Pusni četrtak pul Princip!
Autor: Portal Poduckun 06.02.2024
Se je počelo pred skoro trejset let kada je par zvončari odlučilo poć storit provu za Pusnu nedeju.
Principi - Do kraja pusta i početka Korizmi ostalo je još šetemanu dan pa se saki dan va drugen meste neč dogaja. Trebalo bi se to i zapisat da se ča ne pozabi. Zato sada ovde morete doznat kamo van je poć četrtak.
Ovi četrtak ni kod i saki drugi. To je zadnji četrtak pusta pa se zato reče da je Pusni četrtak, a poć je Principon.
Se je počelo pred skoro trejset let kada je par zvončari odlučilo poć storit provu za Pusnu nedeju kada gredu Mučićevi zvončari. Leto po leto put njin je postajal daji, a zvončari je bilo se više. Danas to više ni lih prova nego prava užanca. Sako leto zvončari parte z jenega sela Mjesnega odbora Principi i va isto se selo večer vrnu. Ovo leto su to Principi.
Zvončari na taj dan malo manje bacelaju okol spravjanja. Obuču huje brageše, stomanju na kvadri, stave kožu, zvonci, a va ruku zamu baltu. Spreda zvončari gredu muzika i maj, a zada maškare.
Okupjanje zvončari će bit potle dve ure. Dočekat ih se more va isten sele večer, a mej ten nać va neken od seli: Brajani, Obadi, Mavrići, Božinići i Franići. Večer će za si zvončari, muziku, maškare, ma i za si judi ki se tamo najdu, pul Princip bit parićano neč za okrepit se.
