FOTO: MIK vs. Bakarska vodica

mikbakar_smMIK inside…
Kratki osvrt i priče sa svih festivalskih večeri ovogodišnjeg MIK-a…
Za Liburnija.net piše, fotografira, komentira i svira David Kurti….
Ako saki dan prihajate na www.liburnija.net morda ste videli da j’ današnji report z MIKa malo kašneje prišal na web. To je zato aš je danaska dan od počivanja. Zadnjeh pet dan smo nabijali kilometražu i podočnjaki pa je šef karavane, šinjor Baša odredil dan odmora za MIKići i MIKice. A i potrefil je šetimanu kada su dva blagdani pa se ne mora delat, pa se koliko-toliko čovek refa od silnega dela. Rekal je lepo: rekuperajte se, aš još tri dani rabi zdurat. I storit frizuru za prenos festivala na državnoj televizije. Samo se nadan da nas nete stavit va neko gluho vreme tipo na dve za ponoćun, pokla utakmice, aš ki će to imet voji videt?

Kad već mora bit merda... boji je vijadukt leh nova koksara...

Kad već mora bit merda... boji je vijadukt leh nova koksara...


Čera nas je put zapejal va Bakar. Tamo san zadnji puta bil pred čuda let, kad smo šli iskat neki elementi za kužinu. Onputa je još bila ona industrija tamo pa je se bilo škuro i nikakovo. Bakar je danaska neš kompletamente drugo. Na se strani rožice, lepa riva, kafići…
Rožice postavne na lumbrelu

Rožice postavne na lumbrelu


Ostali su samo ulazi za tubo ča je pasevalo zdola vodi. I vela dritura na kojoj bi rabilo zgradit jedan Aqualand ili tako ča da se judi zabavjaju, a ne novu koksaru kako po novinah govore. Pametnemu je jedanput dosta.
No, vrnimo se na MIK. Ovo je prva večer ka je pasala na oprten. Mario Battifiacca je već pomislel da to ni MIK, nego dvoransko prvenstvo va pjevanju. Ima čovek i pravo, aš od seh dvorani – kristalneh ali sportskeh, mi još zvezdi nismo videli. A Bakrani su zibrali najboju poziciju.
Binu su stavili jušto na kuću kade je oštarija od ribolovci. Ma kakov green room, to je bila špica kade su si iskali mesto za sest i ćakulat, morda i pogledat utakmicu. Vitasović skoro ni šal kantat aš je otel videt kako Nessi zabija golčine brižene Grkon. Pa mu je došla Lidija Percan i pobrala ga ća.
Va Bakre su storili, ili boje reć obnovili staru gradsku gardu. To su nekada bili policioti ki su čuvali Bakar od tati i drugeh nevoj, a danas ih je lepo za videt. Dočekali su nas oni, i gusarice z općine z Bakarskun vodicun i jagodicami, pa nan je falil samo jedan papagal i bili bi kot Pirati s Kariba 4: raspjevana družina. Barka od pirati i baul z blagon je čekal na bine.
Da su se kanconi na MIKe lepe to se zna (ako arivate kupite i CD, aš ni skup), a i da saki svojega najviše voli i to se zna. Tako je Alen Polić pobral najviše punti va Bakre, ma zasluženo. Njegove Jabuke, ekipica ča ž njin kanta, su bile tako sretne da su doma dobile, da su z nekuda zivukle škatule z jabukami i delile ih publike. A kot pravi borci, pokla su zeli armuniku i rastezali do kasno va noć.
Za profeštat Dan Antifašističke borbe kako rabi, bez armunike ne gre...

Za profeštat Dan Antifašističke borbe kako rabi, bez armunike ne gre...


A naša glazba se pobrala doma, jušto na vreme aš je malo pokla počelo dažit kot s kabla. More bit da su i oblaki čekali da fini MIK, a morda su Bakrani zvali Chuck Norrisa da namesti klimu…
MIK je dobar za biznis...

MIK je dobar za biznis...


Parapetarka u mini izdanju - dekoracija za scenu

Parapetarka u mini izdanju - dekoracija za scenu


Si Mikovci na kupe z gradonačelnikon Bakra

Si Mikovci na kupe z gradonačelnikon Bakra


Puhalo je i oblaki su bili, ma se sejno soplo vane

Puhalo je i oblaki su bili, ma se sejno soplo vane


Si kantaju. I Monika Petrov i back vokali

Si kantaju. I Monika Petrov i back vokali


Mario ni otel jabuku zet, zna on kako je Adam finil...

Mario ni otel jabuku zet, zna on kako je Adam finil...


Žal ribari je bil pun do zadnjega mesta

Žal ribari je bil pun do zadnjega mesta


Jabuke, Mario i još jena jabuka

Jabuke, Mario i još jena jabuka


Vezane vijesti:
FOTO: Liburnija na MIK-e i MIK na Liburnije…
FOTO: Liburnija na MIK-e vol.3 ili pogled z kontra strani
MIK: Klapa Sol prva u Opatiji
FOTO: Dule, Silvana i POL @ MIK
VIDEO: MIK ipak u Kvarneru
VIDEO: Dve, tri s Alenom Vitasovićem
VIDEO: MIK is back…
FOTO: Dule & Puhački orkestar Lovran
FOTO: ‘Šampioni Sanrema’ u punom sjaju
FOTO: MIK gre put Istri a.k.a. Ako pozabin na Labin…

error: Content is protected !!