FOTO: MIK 2010 – Gran finale na Zamete

mikrijeka_sm MIK inside…
Kratki osvrt i priče sa svih festivalskih večeri ovogodišnjeg MIK-a…
Za Liburnija.net piše, fotografira, komentira i svira, zadnji put za ovo leto, David Kurti….
Nećete verovat, MIK je finil! I to kako – jušto kako je Mario predvidel, kako dvoransko prvenstvo. Finale se’j storil va dvorane na Zamete. Vela dvoraničina, tri i pol hiljad gosti stane nutre.

Liburnija.net: Karin Kuljanić i portun za Trsatske stube

A okole su storili parking, kafići, butigu i pravu domaću pečenjaru z čevapima, pul Fadila (ili tako neč). Intanto, i Reka ima (još jednu) dvoranu. Zato je predsjednik opatijskega vijeća O’ Brien škical malo kako je to storeno, aš od sakega se da naučit ča – i od dobrega, i od lošega. Inače, on je prišal tamo pozdravit seh va sale, na radije i na televizije i povedet kakov je bil MIK va Opatije. Pa lep je bil, da ča!
Opatije fali takoveh koncerti, aš neki Opatijci vidiš samo jedanputa na leto, kada se spuste na MIK al kakovu ribarsku (videt je to moguće da je v’Opatije ribarska). Bilo tega još više!
V Reke smo bili dva dani. Prvi dan je bila generalna prova zbog televizije. Prišli su vaje z Zagreba nas seh poslišat i za provu posnimat da nan ne bi falila glava al nogi na prenose.To je se razjadilo gospu Bobuš, da ki je videl toliko čekat da se razmeste. To bi bilo finilo na regionalno Reka – Zagreb svajevanje, dok ni videla da pol njih žbali va televiziju i čeka će ispast Urugvaj al Južna Koreja. Ne navijaju ni za jenega, ma su se sejno sekirali. Morda više od gospe Bobuš. Drugo leto ni nogometa pa će se poć brže i lagje.
Zato ča je bila prova i se se namešćalo ni se slikalo da Van bude iznenađenje kad vidite na TV-u kako je parićana bina. Moji z glazbe su rekli da je ona druga kućica od leve strani sigurno lovranska, pravi omaggio Staremu gradu i Lovrancon. Z druge strani je bil dolnji portun za Trsatske stubi, a onude je bilo preveć za hodit zgorun pa ni se onude šlo.

Liburnija.net: kroz ovo ne pasa saki - špalir od instrumenti

A finalna večer je bila pravi bonbon. Si su bili dodatno ušminkani, zivukli su se i novi veštidi, stavilo se extra rožic, pa i grlo od šterne. Pravi domaći štimung, samo je falil jedan jog odzada i ekipica da zbija balini pa da ki parti va orkestar. Si pjevači su dali se od sebe, a publike vero ni bilo lahko.
Kanconi su se lepe pa zibrat baš onistu ka će dobit ih je stavilo va veli problem. Ustavri, pravi problem počne kad ti glasi rabi zbrojit. Zad bine je kabal judi kemi je delo dat vanka listići (njih petsto), zet ih nazad, pobrojit, napisat rezultati i se to hitit na kartu i dat vanka na vreme. Na vrateh njin piše Press, ma to je više bilo prešš. I pokla sega tega, delale su bilten ča se delalo tisti dan i ča čeka karavanu drugi dan. Saka njin čast i pozdravi. Kako se zove ona serija: Odmori se, zaslužio si…
A kako je MIK finil, neću Van reć. Ako Vas to sekira, zamite novinu i pročitajte si sami. Ča se mane tiče, si su dobili prvo mesto! Aš će saka od njih dvajset se nać prvo ili kašneje va nekoj ekipice ka će ju z gušton zakantat, vrtet će se na radije va programe i na top-listah i nać put preko Vašega uha do srca.
Do drugega MIK-a (ako nas ki bude zval sost), srdačno Vaš
David K. z Lovranske glazbe