[FOTO] Dečja šetemana va Leprince – 'Jubav dece prej sega'

Pasali smo po Staze ljekovitega bilja, pošpijali smo pod voltu va Etno zbirku i pržun, a obašli smo i prvu Čakavsku knjižnicu va našen kraje.

Veprinac - Pul nas, va vrtiće, saka šetemana je dečja šetemana, ma dani ki su pasali bili su još i više od tega poručile su odgojateljice iz veprinačkog vrtića koje su mališanima priredila zanimljiv i raznovrstan program.

- Va vrtiće smo storili izložbu likovneh radi keh su storila naša dečica skupa z svojemi roditelji. Na karte su otisnuli svoje ruke i napisali prelepe besede z kemi smo okrunili hodnik. Čuda smo obahajali po našen Leprince. Pasali smo po Staze ljekovitega bilja, pošpijali smo pod voltu va Etno zbirku i pržun, a obašli smo i prvu Čakavsku knjižnicu va našen kraje. Jako volimo tancat pa smo jedan dan va dvorane imeli uru od tanca i gimnastike, a prišal nan je i „Studio suncokret“ z lutkarsken mjuziklon „Zelena priča“. I ča reć na kraje… Povedeli smo van se po domaću aš štimamo besedu ovega kraja va ken živemo. Čuvamo stare užance i radi obahajamo saki kantunić našega starega grada Leprinca. Va ten nan najviše pomoru oni ki su saki dan z nami, vavek parićani pomoć, a to su naši roditelji pa ćemo njin se još jedanput zahvalit i neka takovi ostanu i daje. Si skupa parićujemo i ovu šetemanu našoj dece prej sega - čuda jubavi, poručili su iz vrtića.

Follow @PodUckun