IN MEMORIAM LUČANO SALETNIK (1931.-2026.)
Autor: Portal Poduckun 12.02.2026
Lučano SaletnikNeka ovo bude jedan spomen onen ki su ga poznali, a oni ki nisu neka znaju kakovega velega koršadora smo imeli.
Matulji - Potiho i skromno, jušto kako je i živel i on i njiha cela familija napustil nas je Lučano Saletnik. Današnje generacije to ni ne znaju kakov šampion je to bil, a da mu Matulji nikad ama baš NIKAD nisu odali nikakovo priznanje za si rezultati ki je postigal.
Ki je kriv? SI smo krivi, i mi ki smo to znali, a nismo potaknuli, a malo i on sam aš je bil preskroman i ni se nikad otel isticat i nametat kako neki ki su sami sebe predložili da jih općina nagradi za tobožnjo "životno" djelo ko ni ni do kičice i ne more se merit z onen ča j Lučano storil i postigal va svojen živjenje ko, Bogu hvala ni bilo kratko, ma ni bilo vavek ni lahko ni slatko.
Lučano j bil najstareji sin od isto tako velega šampiona Danteta Saletnika ki je bil automobilistički as i ki je pul Matuj imel mehaničarsku radionu va koj su se za ondašnjo vreme čudesa delala. Vreme j bilo takovo da su mu država i drugovi nacionalizirali radionu ma je i naprvo ostala "jezgra" budućeh majstori mehaničari i ne samo to. Matujski AMD potekal je z njihe radioni. Si ki su imeli motori (auto j malo ki imel, skoro niki) skupjali su se va njihoj radione kade su se ti motori popravjali i to BEZ REZERVNEH KUSI keh va to vreme ni ni bilo. Lučano se j počel z motoron takmičit 1947. z nepuneh 16 let. Va to vreme vozili su se gimkani i speedway i Lučano je pokazal izvanredan talent.
Prvi put je postal prvak Jugoslavije 1954. leta i to va kategorije 500 ccm, a osvojil ju je va Preluke. Titulu prvaka Jugoslavije osvaja opet 1957. kada pobjeđuje puno poznateji asi. Štorije od teh pobjedi su fascinantne, a objavit ćemo jih ovi dni aš su zaspraven interesantne. Nakon šampionske karijeri nastavja delat kot mehaničar i si malo stareji te znat da j bil "duhtor" za FIAT-i. Sin Dario se j istaknul kot pustolovac z terencon. Neka ovo bude jedan spomen onen ki su ga poznali, a oni ki nisu neka znaju kakovega velega koršadora smo imeli. Za sada ću samo najavit da ćemo još se neč napisat. Zadnji put kad smo ćakulali pred par meseci pozdravil san ga: "Boh i vidimo se."! Rekal mi je onako malo kroz nos kako j govoril:"Ma, ne znan ši ni ne!" Neka mu j lahka matujska zemja na koj je pustil veli trag, a ki mu nikada ni priznat i ki nismo znali poštimat.
Alfred Šaina / PodUčkun.net
