[INTERVJU] Guarda, Luigi, Madonna e Zucchero sono dietro de Dule!

Foto: David Kurti

Osim što je pokretač opatijske Balinjerade i dugogodišnji pusni gradonačelnik, Dule je i dobitnik niza priznanja – među njima i nagrade Grada Opatije za životno djelo te posebnog priznanja Hrvatske glazbene unije, čije je riječke podružnice bio dugogodišnji predsjednik.

Duško Jeličić Dule (79) krajem studenog obilježit će 60 godina glazbene karijere, a dogodine će, uz svoj 80. rođendan, proslaviti i 50 godina djelovanja legendarnog sastava „Bonaca“, čiji je član od samih početaka. Iako su danas njegov glas i pojava sastavni dio opatijskog identiteta i malo tko se više od njega založio za popularizaciju čakavštine, Duško Jeličić nije rođeni Opatijac – rođen je u Zagrebu, a rano djetinjstvo proveo je u Splitu.

Uz veliki osmijeh na licu kaže kako on u Opatiji nije „prišlić“ nego „dopejanac“. U Opatiju je s majkom preselio iz Splita nakon što mu je umro otac. Priznaje kako mu u početku preseljenje u Opatiju nije baš najbolje „sjelo“ – nedostajali su mu i Split i prijatelji. No, druželjubivi i svestrani jedanaestogodišnjak vrlo je brzo u novom gradu stekao nove prijatelje, pa je i novi grad postao „podnošljiviji“. Veliki plus je bila činjenica što je bio blizu mora, u koje je Dule bio zaljubljen još od malih nogu. Ovdje se počeo baviti jedrenjem, a mogao se i „prošvercati“ u Kristalnu dvoranu hotela Kvarner i uživo, doduše poskrivećki, gledati svoje pjevačke idole na famoznom Opatijskom festivalu. Danas kaže kako mu, baš kao i bilo kome drugome tko doseli u Opatiju, nije trebalo puno da se u nju zaljubi. Malo kasnije, kada i sam bude krenuo u glazbene vode, a Opatija će postati njegova trajna inspiracija.

Škampar i ribar u mirovini, vrsni jedriličar, a nadasve neumorni glazbenik, tekstopisac i organizator, Dule je svoj glazbeni put započeo 1965. u grupi Royali. Tijekom sedamdesetih godina aktivan je u grupi Jučer nestali, a pravu afirmaciju doživio s Bonacom, osnovanom 1976. godine. Od tada do danas ostao je vjeran domaćoj besede, stvarajući doista bogat repertoar skladbi koje se danas smatraju vertikalom ča-vala i ča-rocka, a obilježile su brojne festivale. U 60 godina dugoj karijeri njegovi se nastupi broje u tisućama.

Osim što je pokretač opatijske Balinjerade i dugogodišnji pusni gradonačelnik, Dule je i dobitnik niza priznanja – među njima i nagrade Grada Opatije za životno djelo te posebnog priznanja Hrvatske glazbene unije, čije je riječke podružnice bio dugogodišnji predsjednik.

O tome kako je „najboji čovek na svete“ – kako ga je u svojoj pjesmi opisao Dražen Turina Šajeta – postao otac ča-vala, nono ča-rocka, doživotni prežidente od Balinjeradi, ali i šaptač cegulima, poćakulali smo jedno jutro – a kade drugde nego va Bariće…

Royali 1965. godine: Duško Jeličić, Aljoša Kohuč, Milutin Kinkela Kiko, Mile Černigoj i Ranko Ožbolt – Privatna arhiva

Magari Van je ovo leto 60 let od kad je počela Vaša glazbena karijera, jubav prema muzike počela je čuda prej tega. Kada jušto?

Odvavek san volel muziku, još od kad san bil jako mići. Mama je volela kantat i jako lepo je kantala, pa kad bimo kamo šli ona bi zakantala z kompanijun, a ja bin njin kantal tercu. Onputa nisan ni znal da kantan tercu, ma san znal da je to lepo čut tako. Imel san smisla za muziku i jako san ju volel, pa san navadil i gitaru sost. Čuj, toliko san bil infišan z muzikun, da san se prošvercal va Kristalnu dvoranu va Kvarner – mi smo v Opatiju prišli 1957., a 1958. je počel Opatijski festival. Prošvercal san se nutra, i to kroz poneštricu od zahoda! Čak me je videt na jednoj snimke kako se skrivan zad kamermana. Ne moren ti opisat kakovo je to bilo uzbuđenje! Tega leta su na Festivale dobili Ivo Robić i Zdenka Vučković – kantali su „Malu djevojčicu“.

Znači, bilo je za očekivat da ćete bit muzičar! Kade i kako je počela Vaša karijera?

