Održana smotra mladega vina va Leprince
Autor: Portal Poduckun 22.12.2022
Za se boju kvalitetu vina su zaslužni i Udruga Belica i Grad Kastav ki su sufinancirali laboratorij za vino pul Pojan ki služi za osnovne kemijske analize vina, kako i senzoriku. To znači da postoji i opcija senzornega kušanja vina ko ukaže na manu i da preporuku kako tu manu maknut.
Veprinac - Va leprinačken Društvenen dome „Janko Gržinić“ se j' 26. novembra održala Smotra mladega vina. Užanca j' to ka dura već 17 let – Smotra je va prven rede namenjena domaćemi vinari ovega kraja ki delaju vino va konobe, z gušta, ma je i oneh ča imaju i mići OPG.
– Ovo leto smo imeli 44 uzorka, od čega 21 belo vino va kategorije kontroliranega vrenja ili po domaću „mrzlo vrenje“, devet uzorki belega po starinski ili „pod dropun“ i 14 uzorki crnega – rekla nan je Patricia Rumac, članica žirija Smotre, enologinja i članica udruge Belica. Rezultati ovega leta nisu falili, pa su se tako podelile i dobre ocjene, boje leh pasano leto. Prvo mesto i zlato za vino va kategorije kontroliranega vrenja j' dobil Renato Jardas za chardonnay z 18,10 bodi i tuka ga zajno prati Igor Puhar z žlahtinon. Zlato za belo vino „po starinski“ je dobil OPG Maćuki Rumac za chardonnay, a zlato za črno vino j' dobil Boris Acinger za merlot kako najboje vino Smotre.
– Nažalost dva uzorka nisu pasala testiranje aš su imela defekat. Jedno je imelo hlapivu, verovatno je bilo puno pod dropun ili se j' dogodil neki problem ča moramo ispitat. Drugo vino j' imelo čudan dih, aš ni na vreme pretočeno, pa je talog pustil dih. Ako se ustanove na vreme, većina mani se more uspješno rešit i ta vina pokle budu korektna, ma jih treba na vreme prepoznat. Kada kušate svoje vino saki dan vi se na taj negativan dih i okus navadite – špjegala je Patricia. Pred par let Smotra je bila malo drugačije postavjena nego ča j' danas: održavala se j' va Etno zbirke, ma je z vremenun prerasla taj prostor, pa su ju preselili va novourejeni Društveni dom. Način kako se ocenjuje vino se j' isto promenil, prej su si ki su prnesli vino mogli i provevat i ocenjevat, a već par let za to j' zadužen stručni žiri va ken su Nina Vičić, Toni Babić i Patricia Rumac, vrsni enologi i poznavatelji vina.
– Najprej se j' žiri sastojal od publike ka je kušala i ocenjevala vina, a kada se to gleda z jedne stručne strani, rezultat je izostal aš ni isto kad ocenjuje amater ili neki ki je stručan. Ali kako se sagdere teži prema bojen tako smo i mi storili škalin gore i odlučili imet samo žiri – povedela nan je Patricia. Ča se tiče same kvaliteti vina, Patricia nan govori kako se j' ona jako popravila na oven područje. Ranejeh let judi jednostavno nisu znali; trudili su se, a rezultati su izostajali – mejten, danas se z edukacijun i predavanji to se poboljšalo. Vinari pitaju, ono ča ne znaju njin se povede, pa delaju puno boja vina. Pofin tega se organizatori trude da se Smotra organizira sako leto, da se naši domaći vinari educiraju, da poprave ako imaju ča za popravit i na kraj kraja da se podruže i razmene iskustva i savjeti. Za se boju kvalitetu vina su zaslužni i Udruga Belica i Grad Kastav ki su sufinancirali laboratorij za vino pul Pojan ki služi za osnovne kemijske analize vina, kako i senzoriku. To znači da postoji i opcija senzornega kušanja vina ko ukaže na manu i da preporuku kako tu manu maknut. Neupitno je da se j' vinarstvo z leti promenilo i postalo jedan trend za ki se nadamo da neće zamret aš se jako puno judi, med kemi i mladeh, vrnjuje staremi koreni i to treba poticat i motivirat da naš kraj, a pogotovo ruralni del, zaživeje kako nekad. Smotru mladega vina već peto leto organizira Kulturno društvo Leprinac (prej ju je vodila Udruga mladih Leprinac), a sufinancirana je od Grada Opatije.
– Ovin puten otejen se zahvalit semi onemi ki su nan pomogli, volonterun Kulturnega društva Leprinac, Aleksandru Koriću i obrtu „Piki“ ki nan je storil gravure, obrtu „Martis“ za lepe boršice i Studiju Graphic z Opatije ki nan je storil diplome za svi sudioniki. Za kraj bin otela zahvalit sakemu vinaru ki je sudjeloval i reć njin da jako cenimo njihov trud, zalaganje i voju ku imaju da budu sako leto se boji aš se to odrazi i na vine ko store – rekla j' za kraj Zorica Sergo, predsjednica Kulturnega društva Leprinac.
Piše Elia Filinić
Litratal Nikola Turina
