[FOTO/VIDEO] Pusni četrtak: Održana zvončarska prova pul Princip!
Autor: Nikola Cvjetović 09.02.2024
Veliku fotogaleriju i video prilog pogledajte u nastavku...
Principi - Do kraja pusta i početka Korizmi ostalo je malo vremena, a da ulazimo u samu završnicu pusnih događanja svake godine najavi Pusni četrtak pul Princip, odnosno zvončarska prova.
Se je počelo pred skoro trejset let kada je par zvončari odlučilo poć storit provu za Pusnu nedeju kada gredu Mučićevi zvončari. Leto po leto put njin je postajal daji, a zvončari je bilo se više. Danas to više ni lih prova nego prava užanca. Sako leto zvončari parte z jenega sela Mjesnega odbora Principi i va isto se selo večer vrnu. Ovo leto su to bili Principi.
Zvončari na taj dan malo manje bacelaju okol spravjanja. Obuču huje brageše, stomanju na kvadri, stave kožu, zvonci, a va ruku zamu baltu. Spreda zvončari gredu muzika i maj, a zada maškare. Okupjanje zvončari bilo je potle dve ure, dočekat ih se moglo va isten sele večer, a mej ten su pasali: Brajani, Obadi, Mavrići, Božinići i Franići.
