[FOTO/VIDEO] Da se ne zatare! Vrtićari z Leprinca ovih maškara bili iznimno pusno aktivni
Autor: Marina Pauletić 24.02.2023
Ča su se mići Leprinčani ovega Pusta delali, pročitajte va nastavke!
Veprinac - Vrtićari iz Dječjeg vrtića Veprinac koji djeluje kao podružnica Dječjeg vrtića Opatija ovih su maškara bili izuzetno pusno aktivni. Obesili su pusta, dočekli zvončari, sudjelovali u dječjim karnevalskim povorkama i dječjim redutama te pobirali jaja. Presjek Pusta 2023. va Leprince pročitajte u pismu koje su nam poslali napisanom na našen domaćen, čakavsken zajike.
Da se ne zatare, na Antonju „Gospodina Neću“ na pal smo obesili i užancu storili. Kako pust nalaže storili smo i pusni tanac va sale. Pravi tanac je to bil, čuda dečine i judi prišlo se j' zabavit. Armunika i trumbeta švikali su bez prestat, tomboli su se podelile, a tancalo se z metlun i bez nje. Muški svet je stavjal robu sušit na sušilo, a šćipalnic je bilo sakudar. Najveć se j' pak judi zabavilo dokle j' dural „Ples sa zvijezdama“. Tancala se j' rašpa, pačji ples, makarena i hoki poki, a žiri je zibral najbojeh. Oneh ki su se strudili čekale su friti, kroštuli i krafni, a bilo j' tega i za popit.
Po užance va vrtiće smo pričekali Leprinački zvončari. Kolo su nan storili i zvonili, zvonili. Parićali smo njin kiseli kapuz i kumbasice. Obećali su nan, prit će i kletu.
A onda j' prišal pusni pondejak i utorak – po sele jaja smo pobirali. Čuda drageh judi nas je čekalo i lepo se s nami zabavilo. Po pute smo trefili „Muži“ ki su nan zasopli. Da se ne zatare spreda seh maškaric visoko se nosil maj.
Sredu – na pepelnicu smo ga osudili. „Gospodin Neću“ pobral je za čuda tega (neću jist maneštru, neću pospravit igrački, neću dat cimbuju...); i osudili smo ga, KRIV JE!
Deca bi ga rada va svemir va rakete poslat, a morda će ga i Leprinčani važgat. Ćemo videt, a povedet van kletu.
Tako smo to mi, Leprinčani, storili, da se ne zatare.