Prvi nastup san imel 29. novembra 1965. leta va Liče, z grupun Royali. Tamo smo gažu dobili preko pokojnega Milutina Kinkeli Kikota, ki nan je bil bubnjar. On je hodil va školu z predsjednikun omladine va Liče, pa nan je sredil gažu. Čuj, mi smo bili bend ki se j' oformil tega leta – ja nanke nisan ni bil va prvoj postave. To su bili Kiko, Ranko Ožbolt, Mile Černigoj, Aljoša Kohuč i Slobodan Bobo Pošćić. Zamenil san Bobota na bas gitare, a počel san i kantat. Znaš kakovu opremu smo imeli? Kiko je imel jedan mići doboš na ken je bila činela z onun kadinicun od vodokotlića, z kuglicami – za efekt! A bas – klasična gitara na ku smo nategnuli bas žice, pa njoj se j' vrat zgobil! Uglavnon, za ne verovat, na ti naši nastupi va Liče je prihajalo čuda Opatijci. Računaj da pred 60 let ni bilo auti za poć nekamo. Jedan del puta se j' šlo z korijerun , pa pokle z vlakun do Liča. A za vrnut se v Opatiju se j' čekalo prvi vlak na šest ur jutrun. Na nastupe za Novo leto verujen da j' bilo jedno 100 Opatijci! Prva letnja gaža nan je bila va „Piccolo Paradiso“, va „Malen Raje“. Pokle smo sopli još i va nekoj oštarije v Ike ku smo zvali „Slavonka“, pa va hotele Jadran va Lovrane… Čuda smo sopli! Čuj , va to vreme ti je na svakoj terase od Belvedera do Lovrana sopal bend i to minimum kvartet. A teh teras je bilo jedan mali miljon! Uglavnon, neku doba smo se pregrupirali, pa san ja nastavil sost z bendun Jučer nestali.

Mejten, „pravo“ muziciranje je počelo z Bonacun, snimili ste i prvu ploču.

Bonacu smo oformili 1976. na jesen. Raspali su se Royali, raspali su se Jučer nestali, a raspala se je i Rivijera s kun je Edi Lazarić sopal, pa smo oformili Bonacu. Prvi sastav je bil Kiko (bubanj), Mladen Krizmanić (saksofon i vokal), Darko Mihelić Boćo (bas), Edi Lazarić (klavijature), Silvana (klavijature i vokal) i ja san kantal. Snimit ploču va to vreme je bilo nezamislivo! Mejten, imel san jednega prijatelja, čovek je delal va katastre, i rekal mi je da će mi snimit ploču. Danaska se to snima va studije, svaki instrument na svojen kanale, pa se to miksa. A nas je prišal snimit Izidor Čubranić, urednik i novinar na Radio Rijeke z jednen mićen novinarsken kasetofonun Nagra, i to va hotel Jadran va Lovrane. Snimili smo Mačka z Voloskega i Opatijo, Opatijo, pa je Izidor snimku poslal va Beograd, va PGP RTB i storil 5000 ploč – bez da san ja njemu dal niš! Kad su te ploče prišle, ja ti ne moren opisat taj nivo mojga oduševljenja. Valda san lebdil 10 centimetar od tla, koliko san bil sretan!

Kad ste snimili „Petrsin i češanj“?

Još i prej tega, ma je ta snimka stala va fonoteke od Radio Rijeci čuda, čuda let. Jedan dan, negde početkun devedeseteh, san trefil Mirota Paušića ki je bil muzički urednik na Radio Rijeke i san ga pital ako more tu snimku poiskat i morda ju ki put pustit va eter. On i Vjeko Alilović su to pustili na radije, judi su se spočetka malo čudili, ma su brzo i prihvatili taj rock'n'roll na čakavice. Ča ti ni taj Petrsin i češanj prišal na Riječki Top 15? Va to vreme je postojala samo jedna top-lista, pa smo čak Enigmu zneli s prvega mesta! Jušto va to vreme su pul nas doma prišle Silvanine kujine z Talije, naslišaju tu top listu, pa govori jedna od njih mužu: „Ma guarda, Luigi, Madonna e Zucchero sono dietro de Dule!“, aš smo mi bili na top-ljestvice spreda njih! Za krepat!

Pjesma je pala na plodno tlo, aš je malo za ten počel i ča-val…

Je, pokle tega me je Vjeko zval da ako iman još ča, pa san snimil Mariju, Pod Učkun i Lovran, gradić mali. Mariju su toliko put pušćali da mi je lih prišlo da njin rečen da fermaju s ten, aš će juden počet na živci hodit. Andrej Baša mi je rekal da je Marija storila renesansu va čakavštine, a pofin te renesansi je i MiK opet pokrenut 1993. Pokle nekega vreemena su se va eter probili i Šajeta, Alen Vitasović, Battifiaca, Gustafi i čuda drugeh, a oni su pronesli taj ča-val po celoj Hrvatskoj.

