[RAZGOVOR] Cvjetana Miletić: I da se još pet put rodin, isto bin zibrala!

Foto: arhiva

Va škole, va novinah, va izdavaštve, va svojeh libreh, va udrugah i kade god drugde je mogla, vavek se j' zalagala za domaću besedu.

Ako za povedet štoriju od vašega života za stol mora sest pet docenti, doktori znanosti i profesori, i ako njin nanke ura vremena ni dosti za celu tu štoriju povedet, znači da ste se va živote nadelali i čuda storili. Dogodilo se j' to pasanega meseca na Svečanen kolokvije za 80. rojendan gospe Cvjetani Miletić. Generacijan Drežničani, Brsečani, Opatijci i Pojanci bila je meštrica va škole, bila je novinarka i urednica „Opatijske komuni“, njiji glas smo naslišali „S primorske poneštrice“, pisala je za „Liburnijski Novi list“ i „Besedu“, napisala je i objavila pet libri i realizirala jedan altroke fanjski projekt – storila je prvi „Slovnik kastafskega govora“ z više od deset tisuć besed. Samo na ten je delala svojeh dvajsetak let… Ma to ni se! Još tu rabi spomenut i silni libri ki je uredila, pa i to da j' bila predsjednica opatijske Katedre čakavskega sabora, da je surađivala i z Radio Zagrebun… Morda j' boje nanke ne provevat se nabrojit, aš ako nisu arivali docenti i doktori znanosti, sigurno će i nan ča „pobeć“. Kad još semu temu dodamo da ima i troje dece (danaska je i nona trin vnukon) – kako je to se arivala storit?

– Imela san velu sreću da san imela dobrega muža ki je volel skuhat i niš mu ni bilo teško storit, pa san vavek mogla na mire delat i pisat! To jako puno znači, kad pridete doma na parićan obed… Nikad me niki ni „sputaval“; velu podršku va sen ča san delala san imela i od dece, a i radno vreme je bilo drugačje, počelo se j' delat raneje jutrun, pa kad si prišal doma z dela, još ti je lep kus vremena ostal do noći, govori nan gospa Cvjetana. S čuda jubavi nan poveda za svoji bivši učeniki, većinu jih zna po imene, pameti kakovi su bili va škole i s ken su se družili. Puna je simpatičneh štorij od dečjeh smešic, pa si čovek ne more pomoć leh pomislet da je ona rojena za to delo!

– Nisan ja mislela da ću bit učitelica. Kastav je imel učiteljsku tradiciju još od početka 20. stoljeća, kad je Vladimir Nazor bil va Kastve ravnatelj učiteljske školi. Skoro bin rekla da va Kastve ni bilo ni jene kući va koj ni neki bil učitelj i to se j' zvanje va Kastve jako štimalo. H temu, i sama san imela jako dobre učiteljice. Va prven razrede to je bila Milica Kukurin ka me j' navadila čitat, pisat i recitirat. Od petega do osmega razreda nan je profesorica hrvatskega zajika bila Anica Brozović ka nas je tirala vadit gramatiku kako vrag grešnu dušu! Zato mi je gramatika bila vavek draga. I dan-danaska pišen onako kako me j' ona navadila. Eko, tako san i ja odlučila poć za učiteljicu, poveda gospa Cvjetana. Nikad ni požalela; i da se još pet put rodi, saki da bi put isto delo zibrala. Govori da ni lepšega dela nego delat z decun ka su još mića i iskrena. Za današnji dani reče da su se vremena promenila, da je neč šlo na boje, neč na huje, ma deca da su vavek lepa i dobra, nego mi smo ti ki smo kadagod niš! Delala je va većeh školah z velemi razredi, ma govori da njoj je vavek bilo draže delat va mićeh školah, kade je užalo i po par generacij bit va isten razrede. Gospoj Cvjetane niš ni problem, i govori da se za takovi, „kombinirani“, razredi meštar mora samo dobro parićat, a h temu, tako da se j' spraksirala i brzo delat.

Bi reć da sako delo kega se ćapa – dela od srca. Z jednako puno jubavi govori i od vremena kada je bila urednica va „Opatijskoj komune“ ka je prihajala van jedanput na mesec, na 16 stranic, formata kako „Novi list“. Ako neki misle da je sigurno va to vreme morala mislet i na cenzuru, gospa Cvjetana govori:

– Nikad van neće cenzura niš storit, ako se držite granic moralnosti. Nikad nisan neč napisala, a da san se pokle nekemu morala škuževat. Prej sega, to se ipak ovisi o čoveku. Važna je moralnost, a to je neč česa nan jako fali. Ne mislin tu samo na školu ili mediji, nego i na Sabor – kakove se to besede duperaju? Pristojnosti fali sagdere!

Va škole, va novinah, va izdavaštve, va svojeh libreh, va udrugah i kade god drugde je mogla, vavek se j' zalagala za domaću besedu.

– Ja san vavek „rivala“ čakavštinu, aš je to naš najstareji zajik i šnjin smo govorili prej leh smo govorili standard. Standard smo navadili kad smo šli va školu. Prema temu mi smo dvojezični, kako god obrnete. Mane je čakavština vavek bila bliska, vavek draga. Judi užaju reć da se neč „ne more po domaći reć“. Ja njin rečen „More, more! Kako su govorili judi pred 100 let? Ili prej ilirskega pokreta, kad ni postojal hrvatski standard? Kako su oni mogli i zakoni napisat?“ Znači da se more!

Jedna je od oneh judi ki va penzije morda i više delaju nego kad su hodili na delo. I daje piše pjesmi i štorije, aktivna je va Katedre Čakavskega sabora Lovran i jušto je pred ki ta dan va Lovrane predstavjen drugi libar „Lovran i Lovranci: judi su naša bogatija“ kega je ona uredila. Otkrila nan je da je i treći već skoro napol gotov… Tu urejuje i edicije „Lovranska dota“ (6 libri) i „Lovranski lapiš“ (13 libri). Za Ustanovu Ivan Matetić Ronjgov urejuje „Čakavčići pul Ronjgi“, a i predsjednica je uređivačkega odbora Lovranskega lista. Reče da čovek va penzije ima „višak vremena“ i da ga ona najraje korisno potroši. Ma ipak, ono ča sigurno najviše voli delat je bit nona – neki su već veli, a onega najmlajega rado pričuva, kad rabi. Najboje je sama rekla: „Prej mi je delo bilo delat z decun, a pisanje hobi. Sad je prišlo vreme da mi pisanje postane delo, a delo z decun – hobi!“

Elena Vidović / List Opatija

Follow @PodUckun