Pusni špasi katarinski faši

Pusnu nedilju smo šli u Starod, Starojci su nas čekali, aš „prihajaju mačkare zas Pasjaka, prihajaju Paščani h nan“ su govorili.

Matulji - Bil je pust, leta tega i tega. Se zmisliš, lipa moja, bil je snih do kolen ma bili smo mladi. Rada san te jimil, ti mene tudi. Komoć smo pričekali pust, drugače nas nisu pustili skupa, aš da san siromašan, morda zato manje vridan, ali ča? Ma ti nisi tako mislila i nič drugo na svit ni bilo važno.

Pusnu nedilju smo šli u Starod, Starojci su nas čekali, aš „prihajaju mačkare zas Pasjaka, prihajaju Paščani h nan“ su govorili.

Lipo dišiju štruklji, ramonika svira (una na batone, se zmisliš?), mačkare plešu drnc. Klišćar z unimi velikimi klišći stisnil je i šćipnil saku malicu, vrah jih je strašil, a duhtar se je delal da će jih zličit, une ke su bolne.

Moju i toju bol ni mogal zličit nijedan, lego ti moju i ja toju, aš smo se jimili jako rada, ča ne da je tako? Bajs i ramonika, klabuki na krivo, z putriha se pije vino, si se smiju, veseliju, a ja mislin samo na to kako bin s tobu bil nasamo, da mi te je ubjet z rukami, stisnit h sebi i reć une najliplje besede ke su mi se vrtile po glavi, dane i noći.

Pogledala si me i svit mi se je ubrnil. Kada san ti zagledal une škuljice na ubras i oči ke su ti zasvitile, ja san znal...

Sniga ni već bilo, mačkar tudi, prišla je spomlad, a Sinakoše su dišale po rožicah, ke su nan postale postelj. Bila si, lipa i draga moja, samo moja.

Minili su cajti, mi smo se uštufali hodit okoli z mačkarami, sada hodiju naši mladi, má za njimi ćemo zavavik hodit. A Sinakoše ćeju nan saki dan već dišat.

Nap. autora: štruklji su pusna tradicija naših sel, a delalo se jih je i za likuf (završetak košnje, poljskih del, ali krova od hiše). Drnc je starinski ples sličan drmešu, trese se od kolen doli.

Fotografije su iz arhiva Milana Surine, objavljene u Zborniku Liburnijskoga krasa, 2011.

Tekst: Josip Orlando Hrvatin

Follow @PodUckun