FOTO, VIDEO: Rukavcu z jubavi…

rukavac_fredi_sm Ekskluzivno na stranicama Liburnija.net magazina pogledajte spot za pjesmu ‘Rukavcu’ u izvođenju prvog i jedinog Rukavačkog band aida….
Rukavac – Zdola Kinkelovega taraca, va Rukavce, prekčera je održana promocija spota za kanconu – ‘Rukavcu’.
Frane ‘z onega sveta’ kot da je bil z nami, i to ne va skeče kega izvodi ekipa z Kastavskega pučkega teatra, nego zaspraven.
Stari i novi litrati vrteli su se na platne, a va sakoj kancone – Rukavac, a Frane seh gleda i kudi. Ki je čigov, kemu je mat, a kemu nono z Rukavca, se su nan to špjegali domaćin večeri Fredi Šaina i Šajo (ki je leto dan bival pul Časnega va Rukavce). A naslišali smo i kabel dobre muziki.
Kolaž je kantal o petehu Ćorotu i Rukavcu, Gemajzzeri su odsopli splet valceri i polki, Rajka Jurdana Šepić je recitirala Kompanjeta i samu sebe; Ana, Iva Šepić i Nina Dukić kantale su ”Rukavcu” kot i Zvonejski kanturi, a Silvija Manjgotić je iskala bjondega Davorića.
Spot Rukavačkega Band Aida smo videli i zajdin ćapali Fredija (velo mu hvala) da nan ga da, i da si vi (a more van bit žal ča niste bili na promocije) pogjedate Rukavac kakovega više ni. Zvonejski kanturi, Ana i Iva Šepić, Lady luna, Nina Dukić, Kolaž, Koktelsi, Ratko Poščić (Maestral), Antonio Krištofić i Claudia Beni pustili su svoj glas za Rukavac. Spot je storil Fredi, Zoran i Karmen Ventin, a se je to zmontirala i snimila ekipa z Matujskega – Art filma
Da puno ne pišemo, hitite oćadu na foto galeriju i pogledajte spot. Nemojte pozabit facolići, ako štimate svoj kraj – rabit će van.
Nan ni niki z Rukavca. Pa skužajte ako ča ni dobro. Drugi put će bit boje, samo da nan se Frane opeta ne kala.
Liburnija.net TV predstavlja – Rukavac Band Aid – Rukavcu