Prva postava Bonace – gornji red: Mladen Krizmanić, Darko Mihelić, Milutin Kinkela; sredina: Edi Lazarić; dolje: Duško Jeličić i Silvana (Hamsa) Jeličić – Privatna arhiva

Va šou-biznise, slava nekako podrazumijeva i šoldi, ma to pul Vas ni bil slučaj?

Da san bar našal kakovega šegavega menadžera va to vreme, morda bimo se bili i obogateli! Se spametiš kako su se kazete prodavale na Korze? Neki mi je javil da prodavaju i našu „Mariju“, da su ju snimili valda z programa radija, aš da se čuje i Ferlina kako govori preko pjesmi. A mi, mesto da gledamo na gvadanj, mi smo bili oduševljeni da nas judi vole i naslišaju! Pa pusti jih neka prodavaju… Ja san ti takov, nisan se otel nikemu zamerit. A znaš kako reču – „Dobar je tovaru spodoban“ – uostalon, ja mislin da je to kompliment, aš je tovar jako lepo, pametno i plemenito blago!

Ma dobro, i tu moraju postojat nekakove granice.

Kad nekemu neč odbrusin, pokle mi bude žal. Čuda puti znan da će me neki preveslat, pa mu sejeno pomolan, neka uživa va ten da me je preveslal. Danaska malo drugačje gledan na sve, mislin da me je iskustvo na ratištu devedeseteh let dosta promenilo. Verujen da je promenilo seh nas ki smo bili. Judi su se navadili zimat me „zdravo za gotovo“, znaju da mi je teško reć nekemu „ne“. Ipak, neke lekcije san navadil. Pred čuda let, prej leh su maškarane povorke postojale, hodilo se j' okole po mesteh na Liburnije z auti. Mi smo to prvo leto stavili Bonacu na kamion, imeli smo agregat za razglas. Direktor „Javora“ nan je poslal pun kamion dasak i gredic da si za drugo leto storimo pozornicu na kamione. Bilo je oneh ki su bili ljubomorni, ki su sve neč njurgali i to me je raspalilo, zel san macu i razbil pozornicu. I tu san navadil lekciju. Trebali smo nastavit, va inat njurgavcun i đelozije!

Prišli smo do maškar, kemi ste zaštitno lice, potešta, alfa i omega…

Od mićega san bil lud za maškarami. Spametin se kad san se još kako mići otrok maškaral va Mickey Mousea. Imel san masku, mama mi je posudila neku črnu bundu i ja san ti cel dan tekal zgorun-zdolun po Splite. Spotil san se, prehladil i dobil upalu pluć… Celega života volin pusno vreme. Va maškarah san i moju Silvanu upoznal! Spametin se kako da je čera bilo – Lovranci su va toj auto-povorke storili brod, a ona je bila kapetanica broda! A znaš kako smo počeli z Balinjeradun? Jedno leto su Lumberi rekli da neće organizirat maškaranu povorku po Opatije. Ne spametin se zač. Uglavnon, kad san to čul, ja san isti minut znal da moramo neč storit da se užanca ne prekine. Vološćani na čelu z Gojkotun Ujdurovićun i moja grupa DS&PD smo se kalali na karićeh po Opatije i to je bila prva Balinjerada. Kiko z benda je bil i sudac prvega zavoja na Preluke, pa je sudil i na Balinjerade, on je predložil da storimo kategorije... Balinjerada je bila pun pogodak i tu se je uključil jedan ogroman broj judi va organizaciju, ma i sponzori. Ma cela stranica bi nan rabila samo za spomenut sveh ki su nan kroz leta pomogli. Čuda je dela bilo okol tega, istina, ma je to bil gušt delat, svi su bili puni entuzijazma. Drago mi je da je to danaska prezel Vjeko, stvarno dobro to delaju! Otel san se skroz povuć z organizacije, ma mi je Vjeko rekal da moramo bit prisutni. Tako da svako leto zvučemo van karići i vozići, kontroliramo, načinjimo ča rabi, sopemo na starte…

I normalno, Vi ste sako leto pusni potešta…

Znaš da san bil abdiciral pred neko vreme? Judi misle da je lahko bit pusni gradonačelnik, a ni – s ten je dela! Samo da bi poć na dečje matineje, koncerti, gostovanja va druga mesta… Uglavnon, neki su njurgali da zač san ja vavek pusni potešta, pa san njin bil prepustil mesto. Pasalo je neko vreme, pa su me zvali nazad. Mene to ni teško, ja to volin, samo ča bin volel i da pride neki mlaji, da to prezame. Kletu ću imet 80 let, kad-tad će neki drugi to morat prezet. Judi misle da se ja sakamo rivan, ma to ni istina! Organizatori me zovu, aš znaju da jih neću odbit i da ću storit delo kako boh zapoveda!

