IN MEMORIAM kap. Edo Dešković

Entuzijast i lokal patriot, imel je taj svoj domaći mot da pomore sakemu, navadi nas i zaduži, svoje umijeće preženta. Imel je energiji kako da ima 30 let, niš mu nikada ni bilo teško, uključen va se fešti, pučki teatri i njegovu najveću strast – Karneval.

Mošćenička Draga - Edo Dešković je bil poseban čovek. Pomorac. Kapetan. Bil je i predsednik Zajednice hrvatskih udruga pomorskih kapetana, vavek vezan za more, naviganje, a prvo sega za svet. Komandant na teretneh i putničkeh brodi, od raneh dan vezan za vijaj, za poć, za storit, za zaslužit i za tornat se doma. Va Dragu, pokle ča je videl sveta, prnest neš vredno ča je naučil i to ovde pratikat, pokazat, doperat. Vavek va mote, vavek žvejo, pozitivan i pront za svoj kraj. Znal je pohvalit, ma znal je i kritikat, ono ča mu ni bilo pravo je napisal, rekal na sav glas, radi sebe i seh oneh ki nisu imeli kuraja reć. Bil je vrhunski modelar, nagrajen i pohvajen za svoji brodi va vetrinah, za strpjenje ko je imel kad je let i let delal svoji modeli stareh jedrenjaki, ma i oneh tankeri na keh je bil Komandant. I za kraj svoje pomorske karijeri, napisal je i knjigu o toj pomorskoj meštrije, kako je navigal, kade je se bil, va veleh se moreh tombulal, brod i posadu spasil, va siguran porat arival. Delal je i izložbi od svojeh brodi, skupne i samostalne, posvećene pomorstvu i ribarije. Povedal je o svojemi vijaji, o Amerike i Kinezi, Japanu i Indoneziji, Afrike i Skandinavije, Brazile i Australije, Mediteranu kega je najviše volel. I kad je va penziju šal, aš je navigat znal, zvali su ga opet na more na mesec - dva da z brodon opera. Bil je štimani Kapetan, odgovoran i neustrašiv, odlučan i nepogrešiv.

Edo je bil jedan od najinventivnijeh judi keh san upoznal. Entuzijast i lokal patriot, imel je taj svoj domaći mot da pomore sakemu, navadi nas i zaduži, svoje umijeće preženta. Imel je energiji kako da ima 30 let, niš mu nikada ni bilo teško, uključen va se fešti, pučki teatri i njegovu najveću strast – Karneval. Pisal je pusni govori, delal šateli i aroplani, bil pusni sudac breg let, volel je bit autoritet, bil je i tolerantan, imel je stila, za niš mu ni bila sila, se je arival, razmislel, ideju na kartu klal, nacrtal i storil na ponos seh nas. Dugo smo let bili va puste skupa, pisali i govorili, na povorke bili, pusnu sredu okrunili. Spametit se rabi njegoveh američkeh vijaji kada je na Floride prvi put videl raketu i takovu miću 69-te va Drage je pokazal svetu. Bil je jedan od pioniri draškega spaljivanja, veli zaljubljenik va pust i Dragu, i spametin se kada mi je puno puti rekal – celi svet san pasal, videl kako se drugde žive, ma pul nas je najlepše, ni takovega života nigdere, ma čovek mora puno sveta pasat kako bi se va svoje doma mogal inamorat.

Edo je storil barku na solarni pogon, miće jedrilice s kemi je s porta upravjal, dve kući, troje deci, dobil unuki i pomalo va penzije užival, zmišjal, va zbore kantal, putoval, va Dragu se vavek rado tornal kada je počel Karneval.

Edo je bil žilav i izdržljiv. Spametin se kad mi je povedal o veloj kalvarije ku je doživel ko mlad, kad su si misleli da je kraj, on se rekuperal, forcal i opet mej nas prišal. Bila je to njegova najveća bitka za život kada je dal se od sebe da ostane tu kade je. I danas, kad je Bog rekal da je kraj, Edi je šal. Napustil nas je kada je se va živote storil, kada je prišal do one spoznaji da mu ni žal poć na onaj drugi svet kada vidi zad sebe se ono ča ćemo baštinit pokle njega – femeja ono ča joj je pustil, petenti i meštriji kemi nas je zadužil, Pust kega je storil i oplemenil, Dragu koj je svoje srce pustil.

Volel bin da znamo da je Edo Dešković bil čovek sveta, da su ga kunfini, bandjeri i politike jadile, da se boril za slobodu čoveka, za univerzalnu istinu, da je imel kontinenti i mora va mićen prste, a toliko volel svoj miću valu, svoju lepu Dragu, pesak i rivu, bonacu i maeštral, ki ga sada nosi na modren refule va meritani raj. Boh maestro!

R.Staraj, 28.07.2022.

Follow @PodUckun