Leprinački zvončari storili užancu – ni ih sprečilo ni grdo vreme
Autor: Marina Pauletić 10.02.2024
Malo njih zna da su se zvonci va Leprince nosili davneh let, postoji zapis z 1912. leta!
Leprinac - Bez obzira na daž i grdo vreme leprinački zvončari ipak su po užance na pusni petak obašli Tumpići, Stari Grad i Mandriju. Lepo su ih dočekali domaćini ki su se brzo organizirali i počastili zvončari na suhen; va konobah, pod natstrešnicami i va garažah. Kože i krabujosnice su se zmočile i sada će trebat storit nove rožice i oni ki su ih prišli videt su se zmočili, ma rabilo ih je bilo poć videt za dat in koraja kada su se već otpravili zvonit.
Malo o povijesti leprinačkeh zvončari aš malo njih zna da su se zvonci va Leprince nosili davneh let pa tako ima zapis iz 1912. leta kada su ih zabranili aš da je va obahajanju poginul neki dimnjačar. Leprinački zvončari su obnovili tradiciju 2004. leta i od onda na pusni petak obahajaju Tumpići, Stari grad i Mandriju.
Kako nisu imeli neku sliku, a i niki se jako ni pametil kako su nekada leprinački zvončari bili spravni oni su zmisleli jenu posebnu krabujosnicu; storena je od leprini ka simbolizira naš breg, plavi „rub“ na krabujosnice simbolizira more, crvena rožica na vrhe je crekva Sv. Marka a bele rožice su kućice. Obučeni su va treperice, stomanju na kvadri i fačol. Nose ovčju kožu i tri zvona. Zvone samo na pusni petak po Leprince. Lepo je da su to obnovili a kako š njimi pohajaju i mići zvončari ni skrbi da i daje neće zvonit.
Pusno društvo Veprinac slavi ovo leto 50 let i za tu priliku pozivaju se leprinačke maškare da se pridu maškarani slikat na pusnu nedeju 11.2. va Stari grad va Leprince na 8 ur jutro. Pokle slikanja će partit „muži“, „omladina“ i „žmešani“ po svojeh rutah obahajevat Leprinac.
„Uz suorganizatora Kulturno društvo Leprinac organizirali su kot nekada Pusni tanci va Sale (društveni dom Janko Gržinić) a zabavit će nas Troi Vox pa pozivamo seh ki se vole maškarat i pravu pusnu feštu neka pridu na pusnu nedeju 11.2. i na pusni utorak 13.2. va Leprinac. Samo veselo aš još jako malo traje. Živio pust!“, pozivaju organizatori.
