodeć – moral ju je neki videt! Ta je informacija ostala „tajna“ se dok ju vanka ni zikopal naš Opatijac Vladimir Gudac i od tega storil predavanje i izložbu sredinun otobra va Varaždine (aš je žirafa na pute do Beča pasala i kroz Varaždin). Vladimir Gudac takove stvari zna nać, a ono va čen je pravi maher je prenest jih drugemi – kroz predavanje ale još boje koristeć kakov pinel, kolaž, litrat, krbun, kakovu instalaciju, performans ili bilo ki drugi način umjetničkega izražavanja.

Doc. art. Vladimir Gudac rojen je v Opatije 1951. leta. Tu je finil osnovnu školu, a reče da j' od mićega znal da će mu umjetnost jenega dana postat delo:

– Niš me drugo ni interesiralo. Je, nogomet me j' zanimal, se dok na jednoj utakmice moj brat Jerko ni zlomil nogu i finil va gipse, pa je mama rekla „Z nogometun ste finili“! Uglavnon, rasal san mej pineli i piturun, aš je tata bil pismoslikar. Ulazi va hotel su va to vreme bili bogato dekorirani, neki je to trebal održavat. Reklami i plakati se j' na ruki pisalo i crtalo, tako da smo doma imeli škatuli z bojami, pinelići, štance… Mane je to bil jedan poseban svet!

Folium lauri perforatum: „Judi moji, stvarno nan se ne piše dobro“

Školu primijenjenih umjetnosti va Zagrebe upisal je 1965. leta, leto dan pokle one strašne poplavi va Zagrebe. Govori da je to bil surov grad, mižerija na saken korake, kuće markirane za rušit i ono ča takovu vrstu mižerije prati – kriminal:

– To je bil opasan grad dobre dve leta pokle poplavi. Jedanput su me pokrali na sred cesti! Dva tipa su me ćapala, po sred belega dana, i ukrali su mi uru! Takov je to bil grad, šal si na tanac, a već su se na ulaze peštali… Nisan tip za potuć se, pa mi Zagreb z teh let ni ostal va lepeh uspomenah.

Govori da je odvavek bil odličan va škole, a va Zagrebe je studiral i finil povijest umjetnosti i književnosti. Z finjenen fakultetun, bil je vanjski suradnik va galerije Studentskega centra, surađival je z novinami, radijun i televizijun, od 1980. postal je i direktor te galeriji. Devedeseteh je bil na ratište, a od jeseni 1993. je bil profesor va škole (va ku je i sam hodil), sve do 2006. leta, kad se j' v Reke osnovala Akademija primijenjenih umjetnosti i on je tu prišal predavat. Tu je stekal i zvanje docenta umjetnosti.

Virtualno je nemoguće pobrojit se izložbi na keh je partečipal, a nanke nećemo provat opiševat njegov izuzetno bogat umjetnički opus. Govoreć š njin, va jednen ste momente na terase hotela Zagreb 1962. leta na koncerte „Bijelih strijela“, a va drugen birate ako će Marina Abramovič ili Ida Biard bit del jugoslavenske selekcije na Biennalu mladih va Parize 1975. leta ili pak delate intervju z Josephun Beuysun. Kako jedna enciklopedija, Gudac je nepresušan izvor informacij od stare Opatiji, svjetskeh umjetniki, filma – ma, česa god ćete!

Danaska je OPG (kako mu i piše na puntape na prseh) – Opatijski Penzioner Gudac, magari s povremenun adresun va Ljubljane. Ma neka vas ono „penzioner“ ne prevari. Gudac i daje dela, tehniku ne zbira (magari škerca da mu je od seh tehnik, kako penzioneru, najdraža tehnika disanja), a inspiraciju najde va sačeren. Osin već spomenute žirafi, to more bit mačak, Teslin patliđan, kokoša bez jedne nogi, Janko Polić Kamov (… ) ili javorika. Ma on javoriku ne vidi jednako kako i mi. On vidi da ju je nagrizal štetnik i saki taj „ugriz“ njemu predstavlja slovo ko se slaže va poruku „judi moji, stvarno nan se ne piše dobro“! Zato i reče da je OPG bio-orijentiran, a „sva mu je djelatnost usmjerena ka neodrživom razvoju“, aš da z ovakoven ponašanjen čovječanstvo neće dugo…

Za vreme koroni je nacrtal 120 crteži tehnikun krbuna. Ne slučajno, leh zato ča se krbun dela tako da se drevo pali bez prisutnosti kisika, baš kako ča va to vreme ni mi „nismo smeli nanke dihat“. A ni slučajno ni to da je 60 teh crteži izložil na izložbe pred leto dan va Labine, poznaten po rudnikeh krbuna… Pul Gudca niš ni slučajno, se je jako dobro promišljeno, a sada momentalno promišlja o Barcelone kamo gre na kraj ovega meseca realizirat jedan projekt za Hrvatsku televiziju. Ki zna, morda se Opatijcon posreći, pa promisli i o nekoj izložbe v Opatije…

Follow @PodUckun