Sad kad mi govorite da neki mora prezet maškare, a ovo leto niste bil ni na MiK-e, ni na ČAnsonfeste, ne bin rada da neki misli da greste posensemu va penziju…

Ma ne! Slavin 60 let karijeri, to ni kraj! Lane san imel jako puno suradnji, valda više od dvajset – pisal san pjesme, puno angažmani je bilo, tako da san ovo leto zel slobodno od MiK-a i ČAnsonfesta, jednostavno ne bin sve arival.

Još jedna Vaša vela jubav je more: ribar po zanimanju, čuda let ste i jedril. Ši još ki put greste hitit mrežu?

Ne više! Iman dozvolu, jušto toliko da moren poć mrežu hitit ako mi Silvana reče da se j' zaželela friškeh oslići! Tu jubav prema moru san valda od tati naslijedil. Va Splite smo va Matejuške imeli barku ku je tata dal storit va Šilo. On je bil z Selca, inače. Bili smo prvi ki su va Matejuške imeli vanbrodski motor na barke. Blizu je bil Jedriličarski klub Labud i ja san vavek gledal kako bordižaju. Kad san prišal v Opatiju, s manun su va razred hodili Lippe i Mazele, oni su jedrili, pa san se i ja zapisal va klub… Jedril san Šćurotun, storili smo stvarno dobreh rezultati, osvojili državna prvenstva – intanto Šćuro još jedri, a mene je to sada već malo preveć. Uglavnon, va mladoste san celo vreme bil okol porta, ako nisan jedril, san ribu lovil ili ronil, pa san tako počel škamparit. Počel san z 90 vrš, ke su bile više gnjile nego čitovate i va njih san užal ćapat 7 do 10, neki put i 20 kil škampi. Današnji dan va 300 vrš ćapaju po 10 kil… Čujen da to gre na boje, da se j' pojavilo neč škampa, ne znan…

Kako ste postal „šaptač cegulima“?

Dok san ribaril i škamparil, cel dan bin bil z barkun vane, na more. Sunce bi peklo i komać san čekal prit na kraj i otoćat se va porte. Vavek san imel oneh raki mažinet, keh bin va more zdrobil. Na njih bi prišle salpice i ceguli, pa kad bin sel va more, užale su mi prit najprvo blizu, pa sve bliže i bliže, sve dok jih nisan arival i z rukun ćapat. Ceguli su inače strašjive i šegave ribe, neće ti blizu prit, a na me su se valda navadili. Neki će reć da blago oćuti dobrotu, oni malo manje dobronamjerni će reć da svaki more blago strenirat, pa ti vidi ča je… Uglavnon, Andrea Marsanich me je pofin tega krstil „šaptač cegulima“.

Prveh 60 let karijeri je zad Vas. Da se morete vrnut na početak, bite ča promenil?

Niš ne bin menjal. Morda bin ki put pametneji bil, da ne ispaden vavek naivan. Kako on put kad san se na manifestacije „Moj prvi uspjeh“ – neč kako ča je današnji „The Voice“ – z Lucillun šal menjat za redoslijed nastupa. Ona ni otela zadnja nastupat, pa smo se zamenili, a žiri me j' pofin tega diskvalificiral. Volel bin da nisan takova pegula. Školi su me skoro van hitili, dobil san ukor pred isključenje pofin stakla ko nisan ja razbil. Uža se dogodit da se svetla od javne rasvjeti gase kako ja zdola njih pasujen…

Uostalon, mene su tužili kad se j' za vreme koroni dogodila ona spontana Balinjerada. Judi su se spontano okupili pul hotela Paris na Lontošnju nedeju, ka je vavek 56 dan prej Vazma i kada svako leto imamo Balinjeradu. A kako su okupljanja bila zabranjena, ni kriv ni dužan, ja san gvadanjal prekršajnu prijavu. Na kraje san oslobođen optužbe, ali triput san hodil na ročišta. Ma, pusmo sad tu moju pegulu…

Kako ćete proslavit jubilej?

Parićuju mi koncert va Gervaisu 28. novembra – rekli su mi da ne moran niš delat, nego samo da neka priden! Mejten, ipak ću z Bonacun otkantat par pjesam, bit će čuda gosti ki će interpretirat moje pjesme, na svoj mod. Verujen da će bit lepo, pa pozivan seh da nan pridu pomoć proslavit i dobro se zabavit!

Piše: Elena Vidović
Za: List Opatija

Follow @PodUckun