Se je parićano za Pust pul Marčeji – Mića zvončarska smotra, obahajanje Marčejskeh stareh i Halubajskeh zvončari te zakapanje pusta
Autor: Branimir Brnas 12.01.2026
Marčejski stariOrganiziraneh događaji pul Marčeji neće falet kod ni sako leto, ta događanja su jako vezana za užancu nošenja zvonci pa marčejcun z pravun spod tabeli Marčelji piše i "zvončarski koren", da se koreni ne pozabe.
Pul Marčeji će, već po užance i ovo leto Pusno vreme bit obilježeno z puno veselja, kanta i zvuka od zvonac. Se počinje za Antonju kad pusni judi od Marčeji gredu obesit pusta na Marčejski breg. Vesela povorka će se okupit na tri zapolne pul Mladenić od kud gredu Mavrovičeven, pa će preko Ilovac poć do Dolnjega sela i po Srediće na Breg. Na Brege će se pusta obesit oko 20,30 uz muziku i veselje. Šetemanu potla 25.01. bit će održana jubilarna 20. smotra "Mići zvončari pul Marčeji" va organizacije Udrugi Marčeji uz potporu Općini Viškovo i TZ općini Viškovo. Ovo leto ruta je obrnjena radi se većega broja sudioniki, tako da će mići zvončari Marčeji počet obahajat od Brega preko Ravnika na Vršak od kuda će se poć va Dolnjo selo prema Bravarije Vlah i Staroj škole kade će bit zabava za seh i velo druženje uz muziku.
Detalj s Miće smotre...Marčejski stari Marčejski komun obahajaju 07.02. na Lontošnju subotu.
Okupjanje zvončari je na devet jutro pul Slovenca, na Ravnike, od kuda Stari gredu kroz Sredić po Podnarančere Garićen. Od Garić se gre po Petrolejskoj ceste na Pogjed kade su oko polna. Z Pogjeda zvoni se pod Rosca, va Vrtače i Nuntarovo od kuda će zvončari prit Mavrun pa i od tamo potirat zimu i prnest veselja. Obahajanje finjuju va Staroj škole pul Marčeji. Halubajski zvončari trdicionalno va svoja obahajanja kreću od Bačurkineh na osan jutro. Pusnu nedeju 15.02. prema Brentariću, kroz Sredić prema Garićen i Klićen pa se daje dok ne fine na karnevale na Korze. Pul Brentarića, na Brege, pul Garić i Klić bit će jin parićano i zvončari će delat kolo. Pusni pundejak gredu kroz Vrtače i Nuntarovo prema Kastvu obać zapadni del Halubja, a utorak na Pust kroz Mavri i Mavrovičino, kade će delat kolo, gredu prema Svetemu Mateju (Viškovu) i daje obahajat Smokvariju i taj kraj.
Na Pust 17.02. Marčejski stari opet gredu kroz Marčeji, al ovi put zakopat svojga pusta na Marčejsken brege kade će kod i sako leto bit veselo. Veselica će počet na 20,00 pa dok Stari ne pridu i zakopaju svojga pusta. Stari će po užance gledat lepo ugostit seh oneh ki pridu poštimat ovaj događaj. Bit će tu parićano za jist i pit, a ni muziki neće falet. Se će finit tako ča će se osudit glavnega krivca za se nevoji va pasanen lete.
Mići Halubajski zvončariOrganiziraneh događaji pul Marčeji neće falet kod ni sako leto, ta događanja su jako vezana za užancu nošenja zvonci pa marčejcun z pravun spod tabeli Marčelji piše i "zvončarski koren", da se koreni ne pozabe.
Marčejci, rugjivi kod i vavek, šapiću da jih judi od ća nagovaraju neka store svoju Turističku zajednicu aš da imaju događaji va sele koliko i cela Općina. Z druge strani stare ženske po butigah povedaju da će TZ općini Viškovo za drugo leto zapret špinu od financij. Da se razumemo, ni to nikad baš teklo više kapa ma sejeno puno znači i škoda bi bilo na taj način hitat bukvići pod kola juden ki se delaju volonterski, z jubavi prema svojmu kraju i pridonose prepoznatljivosti naše Općini i Halubja. No, ako rabi Marčejci će se sami storit kod i vavek al užanci neće zatrt. Lepi pozdrav od Marčeji, pridite nas posjetit i oćutit naše gostoprimstvo. ŽIVIO PUST! ZAKOPAJMO GA!
Zakapanje pusta...
