[INTERVJU] Ivan Bošnjak: Inamoran va tipki

snimio Nikola Turina

Ča se õrgani tiče samouk san, sopal san jih po klavirskoj tehnike i nisan imel pristup nekoj konkretnoj orguljaškoj literature ili tehnikami, povedel je Ivan.

Vilija Božja, malo prej pol noći. Crekva se puni, tihi mrmor med judi. Tu i tamo ko malo glasnejo „Sretan Božić“ ale „Svako dobro“. I onputa, jušto na minut, po crekve se proširi bogati zvuk õrgani – počela j' polnoćka. Judi su tiho, a crekva je puna prodornega, svečanega zvuka. Božić je, judi!

Ni bojega instrumenta s ken bi se moglo počet ovakov blagdan. Za õrgani se reče da su krajica med svemi muzičkemi štrumenti: prvo, aš moru „imitirat“ svi drugi muzički instrumenti i nijanse ljudskega glasa. Drugo, saki õrgani su jedinstven instrument – za storit õrgani, najprej trebe zmerit prostor va kega gredu i njigovu akustiku, komać onda jih se počne „gradit“. I baš kako ča ne postoje dva prostora z istun akustikun, tako ne postoje ni dva jednaka õrgana. I finit ćemo z trećen (magari bi se još moglo nabrajat), to je jedan od najkompleksnejeh štrumenti keh je čovek zmislel. Zrak z meha gre va svirale razneh veličini (i građi), uz pomoć manubrija gre va zračnice, pak ga onda ventil pušća va kancelu odrejenega registra. Komplicirano? Čekajte, još van nismo povedeli od principali, bordoni, manuali, pedali…

Onaj ki nan je od õrgani sve povedel je naš Opatijac Ivan Bošnjak ki va crekve svete Ani na Volosken već rotondeh dvajset let sope õrgani. Va „tipke“ se j' zajubil kad je bil mići, z komać deset let, kada ga j' mama „porivala“ da se upiše na tečaj sintisajzera.

– Prej tega nisan imel baš velega doticaja z instrumenti i mislin da nanke nisan pokaževal neku sklonost muzike. Mejten, kad san počel sost, jako mi se j' zapijažalo, a posebe san volel sost klasičnu muziku. Druga deca su više sopla modernu muziku, pop ili rock, a ja san vavek pital da mi daju klasične kompozicije. Pofin tega je Željko Milovanović, ki je vodil tečaj, predložil da gren na satove klavira. Tako san počel hodit na privatne poduke pul pokojne profesorice Gordani Hrabrić, dok nisan finil gimnaziju v Opatije. Paralelno, va četrten razrede san upisal pripremni razred va glazbenoj škole Ivana Matetića Ronjgova v Reke – povedel nan je Ivan.

Finil je klavir i teoretski smjer va škole, a do 2013. leta je diplomiral na Muzičkoj akademije Zagreb, područni odjel Rijeka – naravno, klavir. Mejten, va celoj štorije dogodilo se j' još neč. Kako je već znal sost klavir, okol 1998. leta, počel je sost i harmonij na („dečjoj“) maše va crekve svetega Jakova. Otrok kako otrok, kurijož kako ča su sa deca, zaintrigirali su ga õrgani, a časna sestra Karmela Dominković pokazala mu je osnove i dala note.

– Va to vreme ni još bilo toliko informacij na internete, pa san uglavnon iskal libri i istražival i učil na ta način – govori Ivan. Ko leto kašneje, sopal je na jednen pire va Svetoj Ane na Volosken, a kako ni bil ki sost večernju mašu, pokojni monsinjor Josip Šimac ga j' zamolil da pride. Rado je prihvatil aš da mu je to bil „korak napred“: njihi õrgani imaju jedan manual i pet registri više nego oni va Sveten Jakove, a i crekva da ima boju akustiku. I ono ča je počelo kako „ispomoć“ pretvorilo se j' va angažman ki dura već 20 let.

Ivan danaska dela kako profesor klavira i korepeticije va Glazbenoj škole Ivana Matetića Ronjgova v Reke, a to je ono ča je kako otrok sanjal da će postat „kad bude veli“. Skupa z podružnicami na Krke i na Rabe, škola ima okol 600 učeniki i jako mu je drago ča mej decun postoji veli interes za muziku. Često ga moremo videt na događanjeh kade sope pratnje na klavire pjevačun, zboru Zajednice Talijani, zboru DVD-a ili kemu drugemu. Ivan se rado odazove kada nekemu trebe „dat ruku“, ma još jedna stvar ku trebe znat je da je Ivan va sačeren česa se ćapa perfekcionist, pa je tako odlučil storit još jedan „škalin gore“ i z õrgani. Lane je upisal pripremno leto za õrgani na konzervatorije „Giuseppe Tartini“ va Trste. Da interes za specijalizirat õrgani ni veli, dokažuje i činjenica da j' Ivan jedini student va svojoj generacije.

– Postoji studij za õrgani i va Zagrebe, mejten Trst mi j' puno bliže. Storil san pripremno leto lane, a ovo leto san počel studij. Õrgani su fascinantan i kompleksan instrument i vela mi je želja bila navadit više o njimi. Ča se õrgani tiče samouk san, sopal san jih po klavirskoj tehnike i nisan imel pristup nekoj konkretnoj orguljaškoj literature ili tehnikami. Sad učin skroz nove tehnike, ke me nijedan ovde ni mogal navadit. Drago mi je da san upisal konzervatorij, otkrivan jednu posve novu štoriju – oduševljen je Ivan.

Sven ča dela, slobodnega vremena skoro da i nima, a kad najde kakov minutić vremena „za počinut“ najraje se gre prošećat, bilo va šumu ili lungomare, i „uživat va mire“. Za nekega ki morda i po osan ili deset ur na dan sope i nasliša drugeh kako sopu – to je i za razumet!

Follow @PodUckun