[RAZGOVOR] Boris Crevatin: Opatijo, fališ mi!
Autor: Elena Vidović 21.08.2023
Majicu kako da j' Eni Olas fatapošta storila za Floka – Borisu Crevatinu najviše fali Opatija! (Foto: Nikola Turina)Govori da ni bil strog banjin, aš da bi zadnju kontrolu karat bil storil okol uri zapolnen, pa ki j' prišal zapolnen, lišo bi pasal!
Jedanputa na leto, na Slatine, va restorane pul Miri najde se ekipa „stareh“ (ma va duše mladeh) Opatijci. Pul obeda, z kakoven otavićun ili bićerinun, prebiraju štorije i ćakule najveć tamo z sedandeseteh i osandeseteh let. Magari se već čuda let tako najdu, saki put vanka pride kakova nova-stara štorija od onega vremena kada su bili mladići. „Inicijator“ tega okupljanja je Boris Crevatin kega veramente si puno boje znaju po nadimke Flok i ki već čuda let živeje i dela va Gladbecke va Njemačkoj.
Flok je teh famozneh sedandeseteh let na Slatine delal kako banjin. Najprej j' delal kako spasilac, a pokle i „na peske“. Govori da ni bil strog banjin, aš da bi zadnju kontrolu karat bil storil okol uri zapolnen, pa ki j' prišal zapolnen, lišo bi pasal! Od stare Slatini poveda z toliko ljubavi i sentimenta, da se onemu ki ga nasliša čini da putuje va jeno drugo vreme, jenu skroz drugačju dimenziju.
– Ka lepa vremena su to bila! Pod mostun na Slatine, va plićake smo igrali glavomet dva na dva – dva igrača „va polju“, a dva su bili na gole. Balun si mogal samo z glavun nabit ili ga „na škarice“ udrit. Delali smo takove vratolomije, da j' to bila prava atrakcija! Po sto judi je bilo naredano gore na lingjere i gledalo nas. Jedanput je pokojni Ivo Kirigin bil na gole, a braneć je odrsal ruku po pale od mosta, na ken su rasli pedoći. Finil je pul doktora Kuzmića z 36 kopči na ruke, a kad se j' vrnul, vas zafašan, pita nas: „Ćo, ste videli kako san obranil?“, povedel nan je štoriju od glavometa Flok i špjegal kako su mladići čekali va file za prit na red za igrat. A ta ista dečina va glave su imela i kompletnu „inventuru“ kabini. Jušto su znali na koj je kakova daska z posušenun grčun, ku se j' moglo zibit vanka i storit „špiju“ za pokukat va kabinu kad se presučuje kakova „osoba od interesa“. Eko, to su bila ta „druga vremena“ – danas tako ča ne bi pasalo bez skandala ili tužbi…
To j' bila Opatija po lete. Po zime, govori Flok da su uglavnon hodili vanka i dobro se zabavljali.
I ovo leto je Boris okupil kompaniju pul Miri na Slatine; stoje, z levega: Tacio Mozetić, Miljenko Marin – Grof, Aleksandar Alobić – Saša, Mario Valčić – Banjin, Ivo Poščić – Kašeta, Rade Rubeša, Mario Šikić – Marioki, Josip Olas – Febo; sede: Zlatko Bašić, Boris Crevatin – Flok, Darko Cetina – Ceto (Foto: Nikola Turina)– Va Biljare pul Nikice smo bili kuhani i pečeni! Hodilo se j' va Maju pul Evelini i onda va Espresso va Jadran, danas Milenij. Tamo smo užali čekat da ki pasa po marčapije spreda, pa mu kucat na staklo da pride ča popit z nami, računajuć da će nan platit pijaču. Jedanput je pasal Ivo Robić i mi smo mu tako kucali. Prišal je nutre i mi ga pitamo ako ćemo ča popit. Popil je gemišt i šal ća! Na naš račun! Pokle mu više nismo kucali…, kroz smeh nan poveda Flok.
Finil je opatijsku ugostiteljsku školu, pa j' potle „banjinske“ karijeri jeno vreme delal i va motele Ičići kako konobar. A onda je, osandeseteh let, prišla ponuda da gre delat van, va Uelzen pul Hannovera va Njemačkoj. Laureat opatijske školi, zanat je stesal pul konobari stare školi, pa j' va Njemačkoj brzo avanceval i prišal do mesta natkonobara va luksuznen restorane. V Opatiju je rado prihajal, se dok nisu zrušili staru Slatinu.
– Kad su naši „dragi“ Opatijci rešili zrušit (namesto obnovit) staru Slatinu, to srce Opatije – va suzah san odlučil da ja v Opatije više niman ča iskat, žalostan je Flok još dan-danaska kako ča j' bil i onda, kada puneh 18 let od žalosti ni mogal nanke pasat kroz Opatiju.
A va Njemačkoj je, uz delo konobara, počel i distribuirat žmuji za sladoled. I temu delu se j' 100% posvetil, obahajal je vlasniki lokali ki prodavaju sladoled i od početneh petnajstak, prišal je do 150 Eiscaféi (kako se ti lokali zovu va Njemačkoj). Kada j' propala firma za ku j' delal, Flok je odlučil ostat va isten dele i počet delat sam. Danaska j' A&B Crevatin Eiscafébedarf jedan od vodećeh njemačkeh distributeri ne samo žmuji, leh i kompletne opremi za sladoledarnice, ki opremu distribuiraju va više od 600 lokali po celen svete. Va ponude su njin i makine za sladoled, brendirani sitan inventar, uniforme, perfin fotografaju i delaju grafičku pripremu za cjeniki. Kako nan poveda, danaska va ponude ima 38 vrsti žmuji za sladoled, ki se proizvode napošno za njegovu firmu, i to va Rumunjskoj – ručno su delani, puhani, a ne „štancani“. Na priliku, njihovi žmuji za sladoled se koriste va rječken „Cacao“ i va opatijskoj „Perle“ na Pančere.
Flokovi žmuji od puhanega stakla imaju i va opatijskoj slastičarne „Perla“ (Foto: Nikola Turina)Ovo j' leto napunil 70 let i po prvi put je celo leto „na ferijah“ va Vabrige pul Poreča kade j' nadozidal starinu, a firmu i delo je dokle prepustil žene i sinu. Govori da mu delo ne fali, mejten sejeno pomore prijatelju va agencije kad trebe, a i obajde kakov restoran ili oštarijicu kad njin rabi kakova oprema. A za mladi poduzetniki ima dobar savjet:
– Čuvajte prepone! Ako budete delali preveli koraki, šundrat ćete si prepone! Va dele delajte mići koraki, ostanite na zemje i držite se puta!